Zĩn 12

Piɛɛ daa kpɛ́u

1Gɔɔ bee ki Helodi ɔpɛ̀lɛ Yesudeeɔwa pãsĩpãsĩ. 2À Zãa vĩi Zaki dɛ̀ ń fɛ̃ndao. 3Kɛ́ a è yãpi kà Yudaɔgu, ɔ̃ à ɛ̀a à Piɛɛ kũ̀ lɔ. À bee kɛ̀ Kaaso dikpɛzĩɛ. 4Kɛ́ à Piɛɛ kũ̀ a dà kpɛ́u, à aà nà sosaɔnɛ ń ɔzĩ aa aà dɔ̃́a. Sosapiɔ gãli do gbɛ̃ɔn siiɔ̃siiɔ̃ɛ e lɛɛ siiɔ̃. A dìlɛ à yãkpalɛkɛaanɔ bila wáa Gɛ̃amusu dikpɛ gbɛa. 5Ɔ̃ wa Piɛɛ kũa kpɛ́u, Yesudeɔ lɛ́ wabikɛɛ̀ Luawa zɛsai.

6Gu pɔ a dɔ Helodi bɔaanɔ, a gwã Piɛɛ lɛ́ i'o sosa gbɛ̃ɔn plaɔ zãnguo yea ń mɔdaonaɔ mɛn pla, mɛ́ gbɛ̃ɔn plaɔ ku kpɛɛlɛ, aalɛ kpɛ́pi dɔ̃́a. 7Kãndo gɔ̃̀ɔ Dii malaikae gɛ̃̀ we, ɔ̃ kpɛ́pi pù. À Piɛɛ lɛ̀ a gbãtɛ̃ɛwa à aà vù à mɛ̀: Fɛlɛ kpakpa. Ɔ̃ mɔdaonapiɔ wòlo aà ɔɔwa. 8Ɔ̃ malaikapi òɛ̀: Ǹ n ula da, ní n kyalekpa. Piɛɛ kɛ̀ màa, ɔ̃ malaikapi mɛ̀: Ǹ n ula kãaa ǹ kṹ, ní tɛmazi. 9Ɔ̃ Piɛɛ bɔ̀ tɛaazi. I dɔ̃ yã pɔ malaikapi lɛ́ kɛɛá sĩanaɛo, àlɛ e álɛ nana'oɛ. 10Aa gɛ̃̀ gudɔ̃ana sɛ̃iala ń a plaadeo, ɔ̃ aa kà bɔlɛu. Bɔlɛpi gbaá mɔɛ, ɔ̃ à wɛ̃̀nɛ́ ń azĩao, aa bɔ̀lɛ aalɛ gɛ̃ wɛ̃lɛu. Kãndo gɔ̃̀ɔ ɔ̃ malaikapi Piɛɛ tò zɛa guu we. 11Kɛ́ Piɛɛ wɛ́ dɔ̀dɔ à mɛ̀: Má dɔ̃̀ sãasã sa kɛ́ Dii mɛ́ a malaika zĩ̀, à ma bɔ Helodi ɔzĩ ń yã pɔ Yudaɔ wɛdɔi wà kɛmɛɛo pii.

12Kɛ́ aà wɛ́ kɛ̃̀, à gɛ̀ Zãa pɔ wì mɛ lɔ Maaku da Maliama bɛ. Wa kãaaa we dasi, wàlɛ wabikɛ. 13Kɛ́ à bɔlɛgba lɛ̀, ɔ̃ nɔɛ zĩkɛna pɔ wì mɛ Loda gɛ̀ gwai. 14Kɛ́ à Piɛɛ lɔɔ dɔ̃̀, pɔna guu i zɛwɛ̃o, à ɛ̀a baalɛ̀, à gɛ̀ a ònɛ́, Piɛɛ mɛ́ ku bɔlɛu we. 15Wa òɛ̀: Ĩana kàma yã? Ɔ̃ à zɛ̀ò kɛ́ sĩanaɛ. Ɔ̃ wà mɛ̀: Aà malaikaɛ. 16Piɛɛ gì àlɛ gbalɛ. Kɛ́ aa wɛ̃̀, aa aà è, ɔ̃ yãpi dìmá. 17À ɔkɛ̀nɛ́ aa nilɛ, ɔ̃ a dà yãu a sìunɛ́ lá Dii a bɔ kpɛ́u. Ɔ̃ à mɛ̀: À gɛ à o Zakiɛ ń wá gbɛ̃kĩniɔ. Ɔ̃ a bɔ̀ gɛ̀ gupãlei.

18Kɛ́ gu dɔ̀, kɔ̃fĩ gbãa dà sosaɔ zãnguo, aalɛ kɔ̃lala aa mɛ̀: Bɔ́ Piɛɛ kɛ̀ a ũi? 19Helodi ò wà aà wɛɛlɛ. Kɛ́ wi aà eo, ɔ̃ à yãlàla gudɔ̃anapiɔwa, ɔ̃ a ò wà ń dɛdɛ.

Helodi gaa

Bee gbɛa Helodi bɔ̀ Yude, à gɛ̀ gɔɔplakɛ̀ Sezale. 20Aà pɔ pà Tiideɔ ń Sidɔ̃deɔzi maamaa, ɔ̃ gbɛ̃́ beeɔ lɛdoũkɛ̀ wà mɔ̀ aà gwai. Aa gɛ̀ kiapi bɛ ziia Blasitu kĩi. Kɛ́ Blasitu ń yãzɛ'è, aa gɛ̀ lɛdoũkɛi ń Helodio, asa an busu pɔblea ì bɔ aà busuuɛ.

21Kɛ́ gɔɔ pɔ wa dìlɛ kà, Helodi a kiakɛ'ulaɔ dà, à gɛ̀ zɔ̃̀lɛ a gĩ́naa, ɔ̃ à yã'ò bilaɛ. 22Bila wiilɛ̀ à mɛ̀: Luae mɛ́ lɛ́ yã'o, i kɛ gbɛ̃nazĩna no. 23Wegɔ̃ɔ Dii malaikae aà lɛ̀ a nɛ̀, kɛ́ i zɔ̃ɔkɛ dɔ̃ Luaɛo yãi, ɔ̃ aà mɛ kɔɔkà à gà.

24Lua yã ìɔ ligua, ìɔ kãfĩ. 25Baanaba ń Sɔluo sɔ̃, kɛ́ aa ń kamasa yãkɛ̀kɛ aa làa, aa bɔ̀ Yelusalɛũ aa Zãa pɔ wì mɛ Maaku sɛ̀ tàò.

Currently Selected:

Zĩn 12: Boo2024

Highlight

Copy