Esekiel 42

Ŋidichal ŋilee ŋi bi duun Uwumbɔr Aadichal na aabɔr

1Uja ngbaan nan di mi nyan lichinjal ni, ki di mi buen lidichal li bi Uwumbɔr Aadichal aaŋangan wɔb na chee, laa nan daa lidichal li bi Uwumbɔr Aadichal aawilir wɔb na. 2Lidichal ngbaan aafɔfɔk nan ye ŋitaa nkub ni imonko itaa ni ŋiniin, le nwawaan ye ŋitaa imonko inaa ni ŋinaa. 3Laapepel libaa nan lik mpaan mu kpak Uwumbɔr Aadichal ki ye ŋitaa piitaa ni ŋiniin la, le lipepel liken na lik lichinjal aakɔl na. Bi nan maa li tɔŋ tɔb pu nfum mutaa pu la, le liker li tɔk taab aaker pu na nyan puwɔb, le litatar na ti moo nyan puwɔb ki jer lileler na. 4Nsan nan bi lidichal ngbaan aaŋangan wɔb, le mu aah nan waa pu na ye ŋitaa kipiik ni ŋiloob, le nfɔfɔk ye ŋitaa nkub ni imonko itaa ni ŋiniin, le ki kpa saah ga dii nin chee koo na lisikakl. 5Tidir ti nan bi paacham aaker ni na aa nan waa ke sisik ni, ni taab aaker na, ba pu? li nan moo nyan puwɔb ki jer ŋiken na. 6Ŋiker ŋitaa ngbaan mɔmɔk aadir nan si ŋikɔl pu la, kina pu na, jaatɔlk tiib aa nan tek ti ke ŋidichal ŋi nan bi lichiln ngbaan ni na. 7-8Liker li bi taab na aapaal aagoln nan po ye ŋitakpal ŋmeen le ki ti saa ŋitaa imonko inaa ni ŋinaa, laafɔfɔk ligeln le na; le ligeln li gur ki mu ye ŋitaa imonko inaa ni ŋinaa na kpa tidir. Paacham aaker na ma nan ye tidir ŋmeen le ki ti saa nfɔfɔk ngbaan mɔk. 9-10Tidir tilee timina aataab, lidichal ngbaan aawipuul wɔb, nin chee lichiln piin na, mbisamɔb nan bi ki cha lichinjal ni.

Uwumbɔr Aadichal aaŋangii wɔb na, lidichal limina aaboln nan bi nima, kaa daa lidichal li bi Uwumbɔr Aadichal aawilir wɔb na. 11Nsan nan bi tidir ngbaan aabisamɔi wɔb ke mu bi ŋŋangan wɔb na. Mu ni mu aafɔfɔk, ni nwawaan nan ye tiwanbaan la, le baah ŋa i pu na mu ye tiwanbaan kina, le ibisamɔi mu ye kina. 12Jaaleŋ nan bi tidir ngbaan aataab, lidichal aaŋangii wɔb, ligoln aah piin liwipuul wɔb nin chee na.

13Uja ngbaan nan bui mi ke, “Ŋidichal ŋilee ŋee mɔmɔk ye chain la. Ŋima ponn ni le bitotoorb bi chaa Uwumbɔr aanimbiin ni na ji chain chain aatork aajikaar. Tidir ngbaan aah bi chain na, nima chee le bitotoorb ga di chain chain aapiin, i ye njikaabim aatork, ni titunwanbir aatork, bee lipɔln aateem aatork na siin. 14Bitotoorb yaa koo Uwumbɔr Aadichal ni ki ban bi nya lichinjal ni kan, bi peer baah ba pee chain aawanpeenkaan ni ki tun Uwumbɔr aanimbiin ni lituln na bilni nima chee la. Bi ga di tiwanpeenkaan yayan le peen ki nin nya buen binib aah kuun nin chee na.”

Uwumbɔr Aadichal aapaan aaŋaŋ aabɔr

15Uja ngbaan aah nan ŋaŋ Uwumbɔr Aadichal ponn ni aapaan doo na, le u di mi dii liwipuul wɔb aabisamɔb nyan ki ti ŋaŋ lipaal aapaan mu. 16U nan yoor tikur aadabil li bi joo ŋaŋni tiwan na, le ki ŋaŋ liwipuul wɔb aapepel, le mpaan ngbaan nan ye ŋitaa ikui iniin ni imonko ilee. 17-19U nan ŋaŋ ŋŋangan wɔb aapepel, ni ŋŋangii wɔb, ni liwilir wɔb aapepel mu; le ŋi mɔmɔk aafɔfɔk nan ye ŋitaa ikui iniin ni imonko ilee, 20kina pu na, ligoln li nan gob lidichal ngbaan na nan ye ŋitaa ikui iniin ni imonko ilee le ŋipepel ŋinaa ngbaan mɔmɔk pu. Ligoln ngbaan aatuln le nan ye ke li yakr tiwan ni ye chain na, ni kaa ye chain na chee.

Currently Selected:

Esekiel 42: xonB

Highlight

Copy

Compare