Esekiel 46

Israel yaab aajojoor ni njim aabɔr

1Tidindaan Uwumbɔr len ke, “Iwiin iloob i ponn ni binib tun lituln na, ni taa piir kichinbik aabisamɔb na, tɔ, ni ga ŋmaa piir mu Likpaakool aawiin daal, ni Uŋmapɔɔn Aajim daal. 2Israel yaab aajojoor ga dii lichinjal aabisamɔb ni le ki koo kinaakook ni, ki ti sil mbisamɔb aadɔja chee aan utotoor di waatork see mmii ni, ki toor waamɔbaan aatork mu tii u. Mbisamɔb nima chee le u ga doon mi ki gir nya. Mbisamɔb ngbaan ga li waa kina le ki ti saa kijook. 3Binib mɔmɔk mu ga gbaan ki doon min Uwumbɔr, mbisamɔb chee nima le Likpaakool daal mɔk, ni Uŋmapɔɔn Aajim mɔk daal.

4“Likpaakool daal kan, ujojoor ngbaan ga joo ni min Uwumbɔr kitork ki bi joo seer mmii ni na aapihbi iloob, ni upihja ubaa. I mɔmɔk taa li kpa iween ibaa. 5U ga di njikaabim kuruwaa biniin kpee upihja mɔk pu, ki di waah gee tiwan ni mɔk na kpee upihbo mɔk pu. U ga di nkpan kpalba bitaa kpee kina aajikaabim aatork mɔk pu. 6U ga di linaajabil, ni ipihbi iloob, ni upihja ubaa le toor Uŋmapɔɔn aatork. I mɔmɔk taa li kpa iween ibaa. 7U ga di njikaabim kuruwaa biniin le kpee unaaja, ni upihja mɔk pu, ki di waah gee tiwan ni mɔk na kpee upihbo mɔk pu. U ga di nkpan kpalba bitaa kpee kina aajikaabim aatork pu. 8Ujojoor ngbaan ga gir dii nnaakɔsamɔb ki dii waah ba dii pu koo ni na ki nya.

9“Binib yaa dan njim mɔk yoonn ke bi nan doon min Uwumbɔr kan, binib bi dii ŋŋangan wɔb aabisamɔb koo ni na ga dii ŋŋangii wɔb aabisamɔb le nya idoon ngbaan aapuwɔb, le binib bi dii ŋŋangii wɔb aabisamɔb koo ni na ga dii ŋŋangan wɔb aabisamɔb nya. Ubaa taa gir dii waah ba dii nin chee koo ni na ki nya, u dii lipepel liken aabisamɔb nya. 10Binib ngbaan ni ujojoor ngbaan kpaan ki koo ni, le bi yaa nan ban bi nyan kan, u ni bimɔk kpaan nya. 11Njim ni kitork aawiin daal kan, njikaabim kuruwaa biniin le ga kpee unaaja bee upihja mɔk pu, le unii u ban kitork ngbaan na ga ŋmaa ban waah gee tiwan ni mɔk na kpee upihbo mɔk pu. Nkpan kpalba bitaa le ga kpee kina aajikaabim aatork pu.

12“Ujojoor ngbaan yaa ban u toor waageehn aatork tii min Uwumbɔr, aan ki li ye kitork ki bi joo seer mmii ni na, bee kimɔbaan aatork kan, bi ga piir kichinbik aabisamɔb mu bi liwipuul wɔb na le u dii koo. U ga toor kitork ngbaan ke waah toor Likpaakool daal pu na la, le u yaa nan nyan kan, bi ki laŋ mbisamɔb ngbaan.”

Iwiin mɔmɔk aatork aabɔr

13Uwumbɔr len ke, “Kichakpiik mɔk ni kan, ni di libiln libaa aapihbo u kaa kpa iween ibaa na toor kitork ki di see mmii ni, umɔn, ki tii min Uwumbɔr. Ni li toor kina aatork nwiin mɔk. 14Ni di n‑yon kuruwaa bilee, ni nkpan kpalba ubaa kpee kina aatork pu. Nkpan ngbaan le bi ga di buun n‑yon ngbaan. Kitork kimina aakaal ga li bi kina le ki cha. 15Ni li joo upihbo, ni n‑yon, ni nkpan ngbaan toor kitork tii min Uwumbɔr, kichakpiik mɔk ni, ki cha n‑yoonn mɔmɔk.”

Ujojoor ngbaan ni kitiŋ aabɔr

16Tidindaan Uwumbɔr siin ke, “Israel yaab aajojoor na yaa di waatiŋ nibaa wɔb tii ujapɔɔn ubaa ipiin kan, kitiŋ ngbaan ga li ye ujapɔɔn ngbaan aatiŋ waadichal aafaal ni. 17Tɔ, ujojoor ngbaan yaa di kitiŋ kina aaboln tii waatutunn ubaa kan, giintii aabiln yaa nan saa kan, ki ga ki gir kpaln ujojoor ngbaan aatiŋ la. Ki ye waatiŋ la, le ki ga li ye u ni ujapɔtiib aatiŋ ki cha n‑yoonn mɔmɔk. 18Ujojoor ngbaan taa gaa unii ubaa aatiŋ u chee. Baah di kitiŋ ki tii u na ponn ni le u ga ŋmaa gii tii ujapɔtiib, nima kan, waan ŋmaa muk maanib ki gaa baatiŋ bi chee.”

Uwumbɔr Aadichal aafan aabɔr

19Uja ngbaan nan di mi buen tidir ti lik ŋŋangan wɔb ki bi gbɔk mbisamɔb mu bi kichinbik aaŋangii wɔb na chee. Tidir timina ye chain, le ki ye bitotoorb aadir. U nan mɔk mi libuul libaa ni tidir ngbaan aawilir wɔb, 20le ki bui ke, “Do chee na le bitotoorb ga ŋaa titunwanbir aatork, ni lipɔln aateem aatork aanann, ki ken n‑yon aatork aamaab, nima kan, tiwan ni bi chain na aan nya buen lichinjal ni, nin chee ni ga ŋmaa tii binib titotonn na.”

21-22U nan ki di mi buen lichinjal ni, ki ti mɔk mi ke lichinjal ngbaan aalɔlɔnn tinaa ngbaan mɔmɔk kpa nchinbim mu aafɔfɔk ye ŋitaa imonko itaa ni ŋiniin, aan nwawaan mu ye ŋitaa imonko ilee ni ŋiniin na. 23Kichinbik mɔk nan kpa ŋitakpal aagoln li gob li na, le ifan tab ligoln mɔk. 24Uja ngbaan nan bui mi ke, “Ifan imina ponn ni le Uwumbɔr Aadichal ni aatutum ga ŋaa binib aah toor kitork ki na aanann.”

Currently Selected:

Esekiel 46: xonB

Highlight

Copy

Compare