Zĩn 27

Taa ń Pɔluo Loma

1Kɛ́ wà zɛ̀ò wà da Itali zɛ́u, ɔ̃ wà Pɔlu ń dakpɛuna kĩnieɔ nà sosa bade pɔ wì mɛɛ̀ Zuliuɛ a ɔzĩ. Sosa gãli pɔ wì mɛ Sezaa sosaɔ dɔaanaɔ doɛ. 2Wa gɛ̃ go'ilɛna pɔ bɔ̀ Adamiti, a bɔlɛ ń Azi busu wɛ̃lɛɔɛ, ɔ̃ wa da zɛ́u. Masedoni busu gbɛ̃́ Alisaka Tɛsaloni kuwanɔ. 3Kɛ́ a gu dɔ̀ wa ka Sidɔ̃. Zuliu Pɔlu kũa ń nɔsɛdoũo, ɔ̃ à aà gbà zɛ́ aà gɛ́ a gbɛ̃́ɔ gwai, kɛ́ wà ɔdawà. 4Bɔa we wa pɛlɛ í guo. Kɛ́ ĩana lɛ́ dawálɛ yãi, wa ĩanazɔ̃̀ɛ wa bɔ Sipi gũgũna kpɛ oi. 5Bɛa isia guo wa dɔ Silisi ń Pamfili busuɔzi, ɔ̃ wa ka Mila, Lisi busuu. 6Wekĩi sosa badepi Alɛsãndi go'ilɛna pɔ lɛ́ gɛ́ Itali è, ɔ̃ à wá kau.

7Gɔɔ plae dà wá tá kɔɔnkũ̀. Dɛ̃ɛ ń dɛ̃ɛo ɔ̃ wa ka Sinidi lɛi. Kɛ́ ĩana i weiwɛ̃ɛ wà gɛ́ susuo, wa pãalɛ wa ĩanazɔ̃̀ɛ wa bɔ Kɛlɛti gũgũna kpɛ oi Samɔnɛ saɛ. 8Dɛ̃ɛ ń dɛ̃ɛo wálɛ dɔ Kɛlɛtizi, ɔ̃ wa ka gu pɔ wì mɛ Godɔkĩi Maau. A zã̀ ń wɛ̃lɛ pɔ wì mɛ Laseoo. 9Lá wa gɛ̃gɛ̃ zɛ́u, wá taa'o gɛa aɛ gɔ̃̀ kaiyã ũ, asa Yudaɔ lɛyegɔɔ gɛ̃̀ kɔɛ. Ayãmɛto Pɔlu lɛdàmá 10à mɛ̀: Gbɛ̃́ɔ, má è táɛ bee a mɔ ń asoo zɔ̃ɔo ń musio. I kɛ gópi ń a asoɔɛ adoo, ń wapiɔɛ lɔ. 11Ãma sosa bade gobɔna ń godeo yãsì dɛ Pɔlu yãa. 12Gupi maa wà godɔu wà buziɛble weo, ɔ̃ gbɛ̃́ daside zɛ̀ ń daa zɛ́uo. Aa ye wà ka Feniki, wɛ̃lɛ pɔ ku Kɛlɛti bɛ'aɛ oi, tó a zɛkɛ̀, wí buziɛble we.

Zaa'ĩana fɛlɛa isiaa

13Kɛ́ ĩan busɛ fɛ̀lɛ gɛɔmidɔkĩi oi, aalɛ e wa fɔ̃ wà ń pɔeã daɛ̀ɛ. Ɔ̃ aa ń gó pòlo aa dà zɛ́u, aalɛ dɔ Kɛlɛtizi kãikãi. 14I gɛ̃gɛ̃o, zaa'ĩan gbãa pɔ wì mɛ ĩan pãsĩ kàka Kɛlɛti gbɛ musu ɔ̃ à pìla. 15À gó lìaa, wi fɔ̃ wa daɛ lɔo, ɔ̃ wa gɔ̃ tɛi. 16Kɛ́ à wá kpá gũgũn nɛna pɔ wì mɛ Kodai, wa daama'è yɔɔ. Dɛ̃ɛ ń dɛ̃ɛo ɔ̃ wa wá gó nɛna suababɔ è wá kũ̀ we. 17Kɛ́ aa yè wa nà gó zɔ̃ɔpiwa, ɔ̃ aa kɛ̀kɛ wà bakã̀ gó zɔ̃ɔpiɛ. Kɛ́ aalɛ vĩakɛ Libi busu isaa gɛ̃aɛ yãi, ɔ̃ aa gó kúla pɛ̀lɛ íu, ɔ̃ aa gɔ̃̀ tɛ ĩanai. 18Kɛ́ a gu dɔ̀, lá zaa'ĩana gì àlɛ wá gó zãampapa gbãugbãu, ɔ̃ aa nà asoɔ zuzua íuwa. 19A gɔɔ aaɔ̃dezĩ aa ń gó zĩkɛbɔɔ bɔ̀lɛ aa kɔ̀lɛ ńzĩa. 20À kà gɔɔ ũma ĩatɛ̃ ń saanaɔ i bɔo, mɛ́ ĩan pãsĩpi ń louo i kpalɛo. Buaa aafia pɔ wá wɛ́ dɔi yãa kɛ̀ fama.

21Wa gɔɔplakɛ̀, wi e wà pɔblèo, ɔ̃ Pɔlu fɛ̀lɛ a ònɛ́: Gbɛ̃́ɔ, tó a ma yãmà yãa, dɔ̃ wi fɛlɛ Kɛlɛti, musi ń asooɛ beeɔ gbàsa wá léo. 22E tia malɛ lɛdawá, à sɔ̃dilɛ! Á gbɛ̃e a gao, sema gópi wiwi baasio. 23Gĩa gwã Lua pɔ má dɛ aà pɔ ũ mɛ́ mi zɔbleɛ̀, aà malaika bɔ̀ à mɔ̀a 24à mɛ̀: Nsu vĩakɛo, Pɔlu. Sema ǹ Sezaa aɛ le. Lua gbɛ̃́ pɔ kunnɔ gó guuɔ bɔ̀nɛ aafia mpii. 25Ayãmɛto gbɛ̃́ɔ, à sɔ̃dilɛ! Má Lua naai vĩ kɛ́ a kɛ lá a òmɛɛwa. 26Sema wà ka gũgũnae isaaa.

27A gɔɔ gɛ̃omɛndosaide gwã ĩan pãsĩpi lɛ́ wá galɛ Adiati ía e tia. Ɔ̃ wɛɛdo igbɛ̃ɔ lɛ́ e wa kãikũ̀ ń gɔ̃sɔ̃lɛoɛ. 28Ɔ̃ aa bà i'ɛgwabɔ gbàɛ íu, aa è a ɛ zã̀ gãsĩsuu basiiɔ̃ɛ. Kɛ́ à kɛ̀ sàa yɔɔ aa gbàɛ lɔ, aa è a ɛ zã̀ gãsĩsuu baaɔ̃ɛ. 29Aalɛ pãa gbɛwa vĩakɛ, ɔ̃ aa kúla gbàɛ gó pɔɔkpɛ mɛn siiɔ̃, gudɔa ɔ̃ an wɛ́ dɔi. 30Gópi zĩkɛnaɔ lɛ́ zɛwɛɛlɛ wà bɔlɛ gó guu wà baalɛ, ɔ̃ aalɛ gó suababɔpi pila aa da ía, aalɛ kɛ lá wa ye wà kúlaɔ gbaɛ go'aɛwa. 31Ɔ̃ Pɔlu ò sosa badeɛ ń aà sosanɛɔ: Tó gbɛ̃́ɛ beeɔ i gɔ̃ gó guuo, á bɔ aafiao. 32Ɔ̃ sosaɔ gó suababɔ baɔ zɔ̃̀zɔ̃, aa tò à lɛ̀lɛ íu.

33Kɛ́ gu ye dɔi, Pɔlu awakpànɛ́ mpii aa pɔble à mɛ̀: A gɔɔ gɛ̃o mɛndosain gbã, á wɛ́ dɔ suabaai pɔblesai. 34Malɛ awakpaɛ́ à pɔble, asa a maa á pɔlɛba àɔ dɔaɛ, í bɔ aafia. Baa á mikã mɛndo a vũaao. 35Pɔlu yãpi oa gbɛa à pɛ̃ɛ sɛ̀, à Lua saaukpà gbɛ̃pii wáa, ɔ̃ a ɛ̀ àlɛ só. 36Ampii aa sɔ̃dìlɛ ɔ̃ aa pɔblè sɔ̃. 37Wá gbɛ̃́ pɔ wá ku gó guuɔ pii, wa ka gbɛ̃ɔn ɔaa do ń basiiɔ̃ siiɔ̃saio (276). 38Kɛ́ aa pɔblè aa kã̀, aa pɔwɛna asoɔ bɔ̀lɛ aa zùzu íu, kɛ́ gó e yãfũnkũ yãi.

39Kɛ́ gu dɔ̀, aa gɔ̃sɔ̃e è, aai dɔ̃o. Kɛ́ aa isia sɔɔmiboa è a gɔ̃sɔ̃ daaĩa, ɔ̃ aa zɛ̀ò wà gɛ́ ń góo isaaa we, tó wa fɔ̃́. 40Aa kúlaɔ wòlo aa tò í guu, ɔ̃ aa golilibɔɔ ba pòlo gɔ̃̀ɔ. Aa go'aɛ zwãa pòo ĩanaɛ, ɔ̃ aa mipɛ̀ gɔ̃sɔ̃piwa. 41Ɔ̃ aa sì ũfãau ń saɛ, ɔ̃ gó zɛ̀ we. Ũfãapi go'aɛ kũ̀ giũgiũ, i fɔ̃ dèeo, ɔ̃ ikooa pɔ lɛ́ vĩvĩ ń gbãao lɛ́ gó pɔɔkpɛ wiwi. 42Sosaɔ zɛ̀ò wà dakpɛunaɔ dɛdɛ, kɛ́ an gbɛ̃e su kpaa'o à pilimáo yãi. 43Ãma kɛ́ sosa bade ye Pɔlu misi yãi, ɔ̃ à gìnɛ́ aa ń pɔeã kɛ. A ò kpadɔ̃naɔ dɔaa kusi íwa aa bua, 44gbɛ̃kĩniɔ iɔ tɛ́ ń kpɛ lipɛpɛɛɔ ge gó kasoɔ musu. Beewa ɔ̃ gbɛ̃pii baa lè aafia.

Currently Selected:

Zĩn 27: Boo2024

Highlight

Copy