Zĩn 25

Pɔlu zɛa ń gɛa Seza kĩio

1Fɛsɛtu zɔ̃lɛa kpalau gɔɔ aaɔ̃ gbɛa, à fɛ̀lɛ Sezale à gɛ̀ Yelusalɛũ. 2Wekĩi sa'onkiaɔ ń Yuda gbãadeɔ mɔ̀ aà kĩi, ɔ̃ aa bɔ̀ ń Pɔlu yão. Aa wabikɛ̀wà 3aà suuukɛ, aà to Pɔlu mɔnɛ́ Yelusalɛũ. Asa aa zɛ̀ò wà baikpaɛ̀ zɛ́u wà aà dɛɛ. 4Ɔ̃ Fɛsɛtu ònɛ́: Pɔlu ku kpɛ́u Sezale, mapi sɔ̃ má tá we tia. 5Á gbãadeeɔ mɔ aa gɛ́manɔ, tó à yãvãikɛ̀ɛ, í o.

6Fɛsɛtu kɛ̀ńnɔ gɔɔ swaaɔ̃ ge kwi taawa, ɔ̃ à ɛ̀a tà Sezale. Kɛ́ a gu dɔ̀, à zɔ̃̀lɛ a gĩ́naa a mɛ̀ wà mɔ ń Pɔluo. 7Kɛ́ à mɔ̀, Yuda pɔ bɔ̀ Yelusalɛũɔ lìaaazi, ɔ̃ aa yãzɔ̃ɔ pɔ wi fɔ̃ wà a seela èoɔ dɔ̀dɔwà dasi. 8Pɔlu yãzãsìmá à mɛ̀: Mi zã Yudaɔ ikoyã ge Lua ua yãwao. Mi zã yãewa Sezaaɛo. 9Fɛsɛtu lɛ́ wɛɛlɛ àɔ na ń Yudaɔ ɔ̃ à Pɔlu là à mɛ̀: Ńyɔ̃ we ǹ gɛ́ Yelusalɛũ mà yãkpalɛkɛnnɔ we yãpiɔ musua? 10Pɔlu mɛ̀: Sezaa ikoyã pɔ kũ̀ wà yãkpalɛkɛmanɔ ɔ̃ má kuu la. Mi taaekɛ Yudaeɛo, lá mpi ń dɔ̃ sãasãwa. 11Tó ma taaekɛ̀, à kà wà ma dɛɛ, má gí wà ma dɛo. Ãma lá mi yã pɔ gbɛ̃́ɛɔ lɛ́ o ma musue kɛo, gbɛ̃e zɛ́ vĩ aà ma kpamáo. Gɛa Sezaa kĩi ɔ̃ ma zɛò. 12Kɛ́ Fɛsɛtu lɛkpàaĩ ń a gbɛ̃́ɔ à mɛ̀: Sezaa n zɛò, aà kĩi ɔ̃ ńyɔ̃ gɛ́u.

Ki Agipa ń Beenisio mɔa Pɔlu yãmai

13Gɔɔpla gbɛa ki Agipa ń Beenisio mɔ̀ Sezale fɔkpai Fɛsɛtuwa. 14Kɛ́ aalɛ gɔɔplakɛ we, Fɛsɛtu bɔ̀ ń Pɔlu yão kiapiɛ à mɛ̀: Gɔ̃ɛe ku la, Felisi aà tò da kpɛ́u. 15Kɛ́ ma gɛ Yelusalɛũ, sa'onkiaɔ ń Yuda gbɛ̃zɔ̃ɔɔ bɔ̀mɛɛ ń aà yão, aa mɛ̀ ma yã na, mà yãdaaala. 16Má ònɛ́, tó gbɛ̃́ pɔ wà yãdɔ̀wà i kɔ̃'e ń a yãdɔmadeɔo, mɛ́ i zɛ'è à yãpi zãsìmáo, wá Lomadeɔ wili aà kpamáo. 17Kɛ́ aa sùmanɔ la, mi zɛzɛo. Kɛ́ a gu dɔ̀ gɔ̃̀ɔ, ɔ̃ ma zɔ̃lɛ ma gĩ́naa ma mɛ̀ wà mɔ ń gbɛ̃́pio. 18Gbɛ̃́ pɔ yã vĩaanɔpiɔ yã'ò, aai yãvãi pɔ malɛ e wa dɔwà o aà yãmusuo. 19Aa yã vĩaanɔ ń luasisizɛ yãmusu ń gbɛ̃e yão, wì mɛ Yesu. À gà, ɔ̃ Pɔlu zɛ̀ ń aà kua bɛ̃́ɛ yão. 20Ma bilikɛ̀ yãpi zɛ́ dɔ̃awa, ɔ̃ ma aà là tó a ye gɛ́ Yelusalɛũ wà yãpi gɔ̃gɔ̃ɛ̀ we. 21Ɔ̃ Pɔlu mɛ̀ Loma kia ɔ̃ a zɛò, wàɔ a kũa. Ɔ̃ ma mɛ̀ wàɔ aà dɔ̃́a e màɔ gɛ́ aà gbaɛi Sezaawa. 22Ɔ̃ Agipa ò Fɛsɛtuɛ: Má ye mà gbɛ̃́pi yãma mazĩa. Ɔ̃ Fɛsɛtu mɛ̀: Ńyɔ̃ yãma aà lɛ́u zia.

23Kɛ́ a gu dɔ̀ Agipa ń Beenisio mɔ̀ ń gawi zɔ̃ɔo, ɔ̃ aa gɛ̃̀ kɔ̃kãaakɛkpɛu ń sosaɔ gbɛ̃zɔ̃ɔɔ ń wɛ̃lɛ gbɛ̃́ gbiaɔ. Kɛ́ Fɛsɛtu lɛsì, wà mɔ̀ ń Pɔluo. 24Ɔ̃ Fɛsɛtu yãsɛ̀ à mɛ̀: Ki Agipa ń gbɛ̃́ pɔ kuwanɔ laɔ pii, a gbɛ̃́ɛ bee èa? Yuda pɔ ku Yelusalɛũɔ ń laɔ pii aa gbɛ̃́pi yã sɛ̀ mɔ̀òa, aalɛ wiilɛa aalɛ mɛ, a maa aàɔ ku lɔo. 25Mapi, mi e à yãe kɛ̀ à kà wà aà dɛo, ɔ̃ lá à zɛ̀ ń Sezaao, ma zɛò mà aà gbaɛwà. 26Mi yãpi gbá dɔ̃ mà lakɛ̃ kiaɛ aà yãmusuo. A yãi tò ma mɔaanɔ á aɛ, atɛ̃sa mpi ki Agipa, kɛ́ yãlalaawà gbɛa mà yã e mà ka láu. 27Asa dakpɛuna gbaɛamá yã pɔ wa dàaala oa wasawasa sai, i kɛmɛɛ zɛ́ vĩo.

Currently Selected:

Zĩn 25: Boo2024

Highlight

Copy