Zĩn 24

Yudaɔ fɛlɛa ń Pɔluo Sezale

1Gɔɔ sɔo gbɛa sa'onkia Anania mɔ̀ Sezale ń gbɛ̃zɔ̃ɔeɔ ń ikoyãdɔ̃na pɔ wì mɛɛ̀ Tɛɛtuluo. Aa mɔ̀ ń Pɔlu yão busu gbɛ̃zɔ̃ɔ kĩi. 2Kɛ́ wà Pɔlu sìsi, Tɛɛtulu fɛ̀lɛ àlɛ yãdaaala à mɛ̀: Felisi, ń n baaao wá busu na à kɛ̀ zai. N zia laasookɛa mɛ́ mɔ̀ ń wá kalɛa nao. 3Wì n tɔnasi wàɔ n saaukpa gupiiu gɔɔpiiɛ. 4Kɛ́ má ye mà n gagao, má wabikɛma, suuukɛwanɔ, wá yã yɔɔnaɛ ma. 5Wá è gbɛ̃́piá gbɛ̃nazĩn ebeɛ. Ì zɔada Yudaɔ guu dũniau piiɛ, a dɛ luasisizɛ ɛgɛna pɔ wì mɛ Nazalɛtideɔ dɔaanaɔ do ũɛ. 6Baa se a ye Lua ua gbãlɛɛ, ɔ̃ wa aà kũ̀. 7-8Tó n gɔ̃ɛpi làla nzĩa, ńyɔ̃ aà yã pɔ wa mɔò sĩana dɔ̃. 9Ɔ̃ Yudaɔ yã'idìa aa mɛ̀ lá yãpiɔ dɛn we.

10Ɔ̃ busu gbɛ̃zɔ̃ɔpi mikɛ̀ Pɔluɛ aà yã'o. Ɔ̃ Pɔlu mɛ̀: Lá má n dɔ̃ yãkpalɛkɛna ũ busuɛ bee guu a wɛ̃ gɛ̃̀gɛ̃, ɔ̃ malɛ a mibɔayã o ma laaiwa. 11Tó ń gbɛ̀a, wa onɛ ma gɛa Yelusalɛũ luasisii dɛ gɔɔ kuɛplalao. 12Wi ma e malɛ lɛkpaakɛ ń gbɛ̃eo Lua uao. Wi ma e malɛ zɔada luasisikpɛɔ guu ge wɛ̃lɛ guuo. 13Gbɛ̃́piɔ fɔ̃ yã pɔ aa lìamazi seelade enɛo. 14Sĩana má ònɛ, zɛ́ pɔ aalɛ mɛ luasisizɛ ɛgɛnaɛ guu ɔ̃ malɛ zɔbleu wá deziɔ Luaɛ. Má yã pɔ wa kɛ̃̀ Mɔizi ikoyã guu ń ãnabiɔ pɔɔ naai vĩ. 15Ma wɛ́ dɔ Luai lá ampiɔwa, kɛ́ gbɛ̃maaɔ ń gbɛ̃vãiɔ bɔ gau pii. 16Ayãmɛto miɔ azĩa toto gɔɔpii kɛ ma sɔ̃ su àɔ vĩ Lua aɛ ge gbɛ̃nazĩna aɛo.

17Ma wɛ̃kɛa ń ma busuo gbɛa ma ɛa ma su ma ɔdàmá ma sa'ò 18Lua ua. Kɛ́ malɛ sa'o ma gbãbɔa gbɛa, ɔ̃ wà ma le we. Mi bila kãaao, mɛ́ zɔa kuo.#Zĩn 21.26-27 19Azi busu Yudaeɔ mɛ́ yãdeɔ ũ. Sema aa mɔ wà yãbɔ kɔ̃ lɛ́u n wáa. 20Tó màa no, to gbɛ̃́ pɔ aa ku laɔ dàa pɔ aa èa gɔɔ pɔ aa yãkpalɛkɛ̀manɔ o. 21Sema yã mɛndo pɔ má ònɛ́ gbãugbãu ma mɛ̀, gɛɔ vua yãmusu ɔ̃ aalɛ yãkpalɛkɛimanɔ baasio.#Zĩn 23.6

22Felisi Yesu zɛ́ bɔɔlɛ dɔ̃, ɔ̃ à lakà Yudaɔ yãa à mɛ̀: Tó sosaɔ gbɛ̃zɔ̃ɔ Lisia mɔ̀, má á yã midɛɛ́. 23A ò sosa badeɛ aàɔ Pɔlu dɔ̃́a, ãma aà to aàli ĩampakĩi e, i to aà gbɛ̃́ɔ lí dɔaalɛ.

24Gɔɔpla gbɛa Felisi mɔ̀ ń a nɔo. Yudaɛ, wì mɛɛ̀ Dusii. À Pɔlu sìsi, ɔ̃ à Kilisi Yesu naaikɛa yãmàwà. 25Pɔlu lɛ́ yã'o maakɛa musu ń zĩakũadɔ̃o ń yãkpalɛkɛańnɔ pɔ lɛ́ mɔ́o, ɔ̃ vĩa Felisi kũ̀ à mɛ̀: Fɛlɛ ǹ ta gĩ́a. Gɔɔ pɔ ma ɔ'è, má ɛa mà n sisi. 26Aà wɛ́ dɔi Pɔlu a gbagusaɛ daɛɛ, ɔ̃ ìɔ aà sisi mɔɔmɔɔ aà mɔ faaiboanɔ. 27Kɛ́ à kɛ̀ wɛ̃̀ pla, ɔ̃ Pɔɔsiu Fɛsɛtu zɔ̃̀lɛ Felisi gbɛu. Kɛ́ Felisi ye àɔ na ń Yudaɔ yãi, ɔ̃ à Pɔlu tò da kpɛ́u.

Currently Selected:

Zĩn 24: Boo2024

Highlight

Copy