Zĩn 10

Kɔɔnɛi Piɛɛ sisia

1Gbɛ̃e ku Sezale, aà tɔ́n Kɔɔnɛi. Aapi mɛ́ sosa gãli pɔ wì mɛ Itali sosa gbɛ̃ɔn basɔoɔ dɔaana ũ. 2Gbɛ̃́piá luayãmanaɛ, a Lua vĩa vĩ, aapi ń a bɛdeɔ pii. Ì wɛ̃nadɔ̃nɛ́ maamaa, mɛ́ ìɔ wabikɛ Luawa mɔɔmɔɔ. 3Gɔɔewa ĩatɛ̃ auapilaa, wɛpungu'ea guu à Lua malaikae è wasawasa, à gɛ̃̀ a bɛ a òɛ: Kɔɔnɛi. 4Ɔ̃ Kɔɔnɛi wɛ́ gɔ̃̀ biiawà, vĩa aà kũ̀, ɔ̃ à mɛ̀: Bɔ́ ni, Dii? A wèwà à mɛ̀: N wabikɛa ń n wɛ̃nadɔ̃anɛ́o kà Luagu, ɔ̃ a sìnnɔ. 5Gbɛ̃́ɔ zĩ Zope sa, aa Simɔ pɔ wì mɛ Piɛɛ sisi. 6À pìla gbɛ̃́ pɔ wì mɛ Simɔ Baatotonawa. Aà bɛ ku isialɛ. 7Kɛ́ malaikapi tà, Kɔɔnɛi a zĩkɛnaɔ sìsi gbɛ̃ɔn pla ń sosa luayãmana pɔ nawao. 8Kɛ́ a dàu a sìunɛ́ pii, ɔ̃ à ń zĩ́ Zope.

9Kɛ́ a gu dɔ̀, ɔ̃ aa dà zɛ́u, aa kãikũ̀ ń wɛ̃lɛpio. Gɔɔ bee Piɛɛ dɛ̀dɛ kpɛ́ musu ĩatɛ̃ minanguo wabikɛi. 10Nɔana lɛ́ aà dɛ, a ye pɔble, ɔ̃ gɔɔ pɔ wàlɛ blɛkɛ, à wɛpungu è. 11À musu è wɛ̃a, pɔe lɛ́ pila lan zwãa zɔ̃ɔwa. Wà badɔ̀dɔ a swã mɛn siiɔ̃ɔwa pii, wàlɛ gbaɛ zĩlɛ. 12Nɔbɔɔ ń pɔtaa'onkuawaɔ ń bãɔ mɛ́ ká a guu pii. 13Ɔ̃ wa òɛ̀: Piɛɛ, fɛlɛ ǹ dɛ ǹ só. 14Ɔ̃ Piɛɛ mɛ̀: Bauo Dii, mi tɛ̃e ge pɔ gbãlɛae ble ziio. 15Ɔ̃ à yã'opi mà a gɛ̃n plaade wà mɛ̀: Pɔ pɔ Lua gbãbɔ̀ɛ̀, nsu ǹ a tɛ̃boo. 16À kɛ̀ màa gɛ̃n aaɔ̃, ɔ̃ kãndo wà pɔpi gà wà tàò musu.

17Piɛɛ lɛ́ bilikɛ wɛpungu pɔ a èpi yãwa, ɔ̃ Kɔɔnɛi zĩna pɔ aa Simɔ bɛ gbɛ̀aɔ kà gɔ̃̀ɔ, aa zɛa bɔlɛu. 18Aa lɛzù, aa gbɛ̃́ɔ là tó wekĩi ɔ̃ Simɔ pɔ wì mɛ Piɛɛ pìlau. 19E tia Piɛɛ lɛ́ laasookɛ wɛpungu pɔ á èwa, ɔ̃ Lua Nisĩna òɛ̀: Gbɛ̃ɔn aaɔ̃ɔ lɛ́ n gbɛa. 20Pila ǹ gɛńnɔ seasai, asa mamɛ ma ń zĩ́ma. 21Ɔ̃ Piɛɛ pìla, à gɛ̀ gbɛ̃́piɔ kĩi à mɛ̀: Mamɛ má gbɛ̃́ pɔ álɛ gbɛa ũ. Bɔyãi a mɔi lai? 22Aa mɛ̀: Sosaɔ dɔaana Kɔɔnɛi mɛ́ wá zĩ́. Gbɛ̃maaɛ, a Lua vĩa vĩ. Yudaɔ pii aaì aà tɔnasiɛ. Lua malaikae òɛ̀ aà n sisi a bɛ, aà n yãma. 23Ɔ̃ Piɛɛ gɛ̃̀ńnɔ ua à ń yaaekɛ̀.

Kɛ́ a gu dɔ̀, à fɛ̀lɛ dàńnɔ zɛ́u. Zope Yesudeeɔ gɛ̀ aà kpai. 24A gɔɔ aaɔ̃de aa kà Sezale. Kɔɔnɛi a daɛɔ ń a gbɛ̃na fɛ̃̀ɛɛɔ kã̀aa, àlɛ ń dã́. 25Kɛ́ Piɛɛ gɛ̃̀ ua, ɔ̃ Kɔɔnɛi gɛ̀ dàaalɛ à kùlɛɛ̀. 26Ɔ̃ Piɛɛ aà fɛ̀lɛ à mɛ̀: Fɛlɛ ǹ zɛ. Gbɛ̃nazĩnan ma ũ sɔ̃. 27Àlɛ yã'oaanɔ e aa gɛ̀ gɛ̃̀ kpɛ́u, ɔ̃ à gbɛ̃́ɔ lè kãaaa we dasidasi. 28A ònɛ́: Á dɔ̃ kɛ́ Yudaɔ zɛ́ vĩ wà yãalɛ ń buipãleo ge wà gɛ̃ aà uao. Ãma Lua ɔlɔ̀mɛɛ masu gbɛ̃e gbãsĩbo ge mà aà tɛ̃boo. 29A yãi tò kɛ́ wà ma sisì, ma mɔ zĩozĩonakɛsai. Má ye mà yã pɔ a ma sisiwà ma sa. 30Ɔ̃ Kɔɔnɛi mɛ̀: A gɔɔ siiɔ̃n la, kɛ́ malɛ wabikɛ ma bɛ e ĩatɛ̃ gɛ̀ aua pìlaò maa'i kɛ́wa. Ɔ̃ kãndo ma gbɛ̃e è zɛa ma aɛ, a pɔ tɛkɛa daa 31à mɛ̀: Kɔɔnɛi, Lua n wabikɛa sì, mɛ́ n wɛ̃nadɔ̃anɛ́ kàaagu. 32Gbɛ̃́ɔ zĩ Zope Simɔ pɔ wì mɛ Piɛɛ sisii. À pìla Simɔ baatotona bɛ isialɛ. 33Ɔ̃ ma gbɛ̃́ɔ zĩ̀ma gɔ̃̀ɔ. Lá n mɔ, à kɛ̀ maa. Tia kɛ́wa, wapii wá ku la Lua aɛ, kɛ́ wà yã pɔ Dii ònɛ ma yãi.

Lua Nisĩna dia buipãleɔnɛ

34Piɛɛ yãsɛ̀ à mɛ̀: Má sì sĩana sa kɛ́ Lua lí gbɛ̃e zãboo.#Iko 10.17 35Bui pii guu gbɛ̃́ pɔ lɛ́ vĩakɛɛ̀ mɛ́ ì yãmaakɛ, ade yã mɛ́ ì kaaagu. 36Lua a yã dà Isailiɔnɛ, à kɛaanɔ na Yesu Kilisi sabai baokpànɛ́. Aapi mɛ́ bui pii Dii ũ. 37Á yã pɔ kɛ̀ Yude busuu dɔ̃ pii, lá à dàalɛ Galile Zãa kpawakɛa ń aà gbɛ̃́ɔ da'ilɛkɛao gbɛa. 38Á dɔ̃ lá Lua a Nisĩna pìsi Yesu Nazalɛtiwa, ɔ̃ a ku ń aà gbãao, à gɛ̀ wɛ̃lɛ ń wɛ̃lɛo à yãmaakɛ̀nɛ́, à gbɛ̃́ pɔ Ibiisi ń gãlìnɛ́ ń kpɛɔ gbã̀gbã, asa Lua kuaanɔɛ. 39Wá dɛ yã pɔ a kɛ̀ Yude busuu ń Yelusalɛũo pii seeladeɔ ũ. Wà aà lòo líwa wa dɛ̀, 40ɔ̃ Lua aà vù a gɔɔ aaɔ̃dezĩ, a tò à azĩa ɔlɔ̀wɛ̃ɛ. 41I kɛ gbɛ̃piiɛ no, wá gbɛ̃́ pɔ Lua dɔ̀aa à wá sɛ́ aà seelade ũɔnɛ. Aà bɔa gau gbɛa wa pɔblèaanɔ, wa imìaanɔ. 42Ɔ̃ a dìlɛwɛ̃ɛ wà waasokɛ gbɛ̃́ɔnɛ, wí onɛ́ ámɛ á dɛ gbɛ̃́ pɔ Lua dìlɛ gbɛ̃́ bɛ̃́ɛɔ ń gyaadeɔ pii yãkpalɛkɛna ũ. 43Ãnabiɔ aà yã'ò pii aa mɛ̀, gbɛ̃́ pɔ aa aà naaikɛ̀ɔ duuna a kɛ̃má aà tɔ́ yãi.

44Gɔɔ pɔ Piɛɛ lɛ́ yãpi onɛ́, Lua Nisĩna dì gbɛ̃́ pɔ aalɛ yãpi maɔnɛ pii. 45Yãpi dì Yuda Yesude pɔ aa mɔ̀ ń Piɛɛoɔwa, kɛ́ baa buipãleɔ, Lua ń gbá a Nisĩna a pìsimá. 46Asa aa mà, aalɛ yãebui'o, aalɛ Lua yãbɔnsaɛkɛaɔ o. Ɔ̃ Piɛɛ mɛ̀: 47Gbɛ̃́piɔ Lua Nisĩna è láwáwa. Demɛ a fɔ̃ ginɛ́ aa da'ilɛkɛi? 48Ɔ̃ a ò wà ń da'ilɛkɛ ń Yesu Kilisi tɔ́o. Ɔ̃ aa wabikɛ̀wà aà gɔɔplakɛńnɔ.

Currently Selected:

Zĩn 10: Boo2024

Highlight

Copy