Zĩn 5

Anania ń Safilao

1Gɔ̃ɛe ku, wì mɛ Anania ń a na Safilao. À a tɔɔlɛ yìa, 2à a ɔ̃a kĩni kuluyè ń a na dɔ̃ao, ɔ̃ à gɛ̀ à a kĩni kpà zĩnaɔwa. 3Ɔ̃ Piɛɛ òɛ̀: Anania, bɔyãi ń tò Setãu dɔ̀aanɛ màa, n n tɔɔlɛ ɔ̃a kĩni kuluyè, ɔ̃ n ɛɛtò Lua Nisĩnaɛi? 4Gɔɔ pɔ ni tɔɔlɛpi yiao, n pɔ nolo? Kɛ́ ń yìa sɔ̃, lá ń yei, ńyɔ̃ kɛ ń a ɔ̃aoo lo? Bɔyãi n yã bee kɛa laasookɛ̀i? I kɛ gbɛ̃nazĩna n ɛɛtòɛ̀o, Lua ń tòɛ̀. 5Kɛ́ Anania yãpi mà, à lɛ̀lɛ à gà. Ɔ̃ vĩa gbɛ̃́ pɔ yãpi màɔ kũ̀ maamaa. 6Ɛwaasoɔ gɛ̃̀ aa zwãa kùaala, ɔ̃ aa aà sɛ̀, aa gɛ̀ aa vĩ̀.

7Kɛ́ à kà lɛɛlu aaɔ̃ taawa, yãemasai aà na mɔ̀ gɛ̃̀. 8Ɔ̃ Piɛɛ aà là à mɛ̀: Omɛɛ, a tɔɔlɛpi yìa kɛ́wa yã? A wèwà à mɛ̀: Ao, màaɛ. 9Ɔ̃ Piɛɛ òɛ̀: Bɔyãi a Lua Nisĩna lɛ̀ á gwài? Gbɛ̃́ pɔ aa n zã́ vĩ̀ɔ ku kpɛɛlɛ, aa n sɛ aa bɔnnɔ sɔ̃. 10Wegɔ̃ɔ à lɛ̀lɛ aà aɛ à gà. Kɛ́ ɛwaasoɔ gɛ̃̀, aa è à gà, ɔ̃ aa aà sɛ̀, aa gɛ̀ aa vĩ̀ aà zã́ saɛ. 11Ɔ̃ vĩa Yesudeɔ kũ̀ maamaa mpii ń gbɛ̃́ pɔ yãpi màɔ pii.

12Zĩnaɔ lɛ́ dabudabu ń yãbɔnsaɛɔ kɛ gbɛ̃́ɔ guu dasi. Ampii aaì kãaa Salomɔ Velandau. 13Gbɛ̃pãleɔ lí we nàmáo, ãma gbɛ̃pii ì ń tɔnasiɛ, 14mɛ́ bila pɔ lɛ́ Dii Yesu naaikɛɔ, gɔ̃ɛɔ ń nɔɛɔ pii, aaìɔ kãfĩ ń guuɛ. 15Ɔ̃ wà gyãeɔ sɛ̀lɛ ń wulɛbɔɔ ń makɛlɛɔ wà ń kalɛ zɛ́u, kɛ́ tó Piɛɛ lɛ́ gɛ̃, aà nisĩna e da an gbɛ̃eɔla. 16Bila bɔ̀ wɛ̃lɛ pɔ ku Yelusalɛũ saɛɔ guu aa mɔ̀ ń gyãeɔ ń gbɛ̃́ pɔ tãa lɛ́ ĩadamáɔ, ɔ̃ aa gbã̀gbã pii.

Wɛtɛ̃a mɔa zĩnaɔnɛ

17Ɔ̃ sa'onkia ń Saduse gãlide pɔ dɛ aà gbɛ̃́ ũɔ wɛdɔ̀ zĩnaɔnɛ aa fɛ̀lɛńnɔ, 18aa ń kũkũ̀, aa ń ká kpɛ́u, 19ɔ̃ Dii malaikae mɔ̀, à kpɛ́pi zɛ́ wɛ̃̀nɛ́ gwãasĩna, à ń bɔlɛ à mɛ̀: 20À gɛ àɔ ku Lua ua, í wɛ̃ni dafupi yã'o gbɛ̃piiɛ. 21Zĩnaɔ yãpi mà, ɔ̃ aa gɛ̀ Lua ua kɔɔkɔɔ, aalɛ yãdanɛ́.

Kɛ́ sa'onkia ń a gbɛ̃́ɔ fɛ̀lɛ, aa Isaili gbãadeɔ ń ń gbɛ̃zɔ̃ɔɔ kã̀aa, ɔ̃ aa dɔaiɔ zĩ̀ aa gɛ́ zĩnaɔ bɔlɛ kpɛ́u aa mɔńnɔ. 22Kɛ́ dɔaipiɔ kà we, aai ń e kpɛ́uo. Ɔ̃ aa ɛ̀a gɛ̀ aa ònɛ́ 23aa mɛ̀: Kɛ́ wa ka kpɛ́pi kĩi, wá lè gbaɔ tataaɛ giũgiũ, mɛ́ a dɔ̃anaɔ ku kpɛɛlɛ, ãma kɛ́ wa zɛwɛ̃̀, wi gbɛ̃e euo. 24Kɛ́ Lua ua dɔ̃anaɔ gbɛ̃zɔ̃ɔ ń sa'onkiaɔ yãpi mà, aa bilikɛ̀ yã pɔ zĩnaɔ lèwa. 25Ɔ̃ gbɛ̃e mɔ̀ a ònɛ́: À ma! Gbɛ̃́ pɔ a ń ká kpɛ́uɔ ku Lua ua, aalɛ yãdanɛ́. 26Ɔ̃ Lua ua dɔ̃anaɔ ń ń gbɛ̃zɔ̃ɔo gɛ̀ aa ń kũkũ̀, aa sùńnɔ yãkelesai, asa aalɛ vĩakɛ bilaɛ, kɛ́ wasu wà ń papa ń gbɛoo yãiɛ.

27Kɛ́ aa sùńnɔ, aa ń zɛ́ gbãadeɔ aɛ, ɔ̃ sa'onkia yãlàlamá à mɛ̀: 28Wa giɛ́ fĩ́afĩa à yãdanɛ́ ń tɔ́pioɛ, ɔ̃ á tò yãpi gì lì Yelusalɛũa pii, mɛ́ á ye à gbɛ̃́pi gaa yãdiwɛ̃ɛa?#Mat 27.25 29Ɔ̃ Piɛɛ ń zĩna kĩniɔ wèmá aa mɛ̀: Lua yã mɛ́ kũ̀ wà ma dɛ gbɛ̃nazĩna pɔa. 30Wá deziɔ Lua mɛ́ Yesu pɔ a aà lòo líwa á dɛ̀pi bɔ̀ gau. 31Lua aà sɛ̀ a zɔ̃̀lɛ a ɔplaai Dɔaana ũ, Suabana ũ, kɛ́ à Isailiɔ gba zɛ́ aa nɔsɛlilɛ, an duuna i kɛ̃má. 32Yãpiɔ seeladeɔn wá ũ, wapiɔ ń Lua Nisĩna pɔ Lua ì kpa gbɛ̃́ pɔ aalɛ a yãmaɔwao.

33Kɛ́ aa yãpi mà, an pɔ fɛ̃̀, ɔ̃ aa ye wà zĩnaɔ dɛdɛ. 34Falisi pɔ wì mɛɛ̀ Gamaliɛli ku ń guu. Luayãdanɛdeɛ, gbɛ̃pii ì aà tɔnasi. À fɛ̀lɛ zɛ̀, à mɛ̀ wà bɔ ń gbɛ̃́piɔ gĩ́a. 35Ɔ̃ a ònɛ́: Isailiɔ, à laaika yã pɔ á ye kɛ gbɛ̃́piɔnɛi. 36A gɔɔ i gɛ̃gɛ̃o kɛ́ Tedasi fɛ̀lɛ àlɛ azĩa dilɛ a ká. Wà tɛ̀aazi gbɛ̃ɔn ɔaa pla taawa. Kɛ́ wà aà dɛ̀, ɔ̃ aà iwaɔ gãmblaablèkɔ̃wa, ɔ̃ yã làa. 37Aà gbɛa Galile gbɛ̃́ Yuda fɛ̀lɛ naokɛgɔɔ, à gbɛ̃́ɔ gà a nàwa dasi. À gà sɔ̃, ɔ̃ aà iwaɔ fã̀aa pii. 38Malɛ oɛ́ tia, ásu gbɛ̃́piɔ yãdao, à ń to we. Tó an pɔeã ń ń yãkɛaɔ bɔ̀ gbɛ̃nazĩna kĩiɛ, a bãdɛɛ. 39Tó à bɔ̀ Lua kĩiɛ sɔ̃, á fɔ̃ kpanɛ́o. À laaika zĩkaa ń Luaozi. Aa aà yãmà. 40Kɛ́ aa zĩnaɔ sìsi, ɔ̃ aa ń gbɛ̃́. Aa gìnɛ́ aa yã'o ń Yesu tɔ́o, ɔ̃ aa ń gbaɛ.

41Zĩnaɔ bɔ̀ gbãadeɔ kĩi ń pɔnao, asa Lua dìlɛ an bɛɛɛ kà wà widamá Yesu tɔbɔa yãiɛ. 42Lagulɛdɔ aaìɔ yãdanɛ́ Lua ua ń ń bɛɔ, aaìɔ Yesu baokpanɛ́ kãmabosai, aaì mɛ ɔ̃mɛ Mɛsi ũ.

Currently Selected:

Zĩn 5: Boo2024

Highlight

Copy