Zĩn 14

Pɔlu ń Baanabao kua Ikɔniu ń Lisitao

1Aa kɛ̀ Ikɔniu lá aaì kɛwa, aa gɛ̃̀ Yudaɔ luasisikpɛu aa yã'ò e Yudaɔ ń buipãleɔ Dii naaikɛ̀ dasidasi. 2Ɔ̃ Yuda pɔ aa gì yãpi siiɔ buipãleɔ swãfɛ̃̀ Yesudeɔnɛ, aa ĩisɛ̀ńnɔ. 3Ń beeo Pɔlu ń Baanabao gɔɔplakɛ̀ we, aa yã'ò vĩasai daa Dii gãu, ɔ̃ Dii ń gbá zɛ́ an yãbɔnsaɛkɛaɔ ń ń dabudabukɛaɔ a gbɛ̃kɛ yã pɔ aalɛ onɛ́ sĩana pìliwanɛ́. 4Ɔ̃ wɛ̃lɛdeɔ kɔ̃kpaalɛ̀, gbɛ̃eɔ zɛ̀ ń Yudaɔ, gbɛ̃eɔ ń zĩnaɔ. 5Ɔ̃ Yudaɔ ń buipãleɔ ń ń gbãadeɔ zɛ̀ò wà ĩadamá wà ń papa ń gbɛo. 6Kɛ́ Pɔlu ń Baanabao ń yã dɔ̃̀, ɔ̃ aa baasì, aa tà Likaoni busu wɛ̃lɛɔu, Lisita ń Dɛɛbɛo ń a zɔ̃ɛwiaɔ. 7Ɔ̃ aa gì aalɛ baonapi kpanɛ́ we.

8Gɔ̃ɛe ku Lisita, aà gbáɔ imia. Wà aà ì ɛɛ ũɛ, i taa'oo. 9Àlɛ swãkpa Pɔlu yãi, ɔ̃ Pɔlu wɛpɛ̀wà soee, a è aà Yesu naaikɛa kà à aà gbãgbã, 10ɔ̃ a òɛ̀ gbãugbãu: Fɛlɛ ǹ zɛ n gbáwa. Ɔ̃ à vĩ̀ zɛ̀, à bɔ̀ ń táo. 11Kɛ́ bila è lá Pɔlu kɛ̀, ɔ̃ aa kã̀aa wiiwa ń likaoniyão aa mɛ̀: Tãaɔ lì gbɛ̃nazĩnaɔ ũ aa pìlawá. 12Aa tɔkpà Baanabaɛ Zupitɛɛ, Pɔlu sɔ̃ Mɛɛkiu#14.12 An tãaɔ tɔ́ɔn we kɛ́ ɔ̃mɛ ì dɔaa ń yã'oao yãi. 13Zupitɛɛpi kpɛ́ ku wɛ̃nkpɛ, ɔ̃ aà gbagbana mɔ̀ ń zuswana pɔ à lavu zãblèmáɔ wɛ̃lɛ bĩibɔlɛu. A ye dasi mɔ́ wà sa'o zĩnaɔwa.

14Kɛ́ Baanaba ń Pɔluo yãpi mà, aa ń ulaɔ gà wa kɛ̃̀kɛ̃, ɔ̃ aa sì dasi guu ń wiio 15aalɛ mɛ̀: Gbɛ̃́ɔ, bɔyãi álɛ kɛ beewai? Gbɛ̃nazĩnaɔn wá ũ sɔ̃ lááwa. Baona wálɛ kpaɛ́, kɛ́ à kpɛli pɔgianapiɔnɛ, í zɛ ń Lua bɛ̃́ɛo. Ɔ̃mɛ musu ń tɔɔlɛo ń isiao ń pɔ pɔ ku ń guuɔ kɛ̀ pii.#Bɔa 20.11; Soũ 146.6 16À bui pii tò yãa, aa ńzĩa zɛ́ sɛ̀. 17Ń beeo à azĩa ɔlɔ̀nɛ́ maakɛa guu. Ì to lou maɛ́ à pɔkɛkɛ a gɔɔwa. Ì á gba blɛ àɔ ku pɔna guu. 18Baa ń yãpi oao, dɛ̃ɛ ń dɛ̃ɛo ɔ̃ aa gì gbɛ̃́ɔnɛ aa sa'omá.

19Ɔ̃ Yudaɔ bɔ̀ Antiɔsi ń Ikɔniuo, aa mɔ̀ aa bila swãfɛ̃̀. Ɔ̃ aa Pɔlu pàpa ń gbɛo ɔ̃ aa aà gàlɛ bɔ̀ò wɛ̃nkpɛ, aalɛ e à gàɛ. 20Kɛ́ Yesudeɔ kã̀aaaazi, ɔ̃ à fɛ̀lɛ gɛ̃̀ wɛ̃lɛ guu. Kɛ́ a gu dɔ̀, aapi ń Baanabao aa gɛ̀ Dɛɛbɛ.

Zĩnaɔ taa Antiɔsi

21Kɛ́ aa baonakpànɛ́ wɛ̃lɛpiu, aa gbɛ̃́ɔ è dasi. Ɔ̃ aa ɛ̀a gɛ̀ Lisita ń Ikɔniuo ń Antiɔsio, 22aalɛ Yesudeɔ gba gbãa, aalɛ lɛdamá aa wɛtã Yesu naaikɛawa aa mɛ̀: Sema wà taasikɛ maamaa, wí gbasa wà gɛ̃ kpala pɔ Lua kpà guu. 23Aa gbɛ̃zɔ̃ɔɔ dìlɛdilɛnɛ́ wɛ̃lɛ ń wɛ̃lɛo, ɔ̃ aa wabikɛ̀nɛ́ ń lɛyeo, aa ń ná Dii pɔ aa aà naaikɛ̀ ɔzĩ.

24Kɛ́ aa pã̀ Pisidi busua, aa kà Pamfili busuu. 25Aa Lua yã'ò Pɛɛga, ɔ̃ aa gɛ̀ Atali. 26We aa gɛ̃̀ go'ilɛnau aa tà Antiɔsi, gu pɔ wà ń náu Luaɛ a ɔzĩ yãa, aà gbɛ̃kɛkɛnɛ́ zĩ pɔ aa kɛ̀ aa làa tia yãmusu. 27Kɛ́ aa kà, aa Yesudeɔ kã̀aa aa yã pɔ Lua kɛ̀nɛ́ ònɛ́ pii, lá à buipãleɔ gbà zɛ́ aa a naaikɛ̀. 28Ɔ̃ aa gɔɔplakɛ̀ńnɔ we.

Currently Selected:

Zĩn 14: Boo2024

Highlight

Copy