Zĩn 19

Pɔlu kua Ɛfɛsɛ

1Gɔɔ pɔ Apolo ku Kɔlɛni, Pɔlu Azi busu sĩ̀sĩɔ baavĩ̀, ɔ̃ à kà Ɛfɛsɛ. À Yesudeeɔ lè we, 2ɔ̃ à ń lá à mɛ̀: Kɛ́ a Dii naaikɛ̀, aà Nisĩna dìɛ́a? Aa wèwà aa mɛ̀: Aawo, wi aà Nisĩna kua yãma seo. 3Ɔ̃ à ń lá à mɛ̀: Da'ilɛ kpele á kɛ̀i? Aa wèwà aa mɛ̀: Zãa pɔɛ. 4Ɔ̃ Pɔlu ònɛ́: Zãa gbɛ̃́ɔ da'ilɛkɛ̀ an nɔsɛlilɛa seela ũɛ. A ò gbɛ̃́ɔnɛ aa gbɛ̃́ pɔ a mɔ a kpɛ naaikɛ.#Luk 3.16 Yesu àlɛ o. 5Kɛ́ aa yãpi mà, aa da'ilɛkɛ̀ ń Dii Yesu tɔ́o. 6Kɛ́ Pɔlu ɔnàmá, Lua Nisĩna dìnɛ́, ɔ̃ aa yãebui'ò, aa ãnabikɛkɛ̀. 7Gbɛ̃́piɔ kà pii lan gbɛ̃ɔn kuɛpla taawa.

8Pɔlu ìɔ gɛ́ luasisikpɛu e mɔ aaɔ̃. À yã'ònɛ́ a laaiwa, àlɛ waasokɛ kia pɔ Lua kpà yãmusu, a ye aa a yãzɛ'e. 9Ãma an gbɛ̃eɔ swãgbãakɛ̀, aai Lua yãsio, ɔ̃ aa zɛ́pi bɛ̃ɛbò dasi guu. Ɔ̃ Pɔlu gbɛ̃́ pɔ Yesu naaikɛ̀ɔ sɛ̀lɛ aa bɔ̀lɛ ń guu. Ɔ̃ ìɔ waasokɛnɛ́ Tilanu kyokpɛu lagulɛdɔ. 10A kɛ̀ màa e wɛ̃̀ pla, ɔ̃ Azi busudeɔ Dii yãmà, Yudaɔ ń Gɛlɛkiɔ pii.

Seva nɛɔ

11Lua Pɔlu gbà zɛ́ à dabudabu bɔnsaɛɔ kɛ̀. 12Beewa baa tó wà isimawaabɔɔ ge fùaɔ nà Pɔlu mɛwa wà gɛ wà nà gyãeɔwa, aaì gbãgbãɛ, an tãaɔ ì gɛ̃zɛa. 13Yuda tãagona pɔ aaìɔ bɛbɛeɔ wɛ̀ɛlɛ wà tãago ń Dii Yesu tɔ́o aa mɛ̀: Wá òɛ́ ń Yesu pɔ Pɔlu ì aà yã waasokɛ tɔ́o, à go. 14Yudaɔ sa'onkia pɔ wì mɛ Seva nɛgɔ̃ɛ gbɛ̃ɔn soplaɔ aamɛ aaì kɛ màa. 15Ɔ̃ tãa ònɛ́: Má Yesu dɔ̃ mɛ́ ma Pɔlu baomà. Apiɔ sɔ̃, deɔn á ũi? 16Ɔ̃ tãadepi kùsimá à gbãamɔ̀nɛ́, à ń kwɛ́ mpii à ń kɛkɛ'ĩa, ɔ̃ aa baalɛ̀ bɔ̀lɛ uapiu puizi. 17Kɛ́ Ɛfɛsɛdeɔ yãpi mà, Yudaɔ ń Gɛlɛkiɔ pii, vĩa ń kṹ, ɔ̃ Dii Yesu tɔbɔ̀ maamaa. 18Ɔ̃ gbɛ̃́ pɔ aa Yesu naaikɛ̀ɔ mɔ̀ dasidasi, aalɛ ń yãkɛaɔ o gupuau. 19Gbɛ̃kɔɔlɛkɛnaeɔ ń taalaɔ nàaa aa mɔ̀ wa kàtɛu bila wáa. Kɛ́ wà lápiɔ ɔ̃a dɔ̀dɔ, wa è à kà ãnusu ɔwatɛ̃ ɔaasɔsɔo lɛɛ blakwi (50 000). 20Beewa ɔ̃ Dii yã ìɔ kãfĩ, ìɔ ɔta ń gbãao.

Zɔakaa Ɛfɛsɛ

21Yã bee gbɛa Pɔlu zɛ̀ò a nɔ̀sɛ guu à bɔlɛ ń Masedoni busuo ń Gɛlɛsi busuo, i gɛ́ Yelusalɛũ à mɛ̀: Tó ma gɛ we, sema mà gɛ́ Lomadeɔ gwai. 22Ɔ̃ à a dɔnlɛde gbɛ̃ɔn plaeɔ Timɔte ń Elasao zĩ̀ Masedoni. Aapi sɔ̃ à gɔ̃̀ Azi busuu gĩ́a.

23Gɔɔ bee ɔ̃ yãkele fɛ̀lɛ maamaa Dii zɛ́ yãmusu. 24Ãnusupinae ku wì mɛɛ̀ Demɛtiu, ì Aatɛmi tãakpɛ taa pí ń ãnusuo. Aà zĩkɛnaɔ ì ài zɔ̃ɔ e zĩpiwa. 25Ɔ̃ à ń kãaa ń zĩbeetaakɛnaɔ, a ònɛ́: Gbɛ̃́ɔ, á dɔ̃ kɛ́ ɔzĩɛ bee mɛ́ wá blekĩi ũ. 26Álɛ e mɛ́ álɛ ma lá Pɔlupi lɛ́ kɛ à mɛ̀: Tãa pɔ wà ń píɔá luaɔ no. Ɔ̃ à dasi mi lìaa, wà aà yãzɛ'è. I kɛ Ɛfɛsɛ la ado no, ń Azi busuo piiɛ. 27Yã bee a fɔ̃ musi'iwɛ̃ɛ. I kɛ wá ɔzĩ mɛ́ a yãfũnkũ adoo, a yã a to tãa nɔɛzɔ̃ɔ Aatɛmi kpɛ́ gɔ̃ pɔe ũo, tãa pɔ Azi busudeɔ ń dũnia gbɛ̃piio ì kulɛɛ̀pi gawi a laaɛ.

28Kɛ́ aa yãpi mà, an pɔ pà, ɔ̃ aa nà wiiwa aalɛ mɛ: Ɛfɛsɛdeɔ Aatɛmi zɔ̃ɔ. 29Wɛ̃lɛ lòo, wà baalɛ̀ wàlɛ si kɔ̃kãaakɛkĩiu, ɔ̃ wà Masedoni busu gbɛ̃ɔn plaɔ Gaiusi ń Alisaka pɔ aaì gɛ́ wɛ̃lɛu ń Pɔluoɔ kũ̀kũ wà gɛ̀ńnɔ. 30Pɔlu ye gɛ̃ zã guu, ɔ̃ Yesudeɔ i weiɛ̀o. 31Azi busu gbɛ̃zɔ̃ɔeɔ dɛ aà gbɛ̃naɔ ũ, ɔ̃ aa gbɛ̃́ɔ zĩ̀, aa lɛdàwà asu gɛ̃ zãuo. 32Kɔ̃kãaa yà, wàlɛ wiilɛ, wàlɛ kɔ̃yãmao, asa gbɛ̃́ daside dɔ̃ bɔyãi wà kã̀aaio. 33Yudaɔ ɔzɔ̃̀ Alɛsandazi aà yã'o, ɔ̃ bila guu gbɛ̃eɔ lɛ́ lɛdɔdɔwà. Alɛsandapi ɔkɛ̀nɛ́ aa nilɛ, a ye Yudaɔ misi bila wáa. 34Kɛ́ wà aà dɔ̃̀ Yuda ũ, ɔ̃ ampii aa wiilɛ̀ sãnusãnu mɔ̀ pla taawa aa mɛ̀: Ɛfɛsɛdeɔ Aatɛmi zɔ̃ɔ.

35Kɛ́ wɛ̃lɛ gbɛ̃zɔ̃ɔ ń zɔa zɛ̀ ɔ̃ à mɛ̀: Ɛfɛsɛdeɔ, gbɛ̃pii dɔ̃ kɛ́ ámɛ á tãa zɔ̃ɔ Aatɛmi kpɛ́ ń gbɛ pɔ bɔ̀ musuo dɔ̃anaɔ ũ. 36Lá gbɛ̃e a fɔ̃ bɔ bee kpɛo, à ázĩa kũ tɛɛɛ. Ásu yãe kɛ ń nɔnwãaoo. 37A mɔ ń gbɛ̃́ɛɔ la, aai ɔkã wá tãakpɛ pɔewao, aai wá tãa tɔbɛ̃ɛsio. 38Ayãmɛto tó Demɛtiu ń a zĩkɛnaɔ yã vĩ ń gbɛ̃eo, yãkpalɛkɛgɔɔɔ ku ń yãkɛkɛnaɔ. Aa gɛ kɔ̃ gbɛa we. 39Tó á yãpãle vĩ lɔ, wa gɔ̃gɔ̃ɛ́ kɔ̃kãaa pɔ gbãadeɔ gbɛ̀a guu. 40Asa wa gí wá taae'ei zɔa pɔ wá kà gbã yãmusuo. Wá yãzɛde e wà o zɔapi musuo, asa a gbá vĩo. Yãpi oa gbɛa ɔ̃ à gbɛ̃́ɔ gbàɛ.

Currently Selected:

Zĩn 19: Boo2024

Highlight

Copy