Esekiel 44

Liwipuul wɔb aabisamɔb aabɔr

1Uja ngbaan nan ki di mi buen mbisamɔb mu bi liwipuul wɔb Uwumbɔr Aadichal aapaan ni na chee. Mbisamɔb ngbaan nan lak la, 2le Uwumbɔr bui mi ke, “Mbisamɔb mumina ga li lak kina la, mu aan lakr daalbaadaal. Min Israel yaab Aadindaan Uwumbɔr aah dii mu koo ni na, unibɔn ubaa aan ki dii mu. Mu ga li lak kina le ki cha. 3Israel yaab aajojoor na ga ŋmaa buen nima chee ti ji chain aajikaar nnimbiin ni. U ga dii mbisamɔb mu dii ponn ni aanaakɔsamɔb na le ki ki dii nima chee nya.”

Binib aah ga li koo Uwumbɔr Aadichal ni pu na aakaal

4Uja ngbaan nan ki yoor mi dii ŋŋangan wɔb aabisamɔb nyan ki di mi fuu Uwumbɔr Aadichal aabisamɔb wɔb. Maah si lik na, le m nan kan ke Uwumbɔr aawiihn mu deer ŋinimbil na gbiin Waadichal ni. M nan tar lir kitiŋ lichichikr, 5le Uwumbɔr bui mi ke, “Unibɔn, likr aanimbil ki chuu tiwan ni mɔmɔk aa kan ki ŋun na mbamɔm. M ban m tuk si Maadichal aakaal ni laakoobil la. Li nyi binib bi kpa nsan ke bi koo ki nya Maadichal ni na, ni binib bi kaa kpa kina aasan na.

6“Tuk Israel aamɔyiib ngbaan ke min Bidindaan Uwumbɔr aan ki gaa baah ŋani tiwan ni aan ni sukr ponn ni na. 7Buyoonn bi bi joo kitork aawakor aakpan ni nsin tii mi na, le bi cha biwɔwɔm bi kaa gii ŋichakpan ki ye binib bi kaa kii maamɔb na koo ni Maadichal ni ki bii li. Kina le maanib ŋani tiwan ni sukr ponn ni na ki yii maah puu tipuur ti na tii bi. 8Baa tun Maadichal aatuln li bi chain na, ki tee di li ŋa biwɔwɔm aaŋaal ni.

9“Min Dindaan Uwumbɔr le bui ke biwɔwɔm bi ye binib bi kaa gii ŋichakpan, ki yii maamɔb na ubaa aan koo Maadichal ni, hali uwɔwɔnii u koo Israel aanib chee na ubaa aan koo li ni.”

Liifai yaab aan tun utotoor aatuln

10Uwumbɔr nan ki bui mi ke, “M ban m daa Liifai yaab ni Israel aanib bi gur ki nan yii mi ki dooni ŋiwaa na aatafal la. 11Bi ga ŋmaa li yeh Maadichal aabisamɔi, ki tun Lidichal ngbaan ponn ni aatun ŋiken ke maatutum na. Bi ga ŋmaa kɔr tiwakor ti binib joo ni bi nan toor kitork ki bi joo seer mmii ni na, ni titoor tiken, ki li ka binib aatuln pu. 12Tɔ, min Bidindaan Uwumbɔr puu tipuur kpaan ke baah nan toor ŋiwaa aatork tii Israel aanib, ki di bi koon titunwanbir aatun ni na, see bi kan ntafadaan. 13Baa kpa nsan ke bi tun lituln li ye chain m chee na, kaan koo Chain Chain Aapepel ni. Baah tun ŋitun ŋi sukr ponn ni na aatafadaan le na. 14M joo Maadichal ni aanaagbiituln le tii bi.”

Bitotoorb aabɔr

15Tidindaan Uwumbɔr nan ki len ke, “Bitotoorb bi ye Liifai aanibol ni yaab, ki ye Sadok aayaabitiib na ma nan beenin tun maatuln Maadichal ni mbamɔm, buyoonn Israel aanib bi gur na nan fenn bipuwɔb tii mi na. Kina pu na, bima le ga ŋmaa tun maatuln ki sil nnimbiin ni, ki di kitork aawakor aakpan ni nsin tii mi. 16Bima baanja le ga koo Maadichal ni, ki tun lituln maatork aabimbiln taab, ki loln nsan Maadichal aadoon ni. 17Bi yaa ti koo Maadichal aachinbik aabisamɔb ni kan, bi di ŋitanyaan aawan peen. Bi yaa bi lituln ni, ki bi kichinbik ni, bee Maadichal ni kan, bi taa pee tiwan ni bi di tiwakor aakor ŋa ni na. 18Nima kan, kitotoŋ aan naa bi. Bi di ŋitanyaan aatan buu biyil, ki li yii ŋitanyaan aataadalk, ki taa buu ŋigbapapan. 19Waahr aan bi nin nya lichinjal ni, binib aah bi nin chee na, bi chuu peer baah ba bi Maadichal ni lituln ni ki pee tiwan ni na bil chain aadir ni. Bi peen tiwayayan aan baawanpeenkaan ni ye chain na taa tii binib ngbaan titotonn tibaa.

20“Bitotoorb taa kuu biyikpir, ki mu taa cha ti li fɔk sakpen. Bi li chee ti pu aan ti ŋeer. 21Bitotoorb taa nyu ndaan waahr ki nin koo kichinbik ni. 22Utotoor ubaa taa yoor upii u aachal yii u na; u yoor Israel aapiibo u kaa nyi uja na, bee utotoor uken aakpopii.

23“Bitotoorb le ga mɔk maanib tiwan ni ye chain na, ni ni kaa ye chain na, ki mɔk bi tiwan ni kɔ na, ni ni kaa kɔ na. 24Tibɔr yaa ŋa kan, bitotoorb le ga di maakaal aah mɔk pu na toor ti. Bi li joo maasan aadiim aajim aasan, ni yaah mɔk pu na, ki li joo Likpaakool daal aawiin chain.

25“Utotoor taa meeh linikpol ki ŋa ubaa tijɔŋ aanii, see ni ye ute, bee una, bee waabo ubaa, bee ute ni una aabo ubaa, bee uninkpan u kaa mɔn tichar na. 26U yaa nan nyan tijɔŋ ngbaan ni kan, u cha iwiin ilole jer waahr, 27aan u nin koo Maadichal aachinbik ni, ki ti toor kitork ki ŋa ubaa chain, aan ki nin ki ŋmaa tun Maadichal ponn ni aatuln. Min Dindaan Uwumbɔr le len kina.

28“Maah di tiwan ni tii bitotoorb Israel yaab ponn ni ke bi li joo nabr biyaabisɔsɔk na le ye maatork aatuln. Baa kpa lifaal libaa Israel aatiŋ pu; baawan mɔmɔk le ye min. 29Bitotoorb aajikaar le ga li ye njikaabim aatork, ni titunwanbir aachapinn aatork, ni lipɔln aateem aatork, bima ki yeh tiwan ni mɔmɔk bi nyan Israel aatiŋ pu ki di tii mi na. 30Bitotoorb le yeh njan aajikaar nyaan ti bi puen chee na, ni tiwan ni mɔmɔk bi di toor kitork tii mi na. N‑yoonn mu mɔmɔk Israel aanib puen ŋa boroboro na, bi di njan aaboroboro kpiln tii bitotoorb, aan ni li ye ipiin ki tii mi. Nima kan, maanyoor ga li bi baadichal pu. 31Bitotoorb taa ji unyoon, bee kiwakork ni kpo kibaa pu na, bee kiwakork kiken aah ku ni na.”

Currently Selected:

Esekiel 44: xonB

Highlight

Copy

Compare