Esekiel 45

Uwumbɔr aah yeh lipepel li kitiŋ ngbaan pu na

1Bi yaa yakr Israel aatiŋ ke linibol mɔk kan laatiŋ kan, lipepel libaa li ye Uwumbɔr yaan. Laafɔfɔk li ye mal kipiik aah fɔk pu na, le nwawaan li ye mal biniin aah fɔk pu na. Lipepel ngbaan ga li ye chain. 2Lipepel limina ponn ni le bi ga gii Uwumbɔr Aadichal aapaan mu aafɔfɔk ni nwawaan ye ŋitaa ikui iniin ni imonko ilee, aan mpaan mu mann mu ki ti ton na li ye ŋitaa imonko inaa ni ŋinaa. 3Lipepel limina aageln li aafɔfɔk ga li ye mal kipiik aah fɔk pu na, aan nwawaan mu ga li ye mal binaa aah fɔk pu na, ga nya li ponn ni; nima le Uwumbɔr Aadichal ga sil. Uwumbɔr Aadichal aapaan ngbaan le ga li ye chain chain aapepel ŋi mɔmɔk ni. 4Nima le ga li ye chain aapepel, litingbaln ngbaan ponn ni, le bi nyan li di siin bitotoorb bi tun Uwumbɔr aatuln Waadichal ni na. Nima chee le bitotoorb aadichal ni Uwumbɔr Aadichal ga sil. 5Ligeln li gur na le ga li ye Liifai yaab bi tun Uwumbɔr Aadichal ni aatuln na aawan. Ntim mu ponn ni bi ga li koo na ga li bi nima chee la.

6Mpaan mu aafɔfɔk ga li ye mal kipiik, aan nwawaan mu ye mal bilee na li bi chain aapepel limina chee, ki li ye kitiŋ ki ponn ni Israel aanii umɔk gee na ga ŋmaa koo na.

Israel yaab aajojoor aatiŋ aabɔr

7Kitiŋ ga ki li bi, ki ye Israel yaab aajojoor aapaan. Mu ga piin chain aapepel aawilir wɔb le ki yoor kina ki ti ker Kaasisik ni Aanyusakpem mɔk; ki nya liwipuul wɔb aanaanmɔk kina ki ti ker litingbaln ngbaan aawipuul aatinaanmɔk, aan mpaan ngbaan aafɔfɔk, ni baah yakr kitiŋ pu tii Israel aanibol libaa na aatiŋ aafɔfɔk li ŋak tɔb. 8Mpaan ngbaan le ujojoor na ga li kpa Israel aatiŋ pu, nima kan, waan ki muk binib kitiŋ pu, u ga cha litingbaln ngbaan ni gur na li ye Israel aanibol yaan.

Ujojoor na aah ga li dii isan i na aabɔr

9Tidindaan Uwumbɔr len ke, “Nimi Israel aatiŋ aajojoob, ni tun titunwanbir ni yunn sakpen. Di cha nimi aabimbipɔɔl ni limukl man. Li ŋani tiwan ni ŋan ki tok na man. Ni taa ki jenn nyan maanib baatiŋ pu daalbaadaal. Min Nidindaan Uwumbɔr le bi tuk nimi kina.

10“Unii mɔmɔk li joo tiwaŋaŋkaan ni ye nibamɔnn na ŋaŋni tiwan.

11“Tiwan ni, ni ga di ŋaŋ tiwan ni kuur na, ni tiwan ni, ni ga di ŋaŋ nnyun aawan na li ŋak. Kina pu na, tiwaŋaŋkaan ni unii mɔmɔk nan nyi na le nan ye homer. Kina pu na, tiwan ni, ni ga li joo ŋaŋni na sɔ:

Homer ubaa ye efa tiib kipiik, ki mu ye baf tiib kipiik.

12“Tiwan ni, ni ga li joo ŋaŋni tiwan aanyunyuun na sɔ:

Gera tiib moninko li ye sekel ubaa.

Sekel tiib imonko itaa li ye mina ubaa.

13“Isan imina pu le ni ga li dii ki tii nimi aapiin: Ni yakr naah chee nimi aajikaabim mu na ŋiker imonko itaa ki di liker libaa tii mi ipiin, 14ki yakr olif aakpan ŋiker nkub ki di liker libaa tii mi ipiin. Ni di baf aawaŋaŋkaan ŋaŋ ni: baf tiib kipiik li ye homer ubaa, homer ubaa mu li ye kor ubaa. 15Ni nyan upiih ubaa Israel aapihkpaamook aapiih ikui ilee ni tii mi ipiin.

“Ni li joo ni njikaabim aatork, ni tiwakor ti ni ga di see mmii ni timɔnn na, ni kimɔbaan aatork nan tii mi, aan ki kan chapinn nimi aatunwanbir pu. Min Nidindaan Uwumbɔr le siin kina.

16“Kitiŋ ngbaan aanib mɔmɔk ga di ipiin imina di buen Israel yaab aajojoor na chee. 17Ni ye uma le aatuln ke u ban tiwakor ti bi ga di see mmii ni timɔnn na, ni njikaabim aatork, ni ŋisubil aadaan aapiin i bi ga di toor Israel aatimbol mɔmɔk pu Uŋmapɔɔn Aajim ni, ni Likpaakool aawiin aatork, ni njim muken aatork ni na. Uma le ga ban titunwanbir aatork, ni njikaabim aatork, ni kitork ki bi ga di see mmii ni na, ni kimɔbaan aatoor, ti ga nyan Israel aanib aatunwanbir na.”

Njim aabɔr

(Nnyam 12.1-20; Liifai Yaab 23.33-43)

18Tidindaan Uwumbɔr bui ke, “Njan aaŋmal aajan aawiin daal kan, ni kɔr unaaja u kaa kpa iween ibaa na ki finn Maadichal. 19Utotoor ga di titunwanbir aatork kee aasin ngem yɔk yɔk Maadichal aajaaleŋ aadɔja, ni kitork aabimbiln aamɔju inaa na pu, ni kichinbik aabisamɔi aadɔja pu. 20Ni ki ŋa kina aatork winlole daal, unii umɔk aa nyi ki tun titunwanbir na pu. Kina le ni ga cha Maadichal li bi chain.

21“Uŋmal ngbaan aawiin kipiik ni inaa daal le ni ga piin Lakr‑jer Aajim. Unii mɔmɔk ga li ŋmɔ boroboro u kaa kpa boroboro aanyɔk na ki ti saa iwiin ilole. 22Njim ngbaan aajan aawiin daal kan, ujojoor na ga di unaaja toor, u ni binib mɔmɔk aatunwanbir pu. 23Njim ngbaan aawiin mɔmɔk daal kan, u ga kɔr inaaja ilole, ni ipihja ilole i kaa kpa iween ibaa na tii min Uwumbɔr, ki di i see mmii ni imɔn. U ga kɔr uŋoja nwiin mɔk aan u li ye titunwanbir aatork. 24U ga di njikaabim kuruwaa biniin, ni olif aakpan kpalba bitaa kpee unaaja mɔk, ni upihja mɔk pu.

25“Ujojoor ngbaan ga ki ban nwiin mɔk ki ti saa iwiin ilole titunwanbir aatork, ni kitork ki bi ga di see mmii ni na, ni njikaabim, ni nkpan ke waah ban pu Lakr‑jer Aajim ni na, le ki di toor Tikakar Aajim mu piini ŋmalole aawiin kipiik ni iŋmu daal na.”

Currently Selected:

Esekiel 45: xonB

Highlight

Copy

Compare