Zĩn 11

Piɛɛ buipãleɔ yã'oa

1Zĩnaɔ ń Yesude pɔ ku Yudeɔ mà lá buipãleɔ Lua yãsì sɔ̃. 2Kɛ́ Piɛɛ sù Yelusalɛũ, an gbɛ̃́ pɔ zɛ̀ ń tɔ̃zɔ̃yãoɔ aa aà taae'è 3aa mɛ̀: N gɛ̃ gyafɔɔdeɔ bɛ n pɔblèńnɔ.

4Ɔ̃ Piɛɛ fɛ̀lɛ, àlɛ yãpi bɔɔlɛkɛnɛ́ zɛ́zɛ à mɛ̀: 5Má ku Zopeɛ, malɛ wabikɛ, ɔ̃ ma wɛpungu è. Ma pɔe è lan zwãa zɔ̃ɔwa, ba dɔdɔa a swã mɛn siiɔ̃ɔwa. À bɔ̀ musu àlɛ pila ma kĩi. 6Ma wɛpɛ̀wà soee, ma nɔbɔɔ è ka a guu, sɛ̃a pɔɔ ń pɔtaa'onkuawaɔ ń bãɔ. 7Ɔ̃ ma yã'o mà, wa òmɛɛ: Piɛɛ, fɛlɛ ǹ dɛ ǹ só. 8Ɔ̃ ma mɛ̀, bauo Dii, asa tɛ̃e ge pɔ gbãlɛae i gɛ̃ ma lɛ́u ziio. 9Yã'opi bɔa musu gɛ̃n plaade wà mɛ̀, pɔ pɔ Lua gbãbɔ̀ɛ̀, masu mà a tɛ̃boo. 10À kɛ̀ màa gɛ̃n aaɔ̃, ɔ̃ wà ɛ̀a gà wà tàò musu pii.

11Zaa doũpiwa gɔ̃ɔ gbɛ̃ɔn aaɔ̃ pɔ wà ń zĩa bɔa Sezaleɔ mɔ̀ ua pɔ má kuu. 12Ɔ̃ Lua Nisĩna òmɛɛ mà gɛńnɔ seasai. Wá gbɛ̃́ gbɛ̃ɔn sooloɛ beeɔ gɛ̀ ma kpai sɔ̃, ɔ̃ wa gɛ̃ gbɛ̃́ pɔ gbɛ̃́piɔ zĩ̀a bɛ. 13Ɔ̃ a òwɛ̃ɛ lá a malaika è, à bɔ̀ à mɔ̀wa a kpɛ́u, a òɛ à gbɛ̃́ zĩ Zope ma sisii, 14mà yã pɔ a api suaba ń a bɛdeɔ pii oɛ. 15Kɛ́ ma na yã'oawa, Lua Nisĩna dìnɛ́ lá a dìwɛ̃ɛ a daalɛgɔɔwa. 16Ɔ̃ yã pɔ Dii ò dɔ̀magu à mɛ̀, Zãa gbɛ̃́ɔ da'ilɛkɛ̀ ń íoɛ, api sɔ̃ á wá da'ilɛkɛ ń Lua Nisĩnaoɛ.#Luk 3.16; Zĩn 1.5 17Lá Lua gba doũ pɔ á dàwɛ̃ɛ gɔɔ pɔ wa Dii Yesu Kilisi naaikɛ̀ dànɛ́ lɔ, dén ma ũ mà fɔ̃ mà giɛ̀i?

18Kɛ́ aa yãpi mà, aa nìlɛ, ɔ̃ aa Lua tɔbɔ̀ aa mɛ̀: Wá è Lua buipãleɔ gbà zɛ́ sɔ̃ aa nɔsɛlilɛ, aai aizãna e.

Antiɔsideɔ zɛa ń Yesuo

19Wɛtɛ̃amɔanɛ́ pɔ fɛ̀lɛ Ɛtiɛ̃ gaa guu#Zĩn 8.1-4 mɛ́ tò wà fã̀aa wà tà Fenisi busuu ń Sipi busuo ń Antiɔsio, Yudaɔ ɔ̃ aalɛ Lua yã'onɛ́ ntɛ̃ɛ. 20Ɔ̃ an gbɛ̃eɔ bɔ̀ Sipi busuu ń Silɛni busuo aa gɛ̀ Antiɔsi, ɔ̃ aalɛ yã'o buipãleɔnɛ sɔ̃, aalɛ Dii Yesu baokpanɛ́. 21Dii lɛ́ ɔdamá, ɔ̃ gbɛ̃́ɔ yãpi sì dasi aa zɛ̀ ń Diipio.

22Yelusalɛũ Yesudeɔ swãlɛ̀ yãpiwa, ɔ̃ aa Baanaba zĩ̀ Antiɔsi. 23Kɛ́ à kà we, a è lá Lua gbɛ̃kɛkɛ̀nɛ́, ɔ̃ aà pɔ kɛ̀ na. À lɛdàmá mpii aa zɛ ń Diio ń nɔsɛmɛndoo. 24Baanabaá gbɛ̃maaɛ, a paa ń Lua Nisĩnao ń luanaaikɛao ɔ̃ wà kà Dii gbɛ̃́ɔ guu dasidasi. 25Ɔ̃ Baanaba gɛ̀ Taasu Sɔlu wɛɛlɛi. 26Kɛ́ à aà è, ɔ̃ à sùaanɔ Antiɔsi. Aaìɔ Yesudeɔ kãaa dasi, aaɔ yãdanɛ́ e wɛ̃̀ do bṹu. Antiɔsi we ɔ̃ wà dɔ̀aa wà tɔkpàu Yesu iwaɔnɛ Yesudeɔ.

27Gɔɔ bee ãnabiɔ bɔ̀ Yelusalɛũ aa mɔ̀ Antiɔsi. 28An gbɛ̃́ pɔ wì mɛ Agabu fɛ̀lɛ zɛ̀, à dɔ̀aa à nɔan zɔ̃ɔ pɔ a ka dũniau pii yã'ònɛ́ ń Lua Nisĩna gbãao. Kolodi kpalablegɔɔ ɔ̃ nɔanapi kà. 29Ɔ̃ Yesudeɔ zɛ̀ò wà ń gbɛ̃́ pɔ aa ku Yudeɔ kamasaka baade gbãa lɛu, wi kpãsãnɛ́. 30Ɔ̃ aa kɛ̀ màa, aa Baanaba ń Sɔluo zĩ̀ kpai an gbɛ̃zɔ̃ɔɔwa.

Currently Selected:

Zĩn 11: Boo2024

Highlight

Copy