Esekiel 48

Baah ga yakr kitiŋ pu tii ŋinibol ngbaan na

1-7Kitiŋ ngbaan aaŋangan wɔb aatinaanmɔk nan nyan Kaasisik ni Aanyusakpem mɔk le ki di dii liwipuul wɔb ki ti saa Hetlonn aatiŋ, ni Hamaf Aasan, ni Enonn aatiŋ, ki ti saa Damaskus ni Hamaf aanaan aah ti naa tɔb nin chee na. Linibol mɔk aatiŋ nan piin liwipuul aatinaanmɔk ki di dii liwilir wɔb ki ti saa Kaasisik ni Aanyusakpem mɔk, ki dii tɔb ki nya ŋŋangan wɔb ki cha ŋŋangii wɔb kina la:

Dann aanibol le ga pue gaa,

le Aser aanibol paan,

le Naftali aanibol paan,

le Manase aanibol paan,

le Efraim aanibol paan,

le Rubenn aanibol paan,

le Juda aanibol paan.

Mpaan mu bi nyan bil kitiŋ ngbaan aakaasisik ni na aabɔr

8Kitiŋ ngbaan aapaan mu nan paa kaasisik ni na le bi nan nyan siin ŋitun ŋibaa pu na. Mpaan ngbaan aawawaan ki nya ŋŋangan wɔb ki ti saa ŋŋangii wɔb li ye mal kipiik, ki nya liwipuul wɔb ki ti saa liwilir wɔb mu aafɔfɔk li fɔk ŋak ke baah gii pu tii ŋinibol ngbaan na. Mpaan ngbaan ni le Uwumbɔr Aadichal ga sil.

9Mpaan ngbaan aakaasisik ni ga ki li kpa mpaan mu aafɔfɔk ye mal kipiik, aan nwawaan mu ye biniin na. Muma le ga li ye Uwumbɔr aapaan. 10Bitotoorb ga li kpa mpaan, chain aapepel lee ni. Ki nya liwipuul wɔb ki ti saa liwilir wɔb, baapaan aafɔfɔk li ye mal kipiik, ki nya ŋŋangan wɔb ki ti saa ŋŋangii wɔb mu li ye mal binaa. Uwumbɔr Aadichal ga li bi lipepel limina aakaasisik ni la. 11Sadok aayaabitiib bi ye bitotoorb na yeh chain aapepel ngbaan. Bima le dii mi mbamɔm, kaa nan ŋmal Israel yaab biken ni, baah nan bi tun mi taani buyoonn na, ke Liifai aanibol liken aah nan ŋa pu na. 12Kina pu na, baapaan ga li paa Liifai yaab biken yaan pu la, le ki ga li bi chain ki jer ŋipepel mɔmɔk. 13Liifai yaab mu aapepel ga li bi libaa la, ki ga li bi bitotoorb aapaan aaŋangii wɔb. Mu mu ga li ye mal kipiik ki nya liwipuul ki ti saa liwilir wɔb, ki li ye mal binaa ki nya ŋŋangan ki ti saa ŋŋangii wɔb. 14Lipepel li ye Uwumbɔr aapaan na li ŋan jer kitiŋ ngbaan aapepel mɔmɔk, le baan ŋmaa gii mu pu nibaa chee kooh, bee bi di kpeln, bee bi ki di tii ubaa. Mu bi chain la, le ki ye Uwumbɔr aapaan.

15Mpaan mumina aapepel li gur ki ye mal kipiik aafɔfɔk, aan nwawaan ye mal bilee aafɔfɔk na aa bi chain, le ki ga li ye binib aawan mɔmɔk aapaan. Bi ga ŋmaa li koo mu pu ki ko mu pu. Kitiŋ ga li bi mu aakaasisik ni, 16le mu aafɔfɔk ni nwawaan li ye tiwanbaan. Ni ga li ye ŋitaa ŋichur ŋilole ni ikui iŋmu ni imonko itaa ŋipepel mɔmɔk pu. 17Mpaan mu aawawaan ga li ye ŋitaa ikui inaa ni moninko na ga mann kitiŋ ngbaan ki ti ton. 18Mpaan mu gur kitiŋ ngbaan aamaam aapuwɔb ki kpaan bi chain aapepel aaŋangii wɔb na aafɔfɔk ga li ye mal binaa, le nwawaan ye mal bilee liwipuul wɔb, ki li ye mal binaa aafɔfɔk, ni mal bilee aawawaan liwilir wɔb mu. Mpaan ngbaan ga li ye binib bi koo kitiŋ ngbaan ni na aasar la. 19Unii umɔk koo kitiŋ ngbaan ni na ga ko nima chee la. Baan li dii ŋinibol ŋi ponn ni binib ngbaan nyan ni na aasan le ki ko nima.

20Kina pu na, mpaan mu bi nan nyan bil kitiŋ ngbaan aakaasisik ni na aafɔfɔk ni nwawaan ga li ŋak la, ni ga li ye mal kipiik le lipepel mɔmɔk pu, baah maa kitiŋ ki na ga li bi mu ni.

21-22Mpaan mu gur ki bi Uwumbɔr Aadichal, ni bitotoorb aatiŋ, ni Liifai yaab aatiŋ, ni kitiŋ ki bi nima na aawipuul ni liwilir wɔb na le ye Israel yaab aajojoor na aatiŋ. Ki di toŋ liwipuul wɔb ki ti saa liwipuul aatinaanmɔk, ki di toŋ liwilir wɔb ki ti saa Kaasisik ni Aanyusakpem mɔk, le ki ti saa Juda aanibol aatinaanmɔk ŋŋangan wɔb, ki di ti saa Benjaminn aanibol aatinaanmɔk ŋŋangii wɔb.

Ŋinibol ŋiken na aatim

23-27Lipepel limina aaŋangii wɔb le ŋinibol ŋi gur na mɔmɔk ga kan ntim, ki nya liwipuul aatinaanmɔk ki di toŋ liwilir wɔb, ki ti saa Kaasisik ni Aanyusakpem mɔk. Ŋinibol ngbaan ga li dii tɔb ki nya ŋŋangan wɔb ki cha ŋŋangii wɔb kina la:

Benjaminn aanibol le ga pue gaa,

le Simeonn aanibol paan,

le Isakar aanibol paan,

le Sebulunn aanibol paan,

le Gad aanibol ti gbeln puwɔb.

28Gad aanibol aatiŋ aaŋangii wɔb aatinaanmɔk nyan Tamar aatiŋ mɔk le ki di toŋ ŋŋangii ni liwilir aapepel ki ti saa Kades aateersakpiin aanyun na chee, le ki fenn ŋŋangan ni liwilir aapepel ki di toŋ Ijipt aatinaanmɔk ki ti saa Kaasisik ni Aanyusakpem mɔk.

29Tidindaan Uwumbɔr len ke, “Kina le ni ga yakr ki ga gii gii kitiŋ ngbaan tii Israel aanibol aan ni li ye biyaan.”

Jerusalem aatiŋ aabisamɔi aabɔr

30-34Jerusalem aatiŋ kpa ibisamɔi kipiik ni ilee la. Ŋigon ŋinaa ŋi gob ki na libaa mɔk aafɔfɔk ye ŋitaa ŋichur ŋilole ni ikui iŋmu ni imonko itaa la, le ibisamɔi itata bi ligoln mɔk ni. Mubaa mɔk kpa ŋinibol kipiik ni ŋilee na libaa aayimbil. Ibisamɔi i bi ŋŋangan wɔb na aayimbil le ye Rubenn, ni Juda, ni Liifai; le i bi liwipuul wɔb aagoln ni na ye Josef, ni Benjaminn, ni Dann; le i bi ŋŋangii wɔb aagoln ni na aayimbil ye Simeonn, ni Isakar, ni Sebulunn; le i bi liwilir wɔb aagoln ni na ye Gad, ni Aser, ni Naftali. 35Ŋigon ŋinaa ngbaan aafɔfɔk nan ti saa ŋitaa ŋichur piitaa ni ikui ilee ni moninko la. Kitiŋ ngbaan aayimbil ki nyan n‑yoonn mue ki joo cha ga li ye ke “Uwumbɔr‑bi‑do.”

Currently Selected:

Esekiel 48: xonB

Highlight

Copy

Compare