Mak 7

Gwaɗa i Yesu nda la Farisa ta ghəŋa tagha skwa dzidzi

Mat 15:1-9

1Ka sliʼagata tsa la *Farisa nda sanlaha ma gwal tagha zlahu ŋa mnduha ya ma Ursalima, ka tskavata tavatá *Yesu. 2Ka nghaŋtá həŋ ta sanlaha ma duhwalha Yesu ta za skwa zay nda ŋratá dzvu, mbaziŋ a həŋ manda ya taghanaf dzidzíha taŋ ta həŋ wa. 3Tsaw la Farisa nda sanlaha ma la *Yahuda ya ná, haɗ həŋ ta za skwa zay ka ta mbaza a dzva taŋ tsuweɗek ɗina, manda ya taghanaf dzidzíha taŋ ta həŋ wa.#7:3 Gray nda Lukwa 11:38. 4Ka vragagha vra həŋ ta luma, haɗ həŋ ta za skwa zay ka ta mbazaghu a həŋ ta mbaza wa. Mamu ndəghata sana skwiha guli taghanaf dzidzíha taŋ ta həŋ ta mag həŋ manda: Tva mbazapta ɗina ta kuwa, nda bəzleghwa, nda siga kfur. 5Mbaɗa la Farisa nda gwal tagha zlahu ŋa mnduha ka ɗawaŋta da Yesu. Ka həŋ mantsa: « Nu kul haɗ duhwalha gha ta maga skwi taghaf lu da dzidzíha, ta kəl həŋ ka za skwa zay kul mbaziŋtá dzvu na? » ka həŋ. 6Ka Yesu nda həŋ mantsa: « Tsa maɗgwirmaɗgwira ghuni ya. A ta ŋa Isaya ta mnay ta ghəŋa ghuni, manda ya nda vinda mnə na Lazglafta kazlay:

nana mnduha na ná, ta wubisim ta wubisim ta zləzlva həŋ ta iʼi. Ma ŋuɗufa taŋ ná, ɗva a həŋ ta iʼi wa. 7Zləzləva iʼi ta zləzlvu həŋ ná, ka bətbət. Ma ŋa taghay taŋ ta zlaha ɗa ŋa mnduha ná, ka laghu həŋ da ŋanatá zlaha mnduha#7:7 Ngha ta Isaya 29:13., » kəʼa ya.

8Zlanava zla kuni ta zlaha Lazglafta, ka laghu kuni da sna skwi ya ta taghu mnduha. 9« Nda hiɗa kuni kahwata ta wuɗiŋtá zlahuha Lazglafta, ka ŋanatá ŋa ghuni ma skwa dzidzí. 10Wya ka Musa: “Vla ta glaku ŋa i da gha nda ma gha,” kaʼa. Kaʼa guli na: “Mndu ta razanaftá i da ni nda ma ni, dzaʼa dza dza#7:10 Ngha ta Sabi 20:12 nda Vrafta ta Zlahu 5:16 nda Sabi 21:17 nda Zlahu 20:9. lu,” kaʼa. 11Ama ka kaghuni ta mnay ŋa mnduha ná, laviŋ lava mndu ta mnay ŋa i da ni nda ma ni kazlay: Si má ta kumay yu ta vlaghatá skwi ŋa kataghata, ɗaw laviŋ a yu wu, kabga kwarbaŋ ya manda mnay kazlay: Dzaʼa vlaŋtá Lazglafta yu kəʼa. 12Mantsa ya tama ta mbla kuni ta tsa mndu ya, ŋa kwal kul kataŋta i da ni nda ma ni. 13Ma tsa magay ghuni mantsa ya tama ná, ta mbəɗiŋ mbəɗa kuni ta gwaɗa Lazglafta, nda mndərga tsa tagha skwa ghuni ya ŋa mnduha. Nda ndəgha mndərga sana skwiha ta mag kuni manda ɗaslakwa tsaha ya. »

Skwi ya ta ŋəriŋta mndu

Mat 15:10-20

14Tahula tsa, ka hagəglaktá *Yesu ta dəmga da tsi. Kaʼa nda həŋ mantsa: « Gunawa guna ta sləməŋa ghuni ɗina, ka mnaghunata yu. 15Haɗ skwi ta zadata mndu nda za ta ŋəriŋta mndu wa, ba skwi ta sab nda sa ma ŋuɗufa mndu ta ŋəriŋta mndu, » kaʼa. 16[Ka mamu mndu nda sləməŋa snay ka sna tsi.] 17Manda sliʼafta Yesu ka laghu da həga dgarə tsi ta vgha nda dəmga, ka ɗawaŋtá duhwalha ni da tsi ta ghəŋa tsa gray graf tsi ya. 18Kaʼa nda həŋ mantsa: « Aʼa, haɗ ɗifil ma ghəŋa kaghuni guli ra? Sna a kaghuni guli kazlay: Haɗ skwi ta zadata mndu nda za ta laviŋtá ŋəriŋta mndu wu kəʼa ra? 19Haɗ tsa skwi ta zadata mndu nda za ya ta dzaʼa da ŋuɗufa mndu wu, da huɗi ta dzaʼa tsi ŋa dzaʼa thidiŋta ma dra, » kaʼa. Tsa gwaɗa Yesu ya ná, ta kumay ta mnay kazlay: *Nda ghuɓa inda skwa zay#7:19 Gray nda Slna gwal ghunay 10:9-16. kəʼa. 20« Skwi ta sab nda sa ma ŋuɗufa mndu ná, tsaya ta ŋəriŋta mndu, 21kabga ma ŋuɗufa mndu ta sliʼagabta ghwaɗaka ndanuha, nda sliʼiŋsliʼiŋ, nda ghali, nda psla mnduha, 22nda hliri, nda haraʼu ta iri, nda sidi, nda nənɓa mndu, nda kakraŋaku, nda ghudzaku, nda vza rutsak ta mndu, nda gla ghəŋ, nda ga rgha. 23Inda tsa ghwaɗaka skwiha ta sliʼagapta ma ŋuɗufa mndu ya ta ŋəriŋta mndu, » kaʼa nda həŋ.

Zlghay nda ŋuɗufa sana marakw

Mat 15:21-28

24Tahula tsa, ka sliʼaftá *Yesu hada ka laghwi ta haɗika Tir nda Tsiduŋ. Ka lam tsi da sana həga. Va a si ta snaŋta mndu kazlay: Waʼa hadya kəʼa wa, ama laviŋ a ta ɗifaghuta wa. 25Mamu sana marakw ksu halaway ta makwa ni, ka snaŋtá tsi ta mna gwaɗa ta Yesu. Ka gi sliʼaftá tsi ka lagha zləmbatá ma ghuva Yesu. 26Ka ndəɓu tsi ta dzvu da tsi ŋa ghəzligiŋtá tsa duhwala halaway ya ma tsa makwa ni ya. Tsa marakw ya ná, makwa la *Grek ma luwa Finusi, ya lu ta haɗika Siri ya. 27Ka Yesu nda tsi mantsa: « Zlaŋ zla ta zwani karaku ka baghafta həŋ. Ɗina a ka klaftá ɗuvula zwani ka vlaŋtá zwana kriha wa, » kaʼa nda tsi. 28« Mantsa nzakwa ni mndani mghama ɗa, ama ta ɗagay zwana kriha ta wiwsa tsa skwa zay ta rkadata ta haɗik ma vəl zay zwani ya guli, » ka tsa marakw ya. 29Kaʼa nda tsi mantsa: « Kabga tsa gwaɗa gha ya, la makwa ɗa dzagha gha, waʼa saghu sa tsa duhwala halaway ya ma makwa gha » kaʼa nda tsa marakw ya. 30Ka sliʼaftá tsa marakw ya ka laghu dzagha ni. Ɓhadaghata ni dzagha ka lam tsi da həga, ka slanaghatá tsi ta tsa makwa ni ya ta hani ta ghəzləŋ. Ta haɗ tsa duhwala halaway ya mida wa.

Mbanafta Yesu ta sana rgha kul snaŋta sləməŋ

31Tahula tsa, ka sliʼaftá *Yesu ta haɗika Tir, ka laghu nda ma luwa Tsiduŋ, ka zlagaghatá tsi nda ma *Dekapwalus ŋa vru nda təv drəfa Galili. 32Ɓhadaghata ni da hada, ka klanaktá lu ta sana mndu ka rgha, sna a ta sləməŋ wu, sna a ta gwaɗa guli wa. Ka ndəɓu lu ta dzvu da tsi ŋa ksaŋta nda dzvu ka mbafta tsi. 33Ka klaghatá Yesu ta tsa mndu ya turtukwa ni, diʼiŋ nda mnduha. Ka dzadzaghatá Yesu ta ndəfiŋa dzvuha ni da sləməŋha tsa mndu ya, ɗanafha ta sərɗəkani ta ghanik. 34Ka nghadaftá Yesu nda ta luwa, ka hlafta tsi ta hafu. « Efasla, » kaʼa. Manda mnay kazlay: Guna guna kəʼa ya, nda gwaɗa luwa taŋ. 35Gi wuzlaŋ guna guna sləməŋha tsa mndu ya, gi wuteɗ plata ghanika ni tsa, ka gwaɗ tsi ta gwaɗa tsəleŋ. 36Ka dvanaghatá Yesu ta mnduha yaha həŋ da mnay dər ŋa wati ma mndu tsi. Ka dvu Yesu ta həŋ ya ná, ka sgə hahəŋ ta mna tsa skwi maga Yesu ya. 37Ka ndərmim həŋ katakata, ka həŋ mantsa: « Inda skwi ta mag na mndu na na, ɗina. Nduk nda rgha tani ná, ka gwananatani ta sləməŋhani, ka gwaɗay ni ta gwaɗa. Kay! Skwi ɗina ta mag na mndu na, » ka həŋ.

Currently Selected:

Mak 7: xed

Highlight

Copy

Compare