Rum 3

Haɗ mndu ta nzakway tɗukwa wa

1Ndaw malaghuta la *Yahuda ka lamndu? Nu ghəzliwa tsatá fafaɗ na? 2Ndaɗaʼa nzakwa ni ta nghadaptá lu ta nghay nghay wu, kabga tiŋəl ŋa taŋ vlagata Lazglafta ta gwaɗa ni. 3Ka si kwalaghu kwala sanlaha ma həŋ ta zlghafta ná, dzaʼa pyaf pya tsa slna palamapalama taŋ ya ta nzakwa Lazglafta ka ŋərma ra? 4Pyaf a wu! Dər má ta tsakalawi inda mnduha ná, kahwathwata ŋa Lazglafta ta mnay, manda ya nda vinda ma deftera Lazglafta kazlay:

« kagha Lazglafta,

ka gwaɗa gwaɗa ka ta gwaɗa ná, nda sna lu kazlay:

tɗukwa tsa gwaɗa gha ya kəʼa.

Dər má tsafha lu ta rutsak ta kagha,

fləwəɗ dzaʼa saba ka ma guma ni. »#3:4 Ngha ta Zabura 51:6.

5Ka si tsa ghwaɗaka skwi ta mag amu ya dzaʼa maraŋtá nzakwa Lazglafta tɗukwa katsi ná, nu ka mu dzaʼa mnay tama? Dzaʼa mnay mu kazlay: Tɗukwa a Lazglafta wu kəʼa tsamaghar tsi ta guma rki? Ma tsa vli ya ná, manda va ya gwaɗ lamndu gwaɗata yu ta tsa gwaɗa ya. 6Mantsa a wu! Ka tɗukwa a Lazglafta wu katsi ná, wa kaʼa dzaʼa tsa guma ta ghəŋa mnduha na?

7Ka si tsa tsakalawa ɗa ya ta malaghutá kligiŋta kahwathwata Lazglafta, ka nzaku tsi ŋa vlaŋtá glaku katsi, kabgawu dzaʼa kəl lu ka tsaɗighatá guma kazlay: Mnda dmaku ka kəʼa tama? 8Ka si mantsa ya tsi ní, nu kwal lu kul mnay kazlay: Magama dmaku kada saba skwi ɗina kəʼa? Nu kul mag lu manda ya ta tsaŋnavata sanlaha ta gwaɗa kazlay: Mantsa ya ta mna həŋ kəʼa nda aŋni ya na? Nda ra ka tsanaghata Lazglafta ta guma ta tsa mnduha ya.

Gaga inda mnduha ta dmaku

9Kinawu nzakwa ni tama! Malaghu mala amu la *Yahuda ka hamata gwal kul nzakway ka la Yahuda rki? Malaghu a amu wa. Ka yu mnata kay ná, nda la Yahuda tani, nda la *Grek tani, hahəŋ demdem nzanagha nza dmaku ta həŋ. 10Nda nza manda ya nda vinda ma deftera Lazglafta kazlay:

Haɗ mndu tɗukwa ta wa ira Lazglafta wu, dər turtuk haɗ wa.

11Haɗ mndu nda sna ta skwi wu, haɗ ya ta psa Lazglafta wa.

12Inda taŋ mbəɗana mbəɗa həŋ ta hul ta Lazglafta,

nda zaɗa həŋ demdem. Haɗ ya dər turtuk ta maga skwi ɗina wu,

dər turtuk haɗ wa.

13Wa taŋ ná, manda gunatá kulu nzakwa ni.

Nda ghanika taŋ ta nana həŋ ta mnduha.

Ghwana mupuhwa ma huta ta wa taŋ.

14Dagala ksiʼi nda ŋaslu ma wa taŋ.

15Nda tsəra səla taŋ ŋa dzaʼa dzata mndu.

16Inda tvi lab hahəŋ ná, nda hwanzaɓa inda vli,

ta wahu inda mnduha.

17Sna a həŋ ta tva zɗaku wa.

18Haɗ zləŋa Lazglafta#3:18 Ngha ta Zabura 14:1-3 nda 53:2-4 nda 5:10 nda 140:4 nda 10:7 nda Isaya 59:8 nda Zabura 36 2. da həŋ ɗekɗek wa.

19Aŋ mndani, nda sna amu ka kazlay: Inda skwi ta gwaɗ zlahu ná, ŋa gwal vla Lazglafta ta tsa zlahu ya ŋa taŋ ta gwaɗa tsi kəʼa. Tsaya tama ná, haɗ mndu nda pslaftawi ta kəma Lazglafta wu, kada snaŋta inda mndu kazlay: Gaga həŋ ta dmaku ta kəma ni kəʼa. 20Tsaya tama, haɗ mndu dzaʼa nzakway ka mndu tɗukwa ta kəma Lazglafta ta ghəŋa vəl magata ni ta skwi ta kum zlahu wa. Zlahu ná, nda nza ŋa snanamtá mnduha kazlay: Gaga kuni ta dmaku kəʼa.

Zlghay nda ŋuɗuf ta nanaftá mndu ka mndu tɗukwa

21Ndana tama, maranaŋ mara Lazglafta ta tvi ta mnduha dzaʼa kəl həŋ ka nzakway ka tɗukwa mnduha ta kəma ni. Tsa nzaku tɗukwa ya ná, nda ma zlahu a ta nzakwa lu wa. Mnaŋ mna zlaha Musa nda la anabi guli ta gwaɗa ta ghəŋa ni. 22Tsaya tvi dzaʼa kəl Lazglafta ka nanaftá mnduha ka gwal tɗukwa ta kəma ni ya nda nza nda ma zlghafta dər wa ta *Yesu *Kristi. Haɗ ya galap Lazglafta, dər la *Yahuda dər gwal kul nzakway ka la Yahuda wa. 23Inda taŋ gaga həŋ ta dmaku trap tra həŋ ma snaŋtá sgita Lazglafta. 24Ka zɗanaŋta Lazglafta ta huɗi ta həŋ ka mbalay, ka nanaftá həŋ ka gwal tɗukwa ta kəma ni nda ma Yesu Kristi ta pligiŋtá həŋ ma dmaku. 25Tsa Yesu Kristi ya vla Lazglafta ŋa mtuta ni ta ghəŋa inda mnduha ka planatá dmakwa taŋ nda usa ni nda ma zlghafta taŋ ta Yesu Kristi ŋa maraŋta kazlay: Tɗukwa tsatsi kəʼa. Tsa dmaku si ta mag mnduha ghalya ya ná, ka nzata Lazglafta manda skwi kul nghaŋta, 26ksana ksata ŋuɗufa ni. Manda va tsaya ta mara Lazglafta ndana guli kazlay: Tɗukwa tsatsi kəʼa. Tsatsi, tɗukwa tsatsi. Ta kumay guli ta nanafta ka gwal tɗukwa ta gwal ta zlghaftá Yesu.

27Ka si mantsa tsi tama ní, ta mamu skwa ghuba ghəŋ nda tsa tama rki? Haɗ wa. Kabgawu? Kabga zlghay nda ŋuɗuf ŋərma skwi, snanatá skwi ta kum zlahu a wa. 28Nda sna amu kazlay: Nda ma zlghay nda ŋuɗuf mutsafta mnduha ta nzata ka gwal tɗukwa ta kəma Lazglafta kəʼa, nda ma snatá skwi ta kum zlahu a wa. 29Lazglafta ná, ŋa la Yahuda nda ghəŋa taŋ ra? Lazglafta gwal kul nzakway ka la Yahuda a guli ra? Mantsa nzakwa ni, Lazglafta gwal kul nzakway ka la Yahuda ya guli, 30kabga turtuktuk Lazglafta. Tsatsi dzaʼa nanafta ka gwal tɗukwa ta gwal nda tsa fafaɗa taŋ nda ma zlghay nda ŋuɗufa taŋ. Tsatsi dzaʼa nanafta ka gwal tɗukwa ta gwal kul nzakway ka la Yahuda nda ma zlghay nda ŋuɗufa taŋ guli. 31Ma tsa zlghafta zlghaf mu ya tama guli ná, hərɗiŋ hərɗa mu ta zlahu ra? Hərɗiŋ amu wu, katək ná, ŋlanafta ŋlanaf mu ta zlahu.

Currently Selected:

Rum 3: xed

Highlight

Copy