Zĩn 13

Baanaba ń Sɔluo zĩa

1Ãnabiɔ ń yãdanɛdeɔ ku Antiɔsi Yesudeɔ guu, an tɔ́ɔn kɛ: Baanaba ń Simɛɔ pɔ wì mɛ Báasiao ń Silɛni busu gbɛ̃́ Lusiuo ń Manaɛ pɔ nɛblè ń ki Helodio sãnuo ń Sɔluo. 2Gɔɔ pɔ aalɛ Dii sisi ń lɛyeo, Lua Nisĩna mɛ̀: À Baanaba ń Sɔluo dilɛ ńdoa zĩ pɔ ma ń sɛ́wa yãi. 3Kɛ́ aa lɛyè, aa wabikɛ̀, ɔ̃ aa ɔnàmá, aa ń gbaɛ, ɔ̃ aa dà zɛ́u.

4Kɛ́ Lua Nisĩna Baanaba ń Sɔluo zĩ̀ màa, aa gɛ̀ Sɛlusi. Za we aa gɛ̃̀ go'ilɛnau aa gɛ̀ Sipi busuu. 5Kɛ́ aa kà Salamisi, aa Lua yã waasokɛ̀ Yudaɔ luasisikpɛɔ guu. Zãa Maaku kuńnɔ dɔnlɛde ũ. 6Aa isia gũgũnapi baavĩ̀ e Pafɔsi, ɔ̃ aa kpàaũ ń Yuda dabudabukɛna pɔ dɛ ãnabi ɛgɛna ũo we. Aà tɔ́n Yesunɛ. 7Ìɔ ku ń busupi gbɛ̃zɔ̃ɔ Sɛɛziu Pɔluo. Gbɛ̃zɔ̃ɔpiá ɔ̃nɔnaɛ, ɔ̃ à Baanaba ń Sɔluo sìsi, kɛ́ a ye à Lua yãma yãi. 8Dabudabukɛnapi tɔ́n Ɛlima ń gɛlɛkiyão. À ibɛlɛsɛ̀ńnɔ, àlɛ wɛɛlɛ à gbɛ̃zɔ̃ɔpi swãfɛ̃, kɛ́ asu Yesu naaikɛo. 9Ɔ̃ Sɔlu pɔ wì mɛ Pɔlu sɔ̃, a paa ń Lua Nisĩnao ɔ̃ à wɛpɛ̀wà à mɛ̀: 10Ibiisi nɛɔ do! Maa pii ibɛɛ! Gbɛ̃nazĩn vãi pii paɛmade! Wɛzɛ̃n pãsĩ! Ńyɔ̃ Dii zɛ́ susu kpaanlaboa too le? 11Tiasa Dii a ɔkulɛmaɛ, ní vĩ̀akũ. Ńyɔ̃ gɔɔplakɛ ńyɔ̃ ĩatɛ̃ eo. Wegɔ̃ɔ Ɛlima wɛ́ gɔ̃̀ dãadãa, gusia kùlɛwà. Ɔ̃ àlɛ ɔmalɛmalɛ, àlɛ gbɛ̃́ wɛɛlɛ aà a ɔ kṹ. 12Kɛ́ gbɛ̃zɔ̃ɔpi yã pɔ kɛ̀pi è, à Dii naaikɛ̀, asa Yesu yã pɔ wa dàɛ̀ aà kũ̀ gbãaɛ.

Kua Antiɔsi pɔ ku Pisidi busuu

13Ɔ̃ Pɔlu gɛ̃̀ go'ilɛnau ń a gbɛ̃́ɔ, aa bɔ̀ Pafɔsi aa gɛ̀ Pɛɛga, Pamfili busuu. We Zãa Maaku ń tóu, à ɛ̀a tà Yelusalɛũ. 14Bɔa Pɛɛga aa gɛ̀ Antiɔsi pɔ ku Pisidi busuu. Kãmabogɔɔ aa gɛ̀ zɔ̃̀lɛ luasisikpɛu. 15Mɔizi ikoyã ń ãnabiɔ láɔ kyokɛa gbɛa luasisikpɛ gbɛ̃zɔ̃ɔɔ gbɛ̃́ zĩ̀ wà onɛ́, tó aa kãfĩa yãe vĩ aa o bilaɛ, aa o.

16Ɔ̃ Pɔlu fɛ̀lɛ, à ɔkɛ̀nɛ́ à mɛ̀: Isailiɔ ń buipãle pɔ aa Lua vĩa vĩɔ à ma yãma. 17Isailiɔ Lua wá deziɔ sɛ̀, ɔ̃ à ń bui kɔ̃̀ an kua Egipi busuu. Ɔ̃ à ń bɔlɛ we ń a gbãa zɔ̃ɔo.#Bɔa 1.7, 12.51 18À ń gwá gbáau wɛ̃̀ bla taawa.#Nao 14.34 19À gbãamɔ̀ Kanaa busu bui lɛɛ soplaɔnɛ, ɔ̃ à ń busupi kpàmá.#Iko 7.1; Yoz 14.1 20Apii kà wɛ̃̀ ɔaa pla ń blakwio taawa. Bee gbɛa à dɔaanaɔ dìlɛdilɛnɛ́ e à gɛ̀ pɛ̀ ãnabi Samuɛliwa.#1 Sam 3.20-21, 10.21-24 21Kɛ́ aa kia gbɛ̀a, ɔ̃ Lua Kisi nɛ Saulu, Bɛ̃yãmɛ bui dìlɛnɛ́.#1 Sam 8.5 À kpalablè wɛ̃̀ bla, 22ɔ̃ Lua aà bɔ̀ kpalau, à Davidi kpà aà gbɛu. Lua Davidi yã'ò à mɛ̀, á è Yɛse nɛ Davidi laasoo doũanɔ, a a pɔeã pii kɛɛ.#1 Sam 13.14, 16.12-13 23Aà bui guu à Yesu bɔ̀u Isailiɔnɛ Suabana ũ, lá à a lɛgbɛ̃̀wa. 24E Yesupi àɔ gɛ́ mɔi Zãa dɔ̀aa à waasokɛ̀ Isailiɔnɛ pii, a ònɛ́ aa nɔsɛlilɛ aa da'ilɛkɛ.#Luk 3.3 25Kɛ́ Zãa zĩ ye laai à mɛ̀: Dé álɛ e má dɛ a ũi? Gbɛ̃́ pɔ á wɛ́ dɔin ma ũo. À ma! Àlɛ mɔ́ ma gbɛa, mi ka mà aà sabala bɔbɔɛ̀o.#Zãa 1.20; Mat 3.11

26Ma gbɛ̃́ɔ, Ablahaũ buiɔ ń buipãle pɔ aa Lua vĩa vĩɔ, wámɛ Lua suabayãpi kpã̀sãwɛ̃ɛ. 27Yelusalɛũdeɔ ń ń gbãadeɔ aai Yesu dɔ̃o, aai ãnabiɔ lá pɔ wìɔ a kyokɛ kãmabogɔɔzĩ pii zɛ́ dɔ̃o, ɔ̃ aa ãnabipiɔ yã pàpa, aa yãdàaala. 28Aai yãe ewà à kà wà aà dɛo, ɔ̃ aa gbɛ̀a Pilatiwa wà aà dɛ.#Luk 23.1-23 29Kɛ́ aa yã pɔ wa kɛ̃̀ aà yãmusu kɛ̀ pii, wà aà bùa líwa wà aà dà mia'ɛu.#Luk 23.50-56 30Lua aà bɔ̀ gau. 31A gɔɔɔ dasi kɛ́ à bɔ̀ à mɔ̀ gbɛ̃́ pɔ aa bɔ̀ Galile aa gɛ̀aanɔ Yelusalɛũɔwa,#Zĩn 1.3 ɔ̃ aa dɛnɛ́ aà seeladeɔ ũ. 32Wapiɔ sɔ̃, ɔ̃ wa mɔ aà baokpaiɛ́. Lɛ́ pɔ Lua gbɛ̃̀ wá deziɔnɛ, 33a kɛ̀ wá gbɛ̃́ pɔ wá dɛ an buiɔ ũɔnɛ, à Yesu vù lá wa ò Soũ plaadeuwa. Lua mɛ̀:

Ma nɛn n ũ,

n Maen ma ũ gbã.#Soũ 2.7

34Lá a yaikɛo, mɛ́ Lua a aà bɔ gau, a yã ɔ̃ Luapi ò yãa à mɛ̀:

Má baaa seasai pɔ ma a lɛgbɛ̃̀ Davidiɛ daágu.#Isa 55.3

35Ɔ̃ wa ò guei lɔ:

Ńyɔ̃ wei n gbɛ̃́ pɔ a kua adoa yaikɛo.#Soũ 16.10

36Davidi sɔ̃ à Lua pɔeã kɛ̀ a gɔɔ. Kɛ́ à gà, wà aà mia kpàkɔ̃i ń a deziɔ, ɔ̃ à yaikɛ̀. 37Gbɛ̃́ pɔ Lua aà vùpi sɔ̃ i yaikɛo. 38Ma gbɛ̃́ɔ, àɔ dɔ̃ kɛ́ duunakɛ̃ama waaso pɔ wálɛ kɛɛ́ ku aà kĩiɛ. 39Mɔizi ikoyã lí fɔ̃ tò yã bɔńnɔ nao, ãma gbɛ̃́ pɔ aalɛ Yesu naaikɛɔ, yãpii ì bɔńnɔ naɛ. 40À laaika kɛ́ yã pɔ ãnabiɔ ò su á leo 41aa mɛ̀:

À ma, á gbɛ̃́ awiambɔnaɔ,

à gilikɛ, í sãalɛ,

asa má yãe kɛ á gɔɔ,

baa tó wa dàu wàlɛ siuɛ́, á sío.#Hab 1.5

42Kɛ́ Pɔlu ń Baanabao lɛ́ bɔlɛ luasisikpɛu, wà wabikɛ̀má aa ɛa mɔ aa yãpi onɛ́ kãmabogɔɔ sìa lɔ. 43Kɛ́ wàlɛ fãaa Yudaɔ ń gbɛ̃́ pɔ aaì luasisińnɔɔ aa bɔ̀ wa tɛ Pɔlu ń Baanabaozi dasi. Aa yã'ònɛ́, aalɛ lɛdamá aaɔ gɛ́ aɛ ń gbɛ̃kɛ pɔ Lua kɛ̀ńnɔo.

44Kãmabogɔɔ sìa wɛ̃lɛdeɔ kã̀aa pii Dii yãmaa yãi. 45Kɛ́ Yudaɔ bilapi è, à kɛ̀nɛ́ ĩi maamaa, ɔ̃ aa bɔ̀ Pɔlu yã kpɛ, aalɛ aà sɔ̃sɔ̃. 46Ɔ̃ Pɔlu ń Baanabao yã'ònɛ́ vĩasai aa mɛ̀: Ámɛ a kũ wà Lua yã'oɛ́ gĩ́a. Lá a gi, álɛ e i ka à wɛ̃ni laasai eo, wá ɛa aɛdɔ buipãleɔwaɛ sa. 47Asa Dii yãɛ bee dìlɛwɛ̃ɛ à mɛ̀:

Ma n dilɛ gupua ũ buipãleɔnɛ,

kɛ́ ǹ gɛmá ń suabayão e tɔɔlɛlɛwa.#Isa 49.6

48Kɛ́ buipãleɔ yãpi mà, an pɔ kɛ̀ na, aa Dii yãsì sĩana ũ, ɔ̃ gbɛ̃́ pɔ Lua ń dilɛ wɛ̃ni laasai pɔ ũɔ Yesu naaikɛ̀.

49Ɔ̃ Dii yã lì busupia pii. 50Yudaɔ ɔzɔ̃̀ buipãle nɔɛ luasisin gbiaɔ ń wɛ̃lɛ gbãadeɔzi, ɔ̃ aa ĩadà Pɔlu ń Baanabaowa, aa ń yá ń busuu. 51Ɔ̃ aa kɔɔlɛ̀má an tàae seela ũ,#Luk 9.5, 10.11 ɔ̃ aa gɛ̀ Ikɔniu. 52Yesudeɔ sɔ̃, aa paa ń Lua Nisĩnao ń pɔnao.

Currently Selected:

Zĩn 13: Boo2024

Highlight

Copy