Amos 7

Itoon aadaŋ

1Tidindaan Uwumbɔr le kpiir tiwan nimina mɔk mi tidaŋ ponn ni. Tidaŋ ngbaan ponn ni m nan kan u naan itoon buyoonn bi chee ubɔrkpaan aamoor ki doo aan timopɔln ki bi tukni na. 2Maadaŋ ngbaan ponn ni m nan kan itoon ngbaan ŋman tiwan nimɔk soon na kitiŋ ngbaan pu doo, le m bui ke, “Ndindaan Uwumbɔr, di cha pinn saanib. Bi ga ŋa kinye ki ŋmar? Bi par le kaa kpa mpɔɔn.”

3Le Uwumbɔr kpeln waalandak ki bui ke, “Saah kan tiwan ni na aan ŋa kina.”

Mmii aadaŋ

4Tidindaan Uwumbɔr le nan ki kpiir tiwan nimina mu mɔk mi tidaŋ ponn ni. Tidaŋ timina ponn ni m nan kan ke u gor ubaa ke u di mmii daa waanib aatafal. Mmii ngbaan nan cha nnyusakpem mu dɔ kitiŋ kee aataab na foor, ki piin ki bi wu kitiŋ mu. 5Le m bui ke, “Ndindaan Uwumbɔr, di cha. Saanib ga ŋa kinye ki ŋmar? Bi par pam kaa kpa mpɔɔn mubaa.”

6Le Uwumbɔr ki kpeln waalandak ki bui ke, “Nimina mu aan ki ŋa kina.”

Likpaln li bi joo ŋaŋni tiwan na aadaŋ

7Uwumbɔr nan ki kpiir tiwan nimina mɔk mi tidaŋ ponn ni. M nan kan u, le u si gbɔk ligoln li bi di likpaln li bi joo tukni tiwan ni tuk na maa li na, le ki joo likpaln uŋaal ni, 8le u baa mi ke, “Amos, aa waa ba?”

Le m bui u ke, “Likpaln li bi joo ŋaŋni tiwan na.”

Le u bui mi ke, “M joo li ke m di mɔk si ke maanib naahn ligoln li bi maa li aan laa tuk na la. Maan ki kpeln maalandak maah ga daa bitafal pu na. 9Nin chee Aisak#7.9: Aisak nan ye Israel yaab aayaaja ubaa la. aayaabitiib nan mee min Uwumbɔr na mɔmɔk ga bii doo. Israel yaab aameen aadir mɔmɔk ga kpaln ŋilangben ŋi ber doo na la. M ga kuln ubɔr Jeroboam aanaan.”

Amos ni Amasia

10Amasia, u nan ye utotoor ki bi Betel aatiŋ ni na, le nan tun ti tuk Israel aabɔrkpaan Jeroboam ke: “Amos chuun ban isan binib chee ke u nyan si nnaan ni la. Waabɔlen ga bii litimbol lee doo. 11Waah len pu na sɔ: ‘Jeroboam ga kpo butɔb ni, le Israel aanib aadim ga chuu bi ki di buen kitiyayaŋ ni.’”

12Amasia aah nan tuk Amos pu na sɔ: “Uwumbɔr aabɔnabr, nima ngbaan ŋeer kina. Gir li cha Juda ki ti li mooni Uwumbɔr aabɔr nima, ki cha bi pa si tibɔr ngbaan pu. 13Taa ki nabr Uwumbɔr aabɔr Betel aatiŋ pu do kpala. Ubɔrkpaan aah dooni Uwumbɔr nin chee na sɔ, linibol lee Aameen Aadichal le na.”

14Le Amos bui u ke, “Maa ye ubɔnabr. Unii ubaa mu aa mɔk mi Uwumbɔr aabɔnabr aatuln. M ye upihkpaal la, le ki lik ŋisubil aasui mu. 15Le Uwumbɔr chuu nyan mi maapihkpaal ponn ni ki bui mi ke m ti nabr waabɔr tuk waanib Israel yaab. 16Kina pu na, li pel Uwumbɔr aah len pu dandana wee na. Aa bui ke m di cha libɔnabr ki taa ki mooni tibɔbir Israel aanib pu. 17Kina pu na, Uwumbɔr le len sin Amasia chee na, ‘Aapuu ga kpaln upiidagoor le kitiŋ kimina ponn ni, le bi ga ku saabim mu butɔb ni. Bi ga yakr saatiŋ tii biniyayam, le sin aabaa ga ti kpo kitiyayaŋ ni la. Le bidim ga sil chuu Israel yaab ki di bi buen kitiyayaŋ ni.’”

Currently Selected:

Amos 7: xonB

Highlight

Copy

Compare