Zĩn 26

Pɔlu yã'oa ki Agipa aɛ

1Ɔ̃ Agipa ò Pɔluɛ: Ń zɛ́ vĩ ǹ n yã'o. Ɔ̃ Pɔlu ɔsɛ̀, à azĩa yã bɔɔlɛkɛ̀ à mɛ̀: 2Ki Agipa, má è ma minakɛ̀, kɛ́ má è malɛ azĩa yã bɔɔlɛkɛ n aɛ gbã, yã pɔ Yudaɔ lìamazi musu pii. 3Atɛ̃sa kɛ́ ń Yudaɔ fɛlɛkaayã dɔ̃ pii ń ń yãkeleɔ. Bee yãi ma wabikɛ̀ma, ma yãɛ mamɛɛ. 4Yudaɔ ma kua dɔ̃ za ma nɛblegɔɔ, daalɛa ma busuu e Yelusalɛũ. 5Aa ma dɔ̃ à gɛ̃̀gɛ̃. Tó aa yei, aa fɔ̃ o wá luasisigãli pɔ gbãa ń Lua yão wì mɛ Falisiɔ gbɛ̃́n ma ũ. 6Tiasa wàlɛ yãkpalɛkɛmanɔ, kɛ́ ma wɛ́ dɔ lɛ́ pɔ Lua gbɛ̃̀ wá deziɔnɛzi yãi. 7Wá bui kuɛplaɔ aaìɔ zɔble Luaɛ gwãasĩna ń fãanɛo wɛdɔa lɛgbɛ̃a doũpizi guuɛ. Ki, wɛdɔa yãpizi yãi ɔ̃ Yudaɔ fɛ̀lɛimanɔ. 8Bɔyãi Lua gɛɔ vua kɛ̀ɛ́ yã zɛsai ũi?

9Mapi yãa, ma zɛò kɛ́ yã pɔ a bɔ Yesu Nazalɛti yã kpɛ ɔ̃ máliɔ kɛ pii. 10Màa má kɛ̀ Yelusalɛũ. Sa'onkiaɔ ma gba zɛ́, ɔ̃ ma Lua gbɛ̃́ɔ kà kpɛ́u dasi. Tó wàlɛ ń dɛdɛ sɔ̃, ma lɛ́ ìɔ ku a guuɛ.#Zĩn 8.1-3 11Miɔ gɛ́ luasisikpɛ ń luasisikpɛo mɔɔmɔɔ màɔ wɛtɛ̃amɔnɛ́, mi gãnamá aa dɔɛ ń Luao. Ma pɔ fɛ̃ańzi, ɔ̃ mi gɛ́ ĩadaimá ń wɛ̃lɛ baaɔ.#Zĩn 9.1-2

Pɔlu a zĩ bɔɔlɛkɛanɛ́

12Beewa malɛ gɛ́ Damasi ń iko pɔ sa'onkiaɔ ma gbaɛòo. 13Ki, kɛ́ má bɛ zɛ́u ĩatɛ̃ minanguo, ma gupua è, à bɔ̀ luabɛ à kùlɛa ń ma gbɛ̃́ɔ, a pãsĩ dɛ ĩatɛ̃a. 14Wa lɛlɛ zĩlɛ wapii, ɔ̃ ma yã'o mà, wa òmɛɛ ń hɛbɛluyão wà mɛ̀: Sɔlu, Sɔlu, bɔyãi nlɛ ĩadaiai? Lipana zɔ̃a ń teo mɛ́ lɛ́ ĩakpanzi fa! 15Ma mɛ̀: Mmɛ ń déi, Dii? Ɔ̃ Dii mɛ̀: Ma Yesu, mamɛ nlɛ ĩadaa. 16Fɛlɛ ǹ zɛ. Ma bɔ ma mɔma kɛ́ mà n sɛ ma zĩkɛna ũɛ, níɔ dɛ yã pɔ ń è ń yã pɔ má ɔlɔnɛo seelade ũ. 17Má n bɔ Yudaɔ ɔzĩ ń buipãleɔ ɔzĩo lɔ. Malɛ n zĩmá, 18kɛ́ ǹ ń wɛ́ kɛ̃nɛ́, aa bɔ gusiau, aa gɛ̃ gupuau, aai bɔ Setãu ikou aa gɛ̃ Lua pɔu, an duuna i kɛ̃má, aai asea e sãnu ń gbɛ̃́ pɔ an kua adoaɔ ma naaikɛa yãi.

19Ki Agipa, ayãmɛto mi gi wɛpungu pɔ bɔ̀ luabɛ yãmaio. 20Ma waasokɛ̀ Damasi gĩ́aɛ ń Yelusalɛũo,#Zĩn 9.20, 28 ɔ̃ má kɛ̀ Yude busuu pii ń buipãleɔ kĩio. Má ònɛ́ aa nɔsɛlilɛ aa zɛ ń Luao, aaiɔ yã pɔ a to wà dɔ̃ aa nɔsɛlìlɛ kɛ. 21Bee yãi Yudaɔ ma kũi Lua ua, aa ye wà ma dɛ. 22Lua dɔnlɛ má kuò e ń a gbão, ɔ̃ má dɛ aà seelade ũ nɛfɛ̃nɛn gbɛ̃zɔ̃ɔɔnɛ pii. Mili yãpãle oo, sema yã pɔ ãnabiɔ ń Mɔizio ò à kɛ̀ baasio. 23Aa mɛ̀ Mɛsi a taasikɛ, ɔ̃mɛ a bɔ gau sɛ̃ia, i gupua yã'o Yudaɔnɛ ń buipãleɔ.#Isa 42.6, 49.6

24Kɛ́ Pɔlu lɛ́ azĩa yã bɔɔlɛkɛ màa, Fɛsɛtu pàlawà à mɛ̀: Ĩana kàma yã̀ Pɔlu? N dɔ̃a zɔ̃ɔ mɛ́ lɛ́ n mi liaa. 25Ɔ̃ Pɔlu mɛ̀: Ĩana i kaao, Fɛsɛtu. Yãzɛde malɛ o mɛ́ sĩanaɛ. 26Ki, lá ń yã beeɔ dɔ̃, má fɔ̃ mà a yã'onɛ wasawasa bakũaanakɛsai. Má dɔ̃ kɛ́ a kee i kɛ n mikpɛo, asa yãpiá gusaɛ yã no. 27Ki Agipa, n yã pɔ ãnabiɔ ò sìa? Má dɔ̃ kɛ́ ń sì. 28Ɔ̃ Agipa ò Pɔluɛ: Ń ye ǹ lɛnakasamɛɛ mà gɔ̃ Yesude ũ gɔ̃̀ɔ yã? 29Pɔlu mɛ̀: Gɔ̃̀ɔ ge zã́ má yei, tó Lua wèi. I kɛ ndo no, ń gbɛ̃́ pɔ aalɛ ma yãma gbãɔ piiɛ, aa gɔ̃ lámawa, mɔdaonaɛ beeɔ baasi. 30Ɔ̃ kiapi ń busu gbɛ̃zɔ̃ɔo ń Beenisio ń gbɛ̃́ pɔ kãaaa weɔ fɛ̀lɛ aa bɔ̀lɛ. 31Kɛ́ aa bɔ̀lɛ, aalɛ o'okɔ̃ɛ: Gbɛ̃́pi i yãe kɛ à kà dɛa ge wà da kpɛ́uo. 32Ɔ̃ Agipa ò Fɛsɛtuɛ: Tó gbɛ̃́pi i mɛ a yãpi a gɛ́ Sezaa kĩiɛ yãao, wá aà gbaɛɛ.

Currently Selected:

Zĩn 26: Boo2024

Highlight

Copy