Esekiel 47

Nkpen mu puu nyan ni Uwumbɔr Aadichal ni na aabɔr

1Uja ngbaan nan ki di mi gir buen Uwumbɔr Aadichal aabisamɔb chee. Nnyun nan nyan ni mbisamɔb ngbaan aataab ki puu cha liwipuul wɔb, Uwumbɔr Aadichal aah lik lipepel li wɔb na. Mu nan puu Uwumbɔr Aadichal aataab ŋŋangii wɔb ki jer kitork aabimbiln aaŋangii wɔb. 2Uja ngbaan nan di mi dii ŋŋangan wɔb aabisamɔb nyan Uwumbɔr Aadichal aapaan ni ki di mi buen mbisamɔb mu lik liwipuul wɔb na chee. Nkpen waatiir mubaa nan puu nya mbisamɔb ngbaan aaŋangii wɔb. 3Uja ngbaan nan di waakur aadabil li bi joo ŋaŋni tiwan na ki ŋaŋ ti saa ŋitaa lichur, ni ikui iloob, ni imonko iniin, ki toŋ liwipuul wɔb, le ki bui mi ke m luul nima chee ki jer. Nnyun aanyonyoon nima chee nan saa ntaagbeln mɔk la. 4U nan ki ŋaŋ ti saa ŋitaa lichur, ni ikui iloob, ni imonko iniin ki moo sunn buen taab, le nima chee aanyonyoon ti saa ntaaŋaayil mɔk. U nan ki gir ŋaŋ ŋitaa lichur, ni ikui iloob, ni imonko iniin sunn kpee, le nima chee aanyonyoon pii nchaŋ mɔk. 5U nan ki ŋaŋ ŋitaa lichur, ni ikui iloob, ni imonko iniin kpee, le nima chee aanyun nan nyoo sakpen le maa ŋmaa luul jer. Mu nan nyoo nima chee sakpen ke unii luul, see aa won kaakaan. 6U nan bui mi ke, “Unibɔn, chuu nimina mɔmɔk ŋa aayil ni mbamɔm.”

Tɔ, uja ngbaan nan ki di mi giin limɔɔgbaln, 7le maah ti nyan nima chee na, m kan ke isui pam nan si limɔɔgbaln mɔk pu. 8U nan bui mi ke, “Nnyun mumina puu cha liwipuul wɔb, le ki ti lir Jɔɔdann Aafataŋ ni, ki nyan nima ti koo N‑yaan Aanyusakpem ni. Nima chee le mu ti gaa n‑yaan aanyun mu bi nnyusakpem ngbaan ni na, ki ye nnyunbamɔm. 9Nnyun ngbaan yaa puu nin chee mɔk jer na, ipeel ni ijan mɔmɔk aabɔŋ ga li bi nima. Nkpen ngbaan aanyun ga cha N‑yaan Aanyusakpem ngbaan aanyun ŋa nnyun mu mɔ na, le mu aah puu jer nin chee mɔk na mu ga tii limɔfal. 10Bijanbam ga li bi nnyusakpem aagbaan ki nya Enn Gedi Aayayak aanyunbun chee ki di kina ti saa Enn Eglaim Aayayak aanyunbun chee, ki ga yar baapɔr den nima chee ke ti kuur. Ijan mɔmɔk aabɔŋ ga li bi nima chee ke yaah bi Kaasisik ni Aanyusakpem ni pu na. 11Tɔ, nnyun mu bi kipuuk, ni tibɔr ti bi nnyusakpem ngbaan aagbaan na ni ga li beenin kpa n‑yaan. Mu ga bee nima chee ki li ye nin chee n‑yaan nyan ni na. 12Isui mɔmɔk aabɔŋ ga muun ŋimɔɔgban ŋilee ngbaan mɔmɔk pu ki tii tijikaar. Yaafar aan yɔl daalbaadaal, le yaasubil mu aan fir daalbaadaal. I ga li kpa uŋmal mɔk aasubipɔɔn, ba pu? nkpen mu puu nyan ni Uwumbɔr Aadichal ni na le tii i nnyun. Isui ngbaan ga li tii tijikaar, le bi ga li joo yaafar mu ki sɔŋ binib aaween.”

Kitiŋ ngbaan aatinaanmɔk

13Tidindaan Uwumbɔr nan bui ke, “Kitiŋ ki ni ga di yakr tii ŋinibol kipiik ni ŋilee, aan Josef aanibol ma ga gaa nfum mulee pu na aatinaanmɔk sɔ. 14M nan puu tipuukpaan tii niyaajatiib ke m ga di kitiŋ kimina tii bi; tɔ, yakr ki dee dee tii tɔb man.

15“Ŋŋangan wɔb aatinaanmɔk nyan Kaasisik ni Aanyusakpem chee ki di dii liwipuul wɔb ki ti saa Hetlonn aatiŋ, ni Hamaf Aasan chee, ni Sedad aatiŋ chee, 16ki di kpee Berota, ni Sibraim aatim mu bi Damaskus aanaan aapepel ni Hamaf aanaan aakaasisik ni na, ni Tikonn aatiŋ ki bi Haurann aapepel aanaanmɔk na. 17Kina pu na, ŋŋangan wɔb aatinaanmɔk nan nyan Kaasisik ni Aanyusakpem mɔk ki di dii liwipuul wɔb ki ti saa Enonn aatiŋ mɔk ki di Damaskus ni Hamaf aatinaanmɔk lii ŋŋangan wɔb.

18“Liwipuul wɔb aatinaanmɔk nan nyan libuul libaa ni Damaskus ni Haurann aapepel chee ki di dii ŋŋangii wɔb, le Jɔɔdann Aamɔɔl ye Israel aatiŋ ki bi liwilir wɔb na, ni Gilead ni bi liwipuul wɔb na aatinaanmɔk, ki yoor kina ti saa Tamar aatiŋ ki bi N‑yaan Aanyusakpem chee na.

19“Ŋŋangii wɔb aatinaanmɔk nan nyan Tamar aatiŋ mɔk ki di dii ŋŋangii wɔb ni liwilir aapepel wɔb ki ti saa Kades Meriba aateersakpiin aanyun na chee, le ki di toŋ ŋŋangan ni liwilir aapepel ki kpak Ijipt aatinaanmɔk ki ti saa Kaasisik ni Aanyusakpem mɔk.

20“Liwilir wɔb aatinaanmɔk nan nyan Kaasisik ni Aanyusakpem mɔk ki di dii ŋŋangan wɔb ki ti saa libuul libaa ni, Hamaf Aasan aawilir wɔb.

21“Yakr kitiŋ kimina tii nimi aanibol. 22Ki ga li ye nimi aatiŋ le ki cha n‑yoonn mɔmɔk. Ni yaa bi yakr ki kan, ni tii biwɔwɔm bi koo ni chee ki ma mbim do na mu baatiŋ. Ni ŋa bi ke naah ga ŋa Israel aanii pu na, ki cha bi mu kpaan too inaan Israel aanibol chee ki gaa baatiŋ. 23Uwɔwɔnii umɔk koo do na ga gaa waatiŋ waah koo linibol li ponn ni na chee la. Min Nidindaan Uwumbɔr le len kina.”

Currently Selected:

Esekiel 47: xonB

Highlight

Copy

Compare