Zĩn 21

Pɔlu sua Yelusalɛũ

1Wá kɛ̃amá gbɛa wa gɛ̃ go'ilɛnau wa da zɛ́u, wa mipɛ̀ Kosuwa. Gu sìa dɔa, wa ka Lode, ɔ̃ bɔa we wa gɛ Patala. 2We wa go'ilɛna pɔ lɛ́ gɛ́ Fenisi busuu èu, ɔ̃ wa gɛ̃u wa da zɛ́u. 3Kɛ́ wa Sipi è kãaa, wá gbà ɔzɛɛ, wálɛ gɛ́ Sili busuu, ɔ̃ wa ka Tii, we wà go'ilɛna aso bɔ̀lɛu. 4Wa Yesudeɔ wɛ̀ɛlɛ, ɔ̃ wa ãsɔ̃a do kɛ̀ńnɔ. An gbɛ̃eɔ ò Pɔluɛ ń Lua Nisĩna gbãao asu gɛ́ Yelusalɛũo. 5Ãma kɛ́ gɔɔpiɔ lɛ́ pà, wa fɛlɛ, wálɛ tá. Aa gɛ̀ zɛiwɛ̃ɛ mpii ń ń naɔ ń ń nɛɔ wɛ̃nkpɛ e isialɛ. Ɔ̃ wa kulɛ wá kosowa wa wabikɛ̀. 6Kɛ́ wa lɛzàkɔ̃wa, wa gɛ̃ go'ilɛnau. Ampiɔ sɔ̃ aa ɛ̀a ń bɛ.

7Bɔa Tii wa ɛa wa da zɛ́u e wa ka Tɔlɛmai. Wa fɔkpà Yesudeɔwa wa kɛńnɔ gɔɔ do. 8Kɛ́ a gu dɔ̀, wa fɛlɛ wa gɛ Sezale, wa pila baonakpana Filipi bɛ. Gbɛ̃ɔn sopla pɔ wà ń sɛ́ yãaɔ doɛ.#Zĩn 6.5 9A nɛnɔɛ ãnabiɔ vĩ gbɛ̃ɔn siiɔ̃. 10Wa gɔɔplakɛa we guu ãnabi pɔ wì mɛɛ̀ Agabu#Zĩn 11.28 bɔ̀ Yude busuu à mɔ̀. 11Kɛ́ à mɔ̀ wá kĩi, à Pɔlu ula ba sɛ̀, à azĩa gbáɔ ń a ɔɔ yèò à mɛ̀: Lá Lua Nisĩna òn kɛ: Gbɛ̃́ pɔ baɛ bee vĩ, màa Yudaɔ aa aà ye Yelusalɛũ, aai aà kpa buipãleɔwa. 12Kɛ́ wa yãpi mà, wapiɔ ń beleɔ wa awakpà Pɔluɛ asu gɛ́ Yelusalɛũo. 13Ɔ̃ à mɛ̀: Bɔyãi álɛ ɔɔlɔ álɛ ma nɔ̀sɛ ɔ̃ɔkpamɛɛi? Asu àɔ ma yea ũ seo. Baa tó ma ga Yelusalɛũ Dii Yesu tɔ́ yãiɛ, ma sɔu mà. 14Kɛ́ wi fɔ̃ wa aà fùo, wa kãmabò wa mɛ̀: Dii pɔeã kɛ. 15Bee gbɛa wa sɔukɛ̀, ɔ̃ wa da Yelusalɛũ zɛ́u 16ń Yesude pɔ ku Sezaleeɔ. Aa gɛ̀wanɔ Sipi gbɛ̃́ Manasɔ̃ bɛ, gu pɔ wá pilau. Yesudeɛ za zi.

Pɔlu gɛa Zaki gwai

17Kɛ́ wa ka Yelusalɛũ, Yesudeɔ wá sí ń pɔnao. 18Kɛ́ a gu dɔ̀, Pɔlu gɛ̀wanɔ Zaki bɛ. Gbɛ̃zɔ̃ɔɔ kãaaa we mpii. 19Pɔlu fɔkpàmá, ɔ̃ à yã pɔ Lua kɛ̀ a zĩ musu buipãleɔ guu dàu a sìunɛ́ dodo pii. 20Kɛ́ aa yãpi mà, aa Lua saaukpà. Ɔ̃ aa òɛ̀: Wá gbɛ̃́, ni e lá Yudaɔ Yesu naaikɛ̀ gbɛ̃ɔn ɔaasɔsɔo lɛɛ ũma'ũma, mɛ́ ampii aaì kãasikɛ ikoyãwa ya? 21Wà n yã'ònɛ́ wà mɛ̀, nlɛ yãda Yuda pɔ ku buipãleɔ guuɔnɛ aa bɔ Mɔizi ikoyã kpɛ, aasu tɔ̃zɔ̃ ń nɛɔnɛo, aasu aaɔ ń fɛlɛkaayãɔ kũao. 22Wá kɛa ni? Asa aa gi n mɔa maio. 23Kɛ lá wá onɛwa. Wá guu gbɛ̃ɔn siiɔ̃eɔ lɛkɛ̀ Luawa.#Nao 6.21 24Ǹ ń sɛ́ à gɛ́ gbãbɔ ázĩaɛ, ní ń fĩabo aa mibo, gbɛ̃pii iɔ dɔ̃ kɛ́ yã pɔ wa mà n musuá sĩana no. Aai e mpi sɔ̃ ń tɛ́ Mɔizi ikoyãi. 25Buipãle Yesudeɔ sɔ̃, wa lakɛ̃̀nɛ́ wa mɛ̀ wa zɛò aa laaika sa'onɔɔi ń kpàao ń nɔ̀ɔ kolokpasai soao ń gbãsĩkɛao.#Zĩn 15.29

26Ɔ̃ Pɔlu gbɛ̃́piɔ sɛ̀ tàńnɔ. Kɛ́ a gu dɔ̀, aa gbãbɔ̀ ńzĩaɛ, ɔ̃ à gɛ̃̀ Lua ua, à gbãbɔ laagɔɔ sa pɔ wa o an baadeɛ yã'ò.

Pɔlu kũa

27Kɛ́ gbãbɔa gɔɔ soplapi kà laaa, Azi busu Yudaeɔ Pɔlu è Lua ua. Aa tɛkpà bilagu, ɔ̃ aa aà kũ̀. 28Aalɛ wiilɛ aalɛ mɛ: Isailiɔ, à wá leò. Gbɛ̃́ɛ bee mɛ́ ìɔ yãda gbɛ̃piiɛ gupiiu, ì Isailiɔ awiambɔ ń Mɔizi ikoyão ń guɛ beeo. Bee gbɛa à dɔ̀ɛ Lua uawa lɔ, à gɛ̃̀u ń Gɛlɛkiɔ. 29Aa ò màa kɛ́ aa Ɛfɛsɛ gbɛ̃́ Tɔfiũ#Zĩn 20.4 è ń Pɔluo wɛ̃lɛ guu yãa yãiɛ, ɔ̃ aalɛ e Pɔlu gɛ̃̀aanɔ Lua uaɛ.

30Wɛ̃lɛ lòo, ɔ̃ wà wì ń bao gupiiu, wà mɔ̀ Pɔlu kũ̀ Lua ua, wà aà gàlɛ wà bɔ̀ò. Wegɔ̃ɔ wà a gbaɔ tàta. 31Kɛ́ aa ye wà aà dɛ, yãpi bao Loma sosaɔ gbɛ̃zɔ̃ɔ lè, a mà Yelusalɛũ lòo. 32Wegɔ̃ɔ à sosa badeɔ sɛ̀ ń sosanɛɔ, ɔ̃ aa gɛ̃̀má ń bao. Kɛ́ gbɛ̃́ɔ sosaɔ gbɛ̃zɔ̃ɔpi è ń sosaɔ sãnu, aa Pɔlu gbɛ̃a tò. 33Ɔ̃ gbɛ̃zɔ̃ɔpi sɔ̃̀ Pɔluzi, à aà kũ̀ à mɛ̀, wà aà ye ń mɔdaonaɔ mɛn pla. À ń lá à mɛ̀: Dén gbɛ̃́pi ũi? Bɔ́ yã a kɛ̀i? 34Ɔ̃ bila guu gbɛ̃́ɔ lɛ́ wiilɛ wàlɛ kɔ̃yãmao. Kɛ́ zɔa tò gbɛ̃zɔ̃ɔpi lɛ́ yã susu mao, ɔ̃ à mɛ̀ wà gɛ́aanɔ sosaɔ bɛ. 35Kɛ́ wà kàaanɔ dɛdɛkĩi, sosaɔ mɛ́ sù aa aà sɛ̀ dasi nɔnɔaaa yãi. 36Asa gbɛ̃pii tɛaazi ń wiio, aalɛ mɛ: À aà dɛ.

Pɔlu yã'oa Yelusalɛũdeɔnɛ

37Kɛ́ wa ye gɛ̃ ń Pɔluo sosaɔ bɛ, ɔ̃ à gbɛ̃zɔ̃ɔpi là à mɛ̀: Ńyɔ̃ we mà yã'onɛ́a? Ɔ̃ a òɛ̀: Ni gɛlɛkiyãmaa? 38Egipi gbɛ̃́ pɔ fɛ̀lɛ ń gbãadeɔ zĩ́azĩa à gɛ̀ gbáau ń busudɛnaɔ gbɛ̃ɔn ɔaasɔsɔo lɛɛ siiɔ̃n n ũo lò? 39Pɔlu wèwà à mɛ̀: Yudan ma ũ. Wà ma i Taasu, Silisi busuuɛ. Wɛ̃lɛ tɔsaide no. Ma wabikɛ̀ma, ma gba zɛ́ mà yã'onɛ́. 40À aà gbà zɛ́, ɔ̃ Pɔlu zɛ̀ dɛdɛkĩiwa, à ɔkɛ̀nɛ́. Kɛ́ aa nìlɛ kílikili, ɔ̃ à yã'ònɛ́ ń hɛbɛluyão à mɛ̀:

Currently Selected:

Zĩn 21: Boo2024

Highlight

Copy