Amos 6

Israel aatiŋ aah ga bii pu na

1Nimi bi bi dafir Sionn aatiŋ ni, ni nimi bi dak ke ni kan limɔfal Samaria aatiŋ ni na, naan nan li ŋan ni pu, nimi bi ye linibokpaan Israel na aaninkpiib, nimi bi binib biken chaa ni chee ki ti ban nterm na, 2li cha ti lik man Kalne aatisakpeŋ na, ki buen man Hamaf aatisakpeŋ ki kpa mpɔɔn na, ki sunn buen Filistia yaab aatisakpeŋ Gaf chee. Mu aa ŋan ki jer Juda ni Israel aanaan. Le mu aatingbaan mu aa wiir jer nimi yoo. 3Nimi, ni yii kaa kii ke nwiin mundaal tiwan mɔmɔk ga bii na choo, le naah tee ŋani pu na le moo joo nwiin ngbaan duuni nimi. 4Nimi bi dɔ nimi aawandookaan ni diin ki ŋan na pu, ki ji n‑yaan ni nkpan na, naa ga nan li ŋan tii nimi kpala. 5Ni gee ke ni li naani ilahn ke David aah nan naani pu na, ki joo gbaa tibar. 6Ni nyu ndaan tiyikur ti wiir na ponn ni, ki ŋani tulalee tiib bi nu mɔ sakpen na, kaa tee wii Israel aah ga bii pu na aakpowiil. 7Kina pu na, nimi le ga puen buen tinaagbiir ni. Le nimi aajim mɔmɔk ga doo.

8Tidindaan Uwumbɔr Mpɔɔnsakpiindaan le tii nsurm mumina: “M nan Israel yaab aagaak, kaa neen baadichasakpiin ŋi kpa kinyaan ni tiwan mɔmɔk na. M ga di baatiyil ni tiwan ni mɔmɔk bi ki ponn ni na di tii baadim.”

9Binib kipiik le yaa gur lidichal ni kan, bi ga kpo. 10Utekpel aado yoo, u yeh waakpuul na, le ga yoor linikpol ngbaan nyan lidichal ngbaan ni. Udo yoo ngbaan ga yin unii umɔk gur lidichal ngbaan ni na ki baa ke, “Unii ubaa ki gur ki bi aa chee ee?”

Le nneel ga kii ke, “Aayii.”

Le udo yoo ngbaan ga bui ke, “Li ŋmin suuna. Ti ga chuu tibaa le ki taa ki yin Uwumbɔr aayimbil.”

11Uwumbɔr yaa tii waamɔboln kan, ŋidichasakpiin ni ŋiwaatiir mɔmɔk ga wii yuk yuk. 12Itaan san ŋitakpasakpiin pu uu? Bijab joo inaaja ko nima aa? Le nimi tee di ibamɔn kpaln njinn, ki di mbamɔn kpaln inyamɔn.

13Ni puk kipupuk ke ni nyaŋ Lo Debar#6.13: Lo Debar aatataa le ye ke “naa ye nibaa”. aatiŋ. Ni puk kipupuk ke, “Ti nan pɔɔ ki nyaŋ Karnayim#6.13: Karnayim aatataa le ye ke “iyiin” le naatataa ye ke mpɔɔn. aatiŋ.”

14Tidindaan Uwumbɔr Mpɔɔnsakpiindaan ubaa le len ke, “Israel aanib, m cha ke m ti joo ni bijab bi kaa ye Israel yaab na, le bi nan gaa nimi aatiŋ. Bi ga muk nimi, nimi aatim mɔmɔk ni, ki nya Hamaf aasan mu bi liwipuul aaŋangan wɔb na ki ti saa Araba aakpen mu bi liwipuul aaŋangii wɔb na.”

Currently Selected:

Amos 6: xonB

Highlight

Copy

Compare