Zĩn 18

Pɔlu gɔɔplakɛa Kɔlɛni

1Bee gbɛa Pɔlu bɔ̀ Atɛni à gɛ̀ Kɔlɛni. 2À kpàaũ ń Yudaeo we, Pɔ̃ntu busu gbɛ̃́ pɔ wì mɛɛ̀ Akilasi ń a na Pisilio. Aa sù ń Itali busuo dafu, kɛ́ Sezaa Kolodi dìlɛ Yudaɔnɛ aa bɔlɛ Loma yãi. Pɔlu gɛ̀ ń kĩi, 3ɔ̃ à pìlamá, àlɛ zĩkɛńnɔ, kɛ́ ɔzĩdoũkɛnaɔn ń ũ yãi. Asa zwãakpɛkɛnaɔn ń ũ mpii. 4Kãmabogɔɔ pii ì waasokɛ luasisikpɛu, a ye Yudaɔ ń Gɛlɛkiɔ a yãzɛ'e.

5Kɛ́ Silivɛ̃ ń Timɔteo bɔ̀ Masedoni busuu aa kà, waasokɛa ɔ̃ Pɔlu zɛ̀ò ado, àlɛ o Yudaɔnɛ wasawasa Yesu mɛ́ Mɛsi ũ. 6Kɛ́ Yudaɔ ĩisɛ̀aanɔ aa aà sɔ̃̀sɔ̃, ɔ̃ à a pɔkasaɔ kpòɛńla à mɛ̀: Yã pɔ á kɛ̀ wí á musu, ma yãn we lɔo. Za tia má gɛ́ buipãleɔ kĩiɛ. 7Bɔa we à gɛ̀ pìla buipãle luasisina pɔ wì mɛɛ̀ Titiu Yusitu bɛ luasisikpɛpi saɛ. 8Luasisikpɛ gbɛ̃zɔ̃ɔ Kilisipu Dii naaikɛ̀ ń a bɛdeɔ pii. Kɔlɛnideɔ Pɔlu yãmà dasi, ɔ̃ aa Yesu naaikɛ̀, aa da'ilɛkɛ̀. 9Gwãasĩna Dii ò Pɔluɛ iu à mɛ̀: Nsu to vĩa n kũo, nsu kãmabo ń yã'oanɛ́oo, 10asa gbɛ̃́ pɔ dɛ ma pɔ ũ wɛ̃lɛɛ bee guuɔ dasi. Má kunnɔ, gbɛ̃e a n kũ à ĩadamao. 11Ɔ̃ Pɔlu wɛ̃̀ do ń mɔ sooloo kɛ̀ we, ìɔ Lua yãdanɛ́.

12Gɔɔ pɔ Loma gbɛ̃́ Galiɔ̃ dɛ Gɛlɛsi busu gbɛ̃zɔ̃ɔ ũ, Yudaɔ lɛdoũkɛ̀ Ɔ aa ãnà Pɔluwa, aa gɛ̀aanɔ yãkpalɛkɛkĩi 13aa mɛ̀: Gbɛ̃́ɛ bee lɛ́ tɛkpa gbɛ̃́ɔgu aaɔ luasisiyã pɔ pãa wá ikoyãla kũaɛ. 14Kɛ́ Pɔlu ye yã'o, ɔ̃ Galiɔ̃ ò Yudaɔnɛ à mɛ̀: Yudaɔ, tó dàae ge tàae zɔ̃ɔeɛ yãa, à kũ̀ mà mɛnakɛánɔ. 15Lá álɛ yãkeletã tɔ́ɔ yãmusu ń ázĩa ikoyão, à gɔ̃̀ á yã ũɛ. Ma gi yã bee taa gɔ̃gɔ̃iɛ. 16Ɔ̃ à ń yá à ń bɔlɛ yãkpalɛkɛkpɛu. 17Ɔ̃ wà ãnà luasisikpɛ gbɛ̃zɔ̃ɔ Sɔsɛniwa mpii, wà aà gbɛ̃̀gbɛ̃ yãkpalɛkɛkpɛ kpɛɛlɛ we. Galiɔ̃ i lɛdauo.

18Pɔlu gɔɔplakɛ̀ Kɔlɛni lɔ, ɔ̃ à lɛzà Yesudeɔwa à gɛ̃̀ go'ilɛnau, àlɛ ta Sili busuu. Pisili ń Akilasio gɛ̀aanɔ. À mibò Sãkele lɛ́ pɔ a kɛ̀ Luawa yãi.#Nao 6.18 19Kɛ́ aa kà Ɛfɛsɛ, Pɔlu Pisili ń Akilasio tò we. À gɛ̀ luasisikpɛu à waasokɛ̀ Yudaɔnɛ, 20ɔ̃ aa wabikɛ̀wà aà gɔɔplakɛńnɔ. I weio, 21ãma kɛ́ àlɛ lɛzamá à mɛ̀: Tó Lua wèi, má ɛa mà mɔ á gwai. Ɔ̃ à bɔ̀ Ɛfɛsɛ ń go'ilɛnao. 22Kɛ́ à kà Sezale, à gɛ̀ fɔkpà Yesudeɔwa Yelusalɛũ, ɔ̃ à tà Antiɔsi. 23Kɛ́ à gɔɔplakɛ̀ we, à ɛ̀a dà zɛ́u, à gɛ̀ wɛ̃lɛ ń wɛ̃lɛo Galati busuu ń Filizi busuo, à Yesudeɔ gbà gbãa mpii.

Apolo

24Yudae ku, aà tɔ́n Apolo, Alɛsãndi gbɛ̃́ɛ. Aà lɛ́ na mɛ́ a Lua yã dɔ̃ maamaa. 25Wà Dii zɛ́ yãdàdaɛ̀, ɔ̃ Yesu yã'oanɛ́ aà kãsì. Ì dadanɛ́ a zɛ́wa, ãma Zãa gbɛ̃́ɔ da'ilɛkɛa ɔ̃ a dɔ̃. À mɔ̀ Ɛfɛsɛ, 26ɔ̃ à nà yã'oawa luasisikpɛu vĩasai. Kɛ́ Pisili ń Akilasio aa aà yãmà, ɔ̃ aa aà sìsi aa Lua zɛ́ bɔɔlɛkɛ̀ɛ̀ wasawasa. 27Kɛ́ Apolo ye ta Gɛlɛsi busuu, Yesudeɔ aà gbà sɔ̃̀, ɔ̃ aa lakɛ̃̀ Yesude pɔ ku weɔnɛ aa aà kũ ɔplapla. Kɛ́ à kà we, à ɔdà gbɛ̃́ pɔ Lua gbɛ̃kɛkɛ̀nɛ́ aa Yesu naaikɛ̀ɔwa maamaa. 28Asa aà yã Yudaɔ wɛ̃̀ dasi wáa maũmaũ, a ɔlɔ̀nɛ́ luayãtaalau kɛ́ Yesu mɛ́ Mɛsi ũ.

Currently Selected:

Zĩn 18: Boo2024

Highlight

Copy