Esekiel 43

Uwumbɔr aah gir ni Waadichal ni pu na

1Uja ngbaan nan ki di mi buen mbisamɔb mu lik liwipuul wɔb na, 2le m kan nima chee nwiihn mu deer ŋinimbil na nyan ni liwipuul wɔb ki ye Israel yaab Aawumbɔr aawiihn. Uwumbɔr aaneel nan ŋuun ke nnyusakpem aafuuk na, le nwiihn mu deer ŋinimbil na woln kitiŋ pu chain. 3Tidaŋ aawan ngbaan bi ke maah nan kan ni aan Uwumbɔr choo u nan kuln Jerusalem aatiŋ na, ni maah ti kan ni mu Kebar Aamɔɔl chee na la. M nan tar lir kitiŋ lichichikr. 4Nwiihn mu deer ŋinimbil na nan dii liwipuul wɔb aabisamɔb le ki koo Uwumbɔr Aadichal ni.

5Uwumbɔr Aafuur Nyaan aapɔɔn nan fiin mi siin ki di mi buen kichinbik na ni, nima chee le m ti kan Uwumbɔr aawiihn aah gbiin Waadichal pu na. 6Uja ngbaan nan si nima chee, le m ŋun Uwumbɔr bi Waadichal ni ki len ni m chee tibɔr ke: 7“Unibɔn, maabɔrjal sɔ do. M ga li bi do, maanib Israel yaab aakaasisik ni, ki li joo bi cha n‑yoonn mu kaa kpa ndoon na. Israel aanib, bee baabɔrb aan ki dii ŋiwaa, kaan ki sub baabɔrb do chee na ki jinn maayimbil li bi chain na inimɔɔn daalbaadaal. 8Bibɔrb nan ŋa baanaakɔsamɔi ni baajaaleŋ tiib aadɔ tam Maadichal aabisamɔi, ni laajaaleŋ aadɔ la, le ligoln baanja le nan bi tikaasisik ni. Bi nan ŋani tiwan ni sukr ponn ni na mɔmɔk le ki jinn maayimbil li bi chain na inimɔɔn, le maaŋuul ponn ni m kuln bi. 9Dandana, bi di cha ŋiwaa aadiim ki kur baabɔrb aakpab. Bi yaa ŋa kina kan, m ga li bi bikaasisik ni ki ti saa n‑yoonn mu kaa kpa ndoon na.”

10Uwumbɔr nan ki nab ke, “Unibɔn, bui Israel aanib Maadichal aabɔr, ki cha bi lik ki bee laabimbin. Cha inimɔɔn chuu bi baatunwanbir aatun pu. 11Tɔ, inimɔɔn yaa chuu bi baah ŋa pu na pu kan, aa ŋeer Maadichal ngbaan aabimbin aah bi pu na: laah ga li bi pu na, laabisamɔi i bi ga li diir koo na, ni i bi ga li diir nya na, laasisii aah ga li bi pu na, ni tiwan mɔmɔk aah ga li si nin chee na, ni laakaal ni ŋikoobil mɔmɔk. Ŋmee ni mɔmɔk bil aan bi ga ŋmaa kan tiwan mɔmɔk aasisii, ki ga ŋmaa dii laakaal. 12Maadichal aakaal sɔ: Mpaan mu mɔmɔk mann goln li lijool ngbaan paab na ye chain chain ki ye min yaan la.”

Kitork aabimbiln aabɔr

13Kitork aabimbiln aaŋaŋ sɔ: tiwanbaan ni bi di ŋaŋ Uwumbɔr Aadichal na le bi di ŋaŋ li mu. Libimbiln ngbaan aataab nan kpa nnyunsan, le ki mann li ti ton, ki ye ŋisaŋ ŋitaa ni ligeln aafɔfɔk, le nwawaan mu ye ŋisaŋ ŋitaa ni ligeln ngbaan, ki kpak nkool ngbaan le mu aah paa pu na ye lisaŋ libaa ni ligeln. 14Libimbiln ngbaan aataataab, ki nyan litaab aapaacham mɔk nan ye ŋitaa ŋitaa aah paa pu na la. Liker li nan paa na nan piin puwɔb ki nyan mmɔju na mɔk ki ye ŋisaŋ ŋitaa ni ligeln ki mann li ti ton, le liker ngbaan aah paa pu na ye ŋitaa ŋilole. Liker li mu nan paa na mu nan piin puwɔb ki nyan mmɔju na mɔk ki mu ye ŋisaŋ ŋitaa ni ligeln. 15Paab aaker limina pu le bi nan seer kitork aawan, ni mu aah nan paa pu na ye ŋitaa ŋilole la. Imɔju i nan bi tilɔlɔnn tinaa ngbaan ni na nan paa jer paacham ngbaan mɔmɔk. 16Libimbiln ngbaan aapaacham nan ye likpakpaln la, le ki ye ŋitaa moninko ŋipepel ŋinaa ngbaan mɔmɔk pu. 17Paacham ngbaan aakaasisik ni mu nan ye likpakpaln, le ki ye ŋitaa moninko ni ŋinaa ŋipepel ŋinaa mɔmɔk pu, le ki kpa likɔl lipaal wɔb ki ye lisaŋ libaa ni ligeln aah paa pu na. Nnyunsan na aawawaan ye ŋisaŋ ŋitaa ni ligeln la. Ŋibimbin ŋi pu bi nan taar joi chaa kitork aabimbiln ngbaan chee na, nan bi liwipuul wɔb la.

Baah ga toor pu ki di libimbiln ngbaan tii Uwumbɔr pu na

18Tidindaan Uwumbɔr nan bui mi ke, “Unibɔn, li pel maah tuk si pu na mbamɔm. Bi yaa maa kitork aabimbiln doo kan, aa see kitork li pu aan li kpaln min yaal, ki di tiwakor ti bi di toor kitork ngbaan na aasin yɔk yɔk li pu. 19Bitotoorb bi ye Liifai aanibol ni aanib ki ye Sadok aayaabitiib na baanja le ye binib bi ga ŋmaa sil nnimbiin ni ki tun maatuln na. Min Bidindaan Uwumbɔr le siin kina. Aa ga tii bi linaajabil le bi di toor titunwanbir aatork. 20Aa ga di waasin ngem gbaa gbaa imɔju i bi libimbiln ngbaan aalɔlɔnn ni na, ni libimbiln ngbaan aakaasisik ni aalɔlɔnn na mu, ki gbaa mann igbaan mɔmɔk ti ton. Kina le aa ga toor ki ŋa li chain ki di li ŋa m yaal. 21Aa di unaaja u bi di toor titunwanbir aatork na ti see mmii ni, libuul li yeh kina aatuln na ni, Maadichal aagbaan. 22Kitaak yaa woln kan, aa di uŋoob u kaa kpa iween ibaa na ki toor titunwanbir aatork. Aa di u mu aasin toor ŋa libimbiln ngbaan chain ke saah fe di unaaja aasin ŋa pu na. 23Aa yaa ŋa kina doo kan, ban linaajabil, ni upihjabo i kaa kpa iween ibaa na, 24ki li joo ni i m chee. Bitotoorb ga di n‑yaan yɔk yɔk i pu, ki di i see mmii ni, aan ni li ye kitork ki tii mi. 25Iwiin ilole ponn ni, aa li joo uŋoob, ni unaaja, ni upihja toor titunwanbir aatork nwiin mɔk. I mɔmɔk taa li kpa iween ibaa. 26Bitotoorb ga li toor ki ŋani libimbiln ngbaan chain ki gor li kiir kitork ki ti saa iwiin ilole. 27Likpaakool ngbaan yaa jer kan, bitotoorb ga piin ki li seer binib aatork ki bi joo seer mmii ni na, ni kimɔbaan aatork, libimbiln ngbaan pu. Nima le nsui ga li piin ni mɔmɔk pu. Min Nidindaan Uwumbɔr le len kina.”

Currently Selected:

Esekiel 43: xonB

Highlight

Copy

Compare