Mak 6

Kwalaghuta gwal ma Nazaret ta zlghaftá Yesu

Mat 13:53-58, Luk 4:16-30

1Ka sliʼaftá *Yesu ka zlaŋtá tsa vli ya ka laghu da luwa ta glakwa ni.#6:1 Ngha ta Mata 13:54. Ka laghu duhwalha ni mista ni. 2Baɗu Sabat, ka lam Yesu da tagha skwi ŋa mnduha ma həga tagha skwa la *Yahuda. Ká ka nda ndəghata mnduha hada ta sna tsa skwi ta tagh tsi ya. Ka ndərmim həŋ nda ndərmima: « Wa ta taghanaftá mndərga nana ma skwi? Wa ta vlaŋtá mndərga nana ma ɗifil ta kəl tsi ka maga nana ma mazəmzəmha na? 3Tsa mnda fiɗi ta nzakway ka zwaŋa Mari#6:3 Gray nda Yuhwana 6:42. ya a na mndu na kay ra? Zwaŋama ni ma i Yakubu nda Yuses, nda Yuda, nda Simuŋ a tsi kay ra? Mataba mu a kwaghama ni kay guli ra? » ka həŋ. Ka nzaku Yesu ka skwa tuthun da həŋ. 4Ka Yesu nda həŋ tama mantsa: « Ta vlay lu ta glaku ŋa anabi ma sana vliha, ama ma luwa ni, nda ya mataba la taŋ nduk nda ya ma həga ga taŋ#6:4 Gray nda Lukwa 4:24, Yuhwana 4:44. ná, haɗ lu ta vla glaku ŋa ni wa, » kaʼa. 5Tsaya kəl Yesu ka kwal kul magaŋtá mazəmzəm hada. Ka laghu tsi ksaŋta nda dzvu ta sanlaha ma mnduha kul ɗughwanaku, ka mbambanaftá tsi ta həŋ. 6Ka ndərmim Yesu nda ndərmima ta tsa kwala taŋ kul zlghaftá tsatsi nda ŋuɗuf ya.

Ghunafta Yesu ta duhwalha ni ghwaŋpəɗ his

Mat 10:5-15, Luk 9:1-6

Tahula tsa, ka sliʼaftá Yesu ka laghu da ra zwana luwa ta hula Nazaret. Ka tatagha skwi ŋa mnduha. 7Ka hagaftá tsi ta duhwalha ni ghwaŋpəɗ his ŋa ghwanafta ni ta həŋ his his his da luwaha. Ka valaŋtá tsi ta mbraku ta həŋ ŋa ghazligiŋtá ghwaɗaka sulkum. 8Ka zlahanaghatá tsi ta həŋ kaʼa mantsa: « Ta sliʼi kuni ya, dafa kweŋkweŋ dzaʼa kuni klafta ma dzva ghuni, yaha kuni klaftá skwa zay, nda dər zliba ghuva, yaha kuni klaftá tsedi ma zlibi. 9Yaha kuni klaftá mahisa lgut. 10Ka lam la kuni da luwa katsi, ka nzata kuni ga mndu ya ta tsuʼaftá kaghuni, ha ka sagha fitik dzaʼa kəl kuni ka sliʼafta ma tsa vli ya. 11Ka mamu gwal ma sana vli dzaʼa kwal kul tsuʼafta kaghuni ta kwalaghutá sna gwaɗa ghuni katsi, ka sliʼapta kuni ma tsa vli ya, ka tukwiŋta kuni ta rgitika tsa luwa ya ta səla ghuni. Tsaya dzaʼa maraŋtá nzakwa dmakwa taŋ ta ghəŋa taŋ, » kaʼa nda həŋ. 12Ka sliʼaftá həŋ ka laghu da mnay ŋa mnduha, ka həŋ mantsa: « Mbəɗanafwa mbəɗa ta nzakwa ghuni, ka mnigiŋta kuni ta dmakwa ghuni, » ka həŋ. 13Ka ghazligiŋtá həŋ ta ghwaɗaka sulkum ma mnduha, mbambanafha həŋ ta ndəghata gwal kul ɗughwanaku nda masanavata rɗi ta həŋ#6:13 Gray nda Yakubu 5:14.

Mtakwa Yuhwana mnda maga Batem

Mat 14:1-12, Luk 9:7-9

14Mantsa, ka snanaghatá tsa gwaɗa ta gwaɗ lu ta *Yesu ya ta mgham Hiridus, kabga laghu la hga ni da zərwa. Ka lu ta mnay tida na: « Tsa Yuhwana mnda maga batem ya kay ya ta sliʼagabta ma mtaku, tsa ta kəl tsi ka maga mazəmzəmha, » ka lu. 15« Iliya ya tane, » ka həŋ. « Sana anabi ta gara vgha nda sani mataba anabiha ghalya ya, » ka sanlaha nda ŋa taŋ. 16Ama manda kɗakwa Hiridus ta snaŋta tsaha ya: « Tsa Yuhwana tsaghu yu ta ghəŋa ni ya kay ya ta sliʼagabta nda hafu, » kaʼa. 17Kəl Hiridus ka mnata ksaftá Yuhwana ná, kabga gwaɗa ta Hiridiya ta nzakway ka markwa zwaŋama ni Filip#6:17 Ngha ta 8:27. klu tsi ka marakw, 18si kəl Yuhwana ka mnay ŋa Hiridus kazlay: Ra a ka klay gha ta markwa zwaŋama gha wu,#6:18 Ngha ta Zlahu 18:16, 20:21. kaʼa nda tsi. Kəl Hiridus ka ghunaftá sludza ni ksaftá Yuhwana ka tsamta ma ziɗa. 19Tifin ɓasanava ɓasa Hiridiya ta ŋuɗuf ta Yuhwana kabga tsa gwaɗa ya, ka zbə tsi ta tvi ŋa dzata ama triɗ trap tra ta tva ni. 20Vərɗa dər Hiridus ná, ta zləŋay ta Yuhwana. Nda sna guli kazlay: Mndu nda ghuɓa Yuhwana, ŋərma mndu ya kəʼa ka katə tsi. Inda nzata Hiridus ka sna gwaɗa ta gwaɗ Yuhwana ya ná, ta dəwir nda dwira ta ghəŋa ni dər má ɗvaf ɗva tsi ta snay. 21Ma sana fitik tama, ka mutsafta tsa Hiridiya ya ta tvi ŋa dzatá Yuhwana. Tsa fitik ya ná, baɗu fata Hiridus ta skala havakta fitika yakwa ni ya. Baɗu tsaya, ka hagaftá Hiridus ta mnduha. Tsa mnduha hagaf tsi ya, gwal dagala dagala ta wanafta, nda mghamha ta ghəŋa sludziha, nda gwal klu lu ta haɗika Galili ya. 22Baɗu va tsaya tama, ka lam makwa tsa Hiridiya ya ka skalu ta kəma tsa mnduha ta tskavata ya. Ka zɗanaftá tsa skala ni ya ta ŋuɗufa Hiridus nda tsa gwal hagaf tsi ya tani. Ka Hiridus nda tsa makwa ya mantsa: « Ka nu dzaʼa kumafta maya gha ya, ɗawiha ɗawa dzaʼa vlagha vla yu, » kaʼa. 23Ka waɗanatá tsi. Kaʼa mantsa: « Skwi ya dzaʼa ɗawaŋta kagha da iʼi ná, dzaʼa vlagha vla yu, dər má slɓahwa luwa ɗa tsi, » kaʼa. 24Ka ndagaptá tsa makwa ya ka laghu mnay ŋa ma ni. Tahula mnanata ni, ka ɗawu tsi da ma ni. Kaʼa mantsa: « Nu dzaʼa yu ɗaway tama? » kaʼa. Ka ma ni zlghaftá wa ni mantsa: « Ɗawa ta ghəŋa Yuhwana mnda maga batem, » kaʼa nda tsi. 25Ka gi vrəglaghutá tsi slanaghatá mgham ka ɗaway da tsi: « Ta kumay yu ta vlihata gha ndana ndana ta kwambleh ta ghəŋa Yuhwana mnda maga batem, » kaʼa. 26Suʼanak ká mgham nzata. Lavgliŋ a ta sɗanafta wu, kabga nda ghada waɗanatani ta kəma tsa gwal hagaf tsi ya. 27Ka gi ghunaftá tsi ta sludzi turtuk mataba gwal ta nghay kaʼa nda tsi mantsa: « La ka tsagaghata ka ta ghəŋa Yuhwana mnda maga batem, » kaʼa. 28Ka sliʼaftá tsa sludzi ya ka laghu da gamak, ka tsagaghatá ghəŋa Yuhwana mnda maga batem ta kwembleh. 29Manda snaŋta duhwalha Yuhwana ta tsa skwi ya, ka lagha həŋ klaghata mbla ni ka laghu paɗamta.

Zunusta Yesu ta skwa zay ta mnduha dəmbuʼ hutaf

Mat 14:13-21, Luk 9:10-17, Yuh 6:1-14

30Mbaɗa tsa duhwalha si ghwanagha *Yesu ya ka varakta. Ka tskavatá həŋ ta vata Yesu, ka rusa skwi si maga həŋ, nda skwi ya si ta tagh həŋ ŋa mnduha. 31Ka Yesu nda həŋ mantsa: « Mbaɗma ta wa mazawa, ka nzata kuni ka hlaptá hafu hada, » kaʼa. Haɗ fitika taŋ ŋa mutsaftá dər zaŋta dər skwa zay wu, kabga ndəghata mnduha ta zazavaɗaku katakata hada. 32Ka sliʼaftá hahəŋ hahəŋ ka dzaʼa ma kwambalu da sana vli ta wa mazawa. 33Ta sliʼi həŋ, nda ndəgha mnduha ta nghiŋtá həŋ, ka tsəmaftá həŋ. Ka gazlatá inda mnduha ma luwa, ka dzaʼa nda səla da tsa vli ta dzaʼa i Yesu nda duhwalha ni ya, ka tiŋlaghutá həŋ ta ɓhadaghata, kabga ta hway nda hwaya hahəŋ. 34Manda ɓhadaghata Yesu, ka sab tsi ma kwambalu. Kəʼa kəʼa ná, tizlik tskata mnduha, ka ksaŋtá həŋ katakata ta Yesu ka hiɗahiɗa, kabga nda nza həŋ manda tuwakha kul haɗ mnda ngha#6:34 Gray nda Mbsak 27:17, 1 Mghamha 22:17, Azekiyel 34:5-6. həŋ, ka gi nzatá tsi ka tagha skwiha ŋa taŋ. 35Manda ya nda ghada laghwa fitik, ka lagha duhwalha ni mnay ŋa ni. Ka həŋ mantsa: « Wana ma mtak lu hadna, laghu la fitik guli, 36mnana mna ta na mnduha na, ka sliʼa həŋ da luwa, nda ya da zwana luwaha ta wafta na vli na, ka dzaʼa həŋ skwa skwiha ŋa zay taŋ, » ka həŋ. 37Ama ka Yesu nda həŋ mantsa: « Vlaŋwa vla kaghuni ɓa ta skwa zay ta həŋ, » kaʼa. Ama ka həŋ nda tsi mantsa: « Ŋa sliʼa ŋni da dzawaktá buradi prək ka tseda vagha mnduha his dərmək ta maga slna#6:37 Ngha ta Mata 20:2., ka valaŋtá həŋ ŋa zay taŋ rki? » ka həŋ. 38Kaʼa nda həŋ mantsa: « Kidaghi buradi da kaghuni na? Naghawa nagha » kaʼa. Naghanata taŋ, ka həŋ mantsa: « Buradi hutaf nda tsulhwa klipi his ya, » ka həŋ. 39Ka Yesu nda duhwalha ni mantsa: « Mnanawa mna ta mnduha ka nza nzata həŋ ka ghuɓu ka ghuɓu ta kuzuŋa mkwenek, » kaʼa. 40Ka tsakavatá mnduha, ka nza nzata dərmək dərmək ma ya vli, hutaf mbsak hutaf mbsak ma ya vli. 41Ka hlaftá Yesu ta tsa buradi hutaf, nda tsulhwa klipi his ya. Ka nghadaftá tsi nda ta luwa ka rfanaghatá Lazglafta. Tahula tsa mantsa, ka ɓalanaptá tsi ta tsa buradi ya, ka valaŋtá duhwalha ni, ŋa daganaftá tsa mnduha ya. Mantsa guli, ka daganaftá tsi ta tsa tsulhwa klipi his ya ta həŋ. 42Inda taŋ demdem ka zazutá həŋ, ka babaghawtá həŋ. 43Ka tskaftá lu ta paɗakwa tsa buradiha nda klipiha ya ka ghwanak ghwaŋpəɗ his.#6:43 Gray nda 2 Mghamha 4:42-44. 44Gwal ta za tsa buradi ya ná, mnduha dəmbuʼ hutaf ya.

Mbaɗay Yesu ta mbaɗa ta drəf

Mat 14:22-33, Yuh 6:15-21

45Tahula tsa, gi ka mblafta *Yesu ta duhwalha ni ka lam da kwambalu ŋa dzaʼa taŋ ta sana ɓla drəf nda təv luwa Betsayda, ta kəɗ tsatsi ta vriŋtá dəmga ŋa laba tsatsi nda hul nda hul slanaghatá həŋ. 46Manda dgata ni ta vgha nda tsa mnduha ya, ka sliʼaftá tsi ka laghwi ta ghwá da maga duʼa. 47Lama vli da rviɗik ya ná, ɓhatá tsa duhwalha Yesu ya tsa nda kwambalu ma takataka drəf. Tata haɗik Yesu turtukwa ni. 48Kəʼa ka Yesu nghadapta ná, ta takaɗaku duhwalha ni ka swa kwambalu, kabga mamu falak ta vra həŋ. Wər ta tsughbura sərɗək vli, ka sliʼaftá tsi ka mbaɗa ta drəf nda səla, ŋa dzaʼa nda da həŋ, ka kum tsi ta klatá wa taŋ. 49Kəʼa ka həŋ ná, mamu skwi ta mbaɗa ta imi, zlah halalay ya, ka həŋ ka wahu. 50Nda ngha inda taŋ demdem, ka ghudzaku həŋ ta ghudzaku da zləŋ. Ka gi gwaɗganatá Yesu ta həŋ. Kaʼa nda həŋ mantsa: « Ma wahu kuni ta wahu, iʼi ya, ma zləŋ kuni ta zləŋ! » kaʼa nda həŋ. 51Ka lagha tsi, ka lam da tsa kwambalu ya nzata ta vata həŋ. Ka gi lɓata tsa falak ya tɓekw. Ka laghu tsa duhwalha ni ya da ndərmimay katakata. 52Ma ŋa snaŋta taŋ ta mbrakwa Yesu nda mazəmzəm maga tsi nda buradi ya ná, lanamə a ta həŋ wu, kabga təŋ təŋa ghəŋa taŋ.

Mbambanafta Yesu ta mnduha ma Genazaret

Mat 14:34-36

53Tahula tsughwaɗapta taŋ ta drəf, ɓhadaghar həŋ ta haɗika Genazaret, ka hbanata həŋ ta kwambala taŋ ta wa drəf hada. 54Manda saba taŋ ma kwambalu, ka tsəmafta mnduha ta *Yesu. 55Tsəmafta taŋ, ka sliʼaftá həŋ nda hwaya da mnay ma inda vliha. Ka tsakwə həŋ nda ghəzləŋa taŋ nda ghəzləŋa taŋ ta gwal kul ɗughwanaku, da inda vli snaŋ həŋ kazlay: Hada Yesu kəʼa. 56Ma inda dər wati ma vli tsi ta lagha Yesu, dər ma zwana luwa tsi, dər ma huɗa luwa tsi, ka dər tahula luwa a tsi, ta hladagha hla lu ta gwal kul ɗughwanaku ka pghata ta daɓi. Ka ndəɓu lu ta dzvu da tsi, ŋa ksaŋta dər wa lguta ni tsi kweŋkweŋ. Inda gwal ta ksaŋta ná, nda mbamba həŋ.

Currently Selected:

Mak 6: xed

Highlight

Copy

Compare