Zĩn 20

Ɛtiki bãɛa fenɛtiu

1Kɛ́ zɔa làa, Pɔlu Yesudeɔ kã̀aa à ń gbá sɔ̃, à lɛzàmá, ɔ̃ à gɛ̀ Masedoni. 2Kɛ́ àlɛ pã busupia, à gbɛ̃́ɔ gbà sɔ̃̀ ń yãɔ dasi e à gɛ̀ kàò Gɛlɛsi, 3ɔ̃ à mɔ aaɔ̃ kɛ̀ we. Kɛ́ àlɛ gɛ́ gɛ̃i go'ilɛnau à ta Sili busuu, a mà Yudaɔ lɛkpàaĩazi, ɔ̃ à zɛ̀ò à ɛa tá ń Masedonioɛ. 4Gbɛ̃́ pɔ gɛ̀aanɔɔ tɔ́n kɛ: Bele gbɛ̃́ Pilusi nɛ Sɔpatɛɛ ń Tɛsalonideɔ Alisaka ń Sɛkɔ̃duo ń Dɛɛbɛ gbɛ̃́ Gaiusio ń Timɔteo ń Azi busu gbɛ̃́ɔ, Tisiki ń Tɔfiũo. 5Gbɛ̃́ beeɔ dɔ̀aa gɛ̀, aalɛ wá dã Toloasi. 6Wapiɔ sɔ̃, Kaaso dikpɛ gbɛa wa gɛ̃ go'ilɛnau Filipi, ɔ̃ gɔɔ sɔo gbɛa wa ń lé Toloasi. We wa ãsɔ̃a do dɛ̀u.

7Ãsɔ̃anɛnzĩ wa kɔ̃kã̀aa wà Dii dɔngubɔ ble. Pɔlu lɛ́ waasokɛnɛ́, a ye ta tó gu dɔ̀ɛ, ɔ̃ à dà yãa e wɛɛdo. 8Filiaɔ dasi kpɛ́ lɛsĩ pɔ wá kãaaaupiu. 9Ɛwaasoe zɔ̃lɛa fenɛtiu, wì mɛɛ̀ Ɛtiki, àlɛ igofampa. Kɛ́ Pɔlu waasokɛa kɛ̀ gbã̀a, i aà lɛ̀, ɔ̃ à bɔ̀ za kpɛdiakɔ̃api aaɔ̃de fenɛtiu à lɛ̀lɛ, ɔ̃ wà aà sɛ̀ gɛ̀. 10Ɔ̃ Pɔlu pìla à kùsiwà, ɔ̃ à aà sɛ̀ a kpà a kuɛ à mɛ̀: Ásu gilikɛo, a bɛ̃́ɛ. 11Kɛ́ à ɛ̀a dɛ̀dɛ musu, wa Dii dɔngubɔ blè. Pɔlu yã'ò maamaa e gu gɛ̀ dɔ̀ò, ɔ̃ à dà zɛ́u. 12Ɔ̃ wà tà ń ɛwaasonapio bɛ̃́ɛ, gbɛ̃́ɔ nɔ̀sɛ nìni a dɛ beeao.

13Wapiɔ sɔ̃ wa gɛ gɛ̃ go'ilɛnau, wa dɔaa Pɔluɛ Asosi, wɛ̃lɛ pɔ wá aà sɛu. Màa à zɛ̀ò, asa a ye gɛ́ we kɛsɛɛ. 14Kɛ́ à wá lé Asosi, ɔ̃ wa aà sɛ̀ wa gɛ Mitilɛni. 15Kɛ́ a gu dɔ̀, wa bɔ we ń go'ilɛnao, wa gɛ Kiosi. Gu sìa dɔa, wa gɛ Samɔ, a gɔɔ aaɔ̃de ɔ̃ wa ka Milɛti. 16Pɔlu zɛ̀ò yãa à dɔ Ɛfɛsɛzi, kɛ́ gɔɔ su gɛ̃wa Azi busuuo yãi, asa àlɛ wã à e ka Yelusalɛũ e Pãteko dikpɛ àɔ kaɛ, tó a zɛkɛ̀.

Pɔlu lɛzaa Ɛfɛsɛ gbɛ̃zɔ̃ɔɔwa

17Pɔlu gbɛ̃́ɔ zĩ̀ gbɛ̃zɔ̃ɔɔwa Ɛfɛsɛ, à mɛ̀ aa mɔ Milɛti. 18Kɛ́ aa kà, ɔ̃ a ònɛ́: Á dɔ̃ lá mi kɛ gɔɔ pɔ má kuanɔ za zĩ́ pɔ ma gbapɛ̀lɛ Azi busuula. 19Ma zĩkɛ̀ Diiɛ ń zĩabusaao ń wɛ'io. Ma taasikɛ̀ lɛ́ pɔ Yudaɔ kpàaĩmaziɔ yãi. 20Mi kãfĩa yãe ulɛɛ́o, ma waasokɛ̀ɛ́, má dàdaɛ́ balu guu ń á bɛɔ. 21Ma lɛdà Yudaɔwa ń Gɛlɛkiɔ pii aa zɛ ń Luao, aai wá Dii Yesu naaikɛ. 22Tiasa malɛ gɛ́ Yelusalɛũ, lá Lua Nisĩna ma dauwa, yã pɔ a ma le we dɔ̃sai. 23Wɛ̃lɛ ń wɛ̃lɛo Lua Nisĩna lɛ́ omɛɛ, yea ń mɔdaonao ń wɛtɛ̃ao lɛ́ ma dã. 24Ãma ma wɛ̃ni gbiamɛɛ lɔo, sema mà yã pɔ malɛ yá le, mà zĩ pɔ Dii Yesu dàmɛɛ kɛ mà a midɛ. Ɔ̃mɛ Lua gbɛ̃kɛ baokpaanɛ́ ũ.

25Á gbɛ̃́ pɔ ma bɛbɛ á guu, ma kia pɔ Lua kpà yã waasokɛ̀ɛ́ɔ, má dɔ̃ tiasa kɛ́ wá wɛsikɔ̃lɛ lɔo. 26Ayãmɛto má òɛ́ za gbã, tó á gbɛ̃e su vũaa, ma yãn bee ũ lɔo. 27Ma Lua pɔeã pii òɛ́, mi a kee ulɛɛ́o. 28À laaidɔ ázĩawa ń kpàsa pɔ Lua Nisĩna á dilɛ a dãnaɔ ũo pii. À Lua gãlide pɔ à ń bó ń azĩa auopiɔ gwa. 29Má dɔ̃ kɛ́ ma taa gbɛa awalɛwan pãsĩɔ siágu, aaɔ sãɔ wɛ̃na vĩ sɔ̃o. 30Baa á gbɛ̃eɔ fɛlɛ aa yã kolea danɛ́, aa gbɛ̃́ɔ ga wà namá. 31Ayãmɛto à itɛ̃kɛ. Lá ma lɛdà á baadewa ń wɛ'io gwãasĩna ń fãanɛo e wɛ̃̀ aaɔ̃ kãmabosai, a yã àɔ dɔágu.

32Tiasa malɛ á na Luaɛ a ɔzĩ ń a gbɛ̃kɛyã pɔ a fɔ̃ gbãa kãfĩɛ́o, i á gba zɛ́ á baa àɔ daaa ń a gbɛ̃́ɔ pii. 33Mi gbɛ̃e ɔ̃a ge aà pɔkasae nidɛo. 34Á dɔ̃ ázĩawa, kɛ́ ma zĩkɛ̀ ń mazĩa ɔoɛ, ɔ̃ ma pɔ pɔ wálɛ a nidɛ ń ma gbɛ̃́ɔ è. 35Má ɔlɔ̀ɛ́ yãpii guu àli zĩkɛ màa, í dɔ yɛ̃ɛɛsaideɔlɛ. Yã pɔ Dii Yesu ò àɔ dɔágu à mɛ̀, gbadaa pɔna vĩ dɛ gba'eala.

36Yãpi oa gbɛa à kùlɛ a kosowa, aa wabikɛ̀ sãnu. 37Aa wɛ'ikàu mpii, aa Pɔlu kpàkpa ń kuɛ, aa lɛpɛ̀pɛwà. 38Yã pɔ an pɔ siakũ̀ zɔ̃ɔ mɛ́ dɛ kɛ́ à mɛ̀ ń wɛ́ a sikɔ̃lɛ lɔo ũ. Ɔ̃ aa gɛ̀ zɛiɛ̀ e go'ilɛna kĩi.

Currently Selected:

Zĩn 20: Boo2024

Highlight

Copy