Lev 14
14
Tva kliŋta skwi ta tsaɗ lu ta vgha mndu
1Ka Yawe nda Musa mantsa: 2« Wya tva skwi ŋa magay ta nghanaghata mndu nda ghwaɗaka lku tida baɗ ghuɓata. Dzaʼa kladagha kla lu da mnda dra skwi ŋa Lazglafta, 3ta dzaʼa sabi ma ghuɓu ŋa dzaʼa da vitsanavata. Ka kəʼa kəʼa nghanavata, nda mba tsa mndu nda ghwaɗaka lku tida ya, 4dzaʼa mnanafta mna mnda dra skwi ŋa Lazglafta ka klafta lu ŋa tsa mndu dzaʼa kliŋta lu ta skwi ta tsaɗ lu tida ya ta ɗyakha his kul haɗ skwa tsaɗ tida, ta ndiri, nda udza sedra, nda sləvdza swida tuwak ka dva ghəlez, nda sluhwa izwap. 5Dzaʼa mnaf mna mnda dra skwi ŋa Lazglafta kazlay na, ka ghwanafta lu ta ya turtuk ma tsa ɗyakha ya ta siga rɓisl ndəgham lu ta ima dzuɓay mida kəʼa. 6Tsa sana ɗyak ta ndiri ya, ŋa klafta ni kawadaga nda tsa udza sedra ya, nda tsa sləvdza swida tuwaka ka dva ghəlez ya, nda tsa sluhwa izwap ya, ka tsughumamtá həŋ, nda ɗyak ta ndiri tani, ma tsa usa ɗyak ghwaf lu ta ima dzuɓay ya. 7Ndəfáŋ səla kəʼa dzaʼa wutsikafta ta tsa mndu ta kliŋta lu ta skwa tsaɗa tida dabga tsa ghwaɗaka lku ya. Tahula tsa, ŋa mnanaŋta ni kazlay nda nza ka mndu kul haɗ skwa tsaɗa tida kəʼa, ŋa zlidiŋta ni ta tsa ɗyak ta ndiri ya da mtak.
8Dzaʼa ghuɓiŋ ghuɓa tsa mndu ta ghuɓu lu ya ta lgutha ni, htsiŋha ta inda swida ni, ka mbazaghutá mbaza ŋa nzakwa ni kul haɗ skwa tsaɗa tida. Tahula tsa, ŋa vradaghata ni da ghuɓu, ama ŋa nzaghuta ni mabli ka fitik ndəfáŋ kul lami da tumpula ni. 9Baɗ mandəfáŋa fitik, ŋa htsəgliŋta ni ta inda swida ni, nda ŋa ghəŋ tani, nda ghumay tani, nda vlikimha ni tani, ŋa htsiŋta ni ta inda swida ni. Ghwaɓiŋha ta lgutha ni, mbazaghutá mbaza, ŋa nzakwa ni kul haɗ skwa tsaɗa tida.
10Baɗ matghasa fitik, ka hlafta tsi ta slaɓalakwa tuwakha his kul haɗ maslivinza ta həŋ, nda daɓala tuwak turtuk vakwa ni kul haɗ maslivinza tida. Ka tsəɗaʼata tsi guli ta hpu kəzlitit ka kiluʼ təmbay hwaɗata ni nda rɗi ka mbəha nimaya, nda rita litəra rɗi. 11Dzaʼa kladagha kla mnda dra skwi ŋa Lazglafta ta maga tsa slna ya ta tsa mndu ŋa kliŋtá skwi ta tsaɗ lu tida ya, nda mbəhuha ni tani ta kəma Yawe ta wa tumpula guyaku. 12Dzaʼa klaf kla mnda dra skwi ŋa Lazglafta ta slaɓalakwa tuwak turtuk, ŋa vlata ni ka skwa pla ghəŋ ŋa paya tvi, nda rita litəra rɗi, ŋa zukwaŋta ni ta kəma Yawe. 13Dzaʼa ghwanaf ghwa ta tsa slaɓalakwa tuwak ya ma vla pla ghəŋ ŋa ɗawa pla dmaku, nda ŋa pla ghəŋ ŋa dray tsuh tsuh, ma vli nda ghuɓa. Skwa pla ghəŋ ŋa paya tvi ná, manda skwa pla ghəŋ ŋa ɗawa pla dmaku nzakwa ni, nda nza tsaya ka ŋa mnda dra skwi ŋa Lazglafta. Skwi ta ghuɓuta katakata ya. 14Dzaʼa taʼatá mnda dra skwi ŋa Lazglafta ta usa tsa skwa pla ghəŋ ŋa paya tvi ya, ka ɗuŋta ta wa daɓaraka sləməŋa zeghwa tsa mndu ta kliŋta lu ta skwi ta tsaɗ lu tida ya, magafha ta dadana dzva zeghwa ni nda ya ta dadana səla zeghwa ni. 15Dzaʼa taʼatá mnda dra skwi ŋa Lazglafta ta rɗi ma tsa rita litəra rɗi ya, ka pghamta ma guɗekwa dzva zlaɓa ni. 16Dzaʼa tsughumam tsughuma mnda dra skwi ŋa Lazglafta ta ndəfiŋa dzva zeghwa ni ma tsa rɗi ma guɗekwa dzva zlaɓa ni ya, ka wutsikatá tsa rɗi ya ndəfáŋ səla ta kəma Yawe. 17Ma pɗakwa tsa rɗi ma dzva ni ya, dzaʼa masaf masa mnda dra skwi ŋa Lazglafta ta daɓaraka sləməŋa zeghwa tsa mndu ta kliŋta lu ta skwi ta tsaɗ lu tida ya, magafha ta dadana dzva zeghwa ni, nda ya ta dadana səla zeghwa ni, ma va tsa vli magaf tsi ta usa skwa pla ghəŋ ŋa paya tvi ya. 18Dzaʼa magaf maga mnda dra skwi ŋa Lazglafta ta pɗakwa tsa rɗi ma dzva ni ya ta ghəŋa tsa mndu ta kliŋta lu ta skwi ta tsaɗ lu tida ya. Mantsa ya dzaʼa slərɓanapta mnda dra skwi ŋa Lazglafta ta zughu ta kəma Yawe. 19Tahula tsa, ŋa vlata mnda dra skwi ŋa Lazglafta ta skwa pla ghəŋ ŋa ɗawa pla dmaku, ŋa slərɓanaptá zughu ta tsa mndu ta kliŋta lu ta skwi ta tsaɗ lu tida ya, dabga nzakwa ni nda skwa tsaɗa tida ya. Tahula tsa ŋa ghwanafta ni ta tsa skwa pla ghəŋ ŋa dray tsuh tsuh ya. 20Dzaʼa vla vla mnda dra skwi ŋa Lazglafta ta gwir ta skwa pla ghəŋ ŋa dray tsuh tsuh, nda mbəha nimaya. Dzaʼa slərɓanap slərɓa mnda dra skwi ŋa Lazglafta ta zughu ta tsa mndu ya, dzaʼa nza nza ka mndu kul haɗ tsaɗa tida.
21Ka si ka pɗu tsa mndu ya, haɗ mbrakwa ni wu katsi, klafta ni ta slaɓalakwa maŋazak turtuk ŋa pla ghəŋ ŋa paya tvi ŋa zukwanaftá Yawe ŋa slərɓanaptá zughu. Tsəɗaʼaha ta hpu kəzlitit ka kiluʼ hkən hwaɗata ni nda rɗi, nda rita litəra rɗi, 22nda kukuha his ka zwana ghərbuʼ his a tsi, taɓta ya mutsaf tsi. Sani ŋa pla ghəŋ ŋa ɗawa pla dmaku, sani ŋa pla ghəŋ ŋa dray tsuh tsuh. 23Baɗ matghasa fitik, ŋa hlədanaghata ni ta tsa skwiha ya demdem ta mnda dra skwi ŋa Lazglafta, ŋa ghuɓata nda tsi ta wa tumpula guyaku ta kəma Yawe. 24Dzaʼa klaf kla mnda dra skwi ŋa Lazglafta ta tsa slaɓalakwa maŋazak ŋa pla ghəŋ ŋa paya tvi ya, nda rita litəra rɗi, ka zukwaŋta ta kəma Yawe. 25Dzaʼa ghwanaf ghwa ta tsa slaɓalakwa maŋazak ŋa pla ghəŋ ŋa paya tvi ya, ŋa klafta mnda dra skwi ŋa Lazglafta ta usa tsa skwa pla ghəŋ ŋa paya tvi, ŋa ɗuŋta ni ta wa daɓaraka sləməŋa zeghwa tsa mndu ta kliŋta lu ta skwi ta tsaɗ lu tida ya, nda ya ta dadana dzva zeghwa ni, nda ya ta dadana səla zeghwa ni. 26Dzaʼa taʼata mnda dra skwi ŋa Lazglafta ta rɗi, ka pghamta ma guɗekwa dzva zlaɓa ni. 27Dzaʼa wutsika wutsika mnda dra skwi ŋa Lazglafta nda ndəfiŋa dzva zeghwa ni, ndəfáŋ səla ta tsa rɗi ma guɗekwa dzva zlaɓa ni ya ta kəma Yawe. 28Dzaʼa magaf maga ta tsa rɗi ma guɗekwa dzva ni ya, ta daɓaraka sləməŋa zeghwa tsa mndu ta kliŋta lu ta skwi ta tsaɗ lu tida ya, nda ya ta dadana dzva zeghwa ni, nda ya ta dadana səla zeghwa ni, ma tsa vli magaf tsi ta usa skwa pla ghəŋ ŋa paya tvi ya. 29Dzaʼa magaf maga mnda dra skwi ŋa Lazglafta ta pɗakwa tsa rɗi ma guɗekwa dzva ni ya ta ghəŋa tsa mndu ta kliŋta lu ta skwi ta tsaɗ lu tida ya, ŋa slərɓanapta lu ta zughu ta kəma Yawe. 30Tahula tsa, ŋa vlata ni ta ya turtuk ma tsa kukuha ya, ka ya turtuk ma tsa zwana ghərbuʼ ya a tsi, taɓta ya mutsaf tsi ŋa vlata mnda dra skwi ŋa Lazglafta, 31ŋa vlata ni ta ya turtuk ŋa ɗawa pla dmaku, ya turtuk guli ŋa pla ghəŋ ŋa dray tsuh tsuh, nda mbəha nimaya. Mantsa ya dzaʼa slərɓanapta mnda dra skwi ŋa Lazglafta ta zughu ta kəma Yawe ta tsa mndu ta kliŋta lu ta skwi ta tsaɗ lu tida ya.
32Tsaya tva skwi ŋa magay ŋa ghuɓiŋtá mndu kul haɗ mbrakwa ni, ksu ghwaɗaka lku, » kaʼa.
Ghuɓa vata həga nda mavyavya tida
33Ka Yawe nda i Musa nda Haruna mantsa: 34« Ɓhadaghata ghuni da Kanʼana, haɗik ya dzaʼa vlaghunata yu ŋa ŋa ghuni, ka zlagigiŋ zlaga yu ta ghwaɗaka mavyavya ta sana həga ta haɗik ta nzakway ka ŋa ghuni, 35dzaʼa mnda tsa həga ya mnanaŋtá mnda dra skwi ŋa Lazglafta kazlay manda skwi mamu sana ghwaɗaka mavyavya ta zlagapta ta vata həga ga ini kəʼa. 36Dzaʼa mnaf mna mnda dra skwi ŋa Lazglafta ŋa hligiŋtá inda skwi ma tsa həga ya, makəɗ tsi lam da vitsanatá tsa vla mavyavya ya. Mantsa tama, haɗ inda skwi ma tsa həga ya dzaʼa nuta ka həga ta tsaɗ lu wa. Tahula tsa, dzaʼa lam la mnda dra skwi ŋa Lazglafta da vitsanata. 37Dzaʼa vitsana vitsa ta tsa vli ya. Ka kəʼa kəʼa nghanatá vli zazap mavyavya hruŋ hruŋ ta vata huɗa həga, ka kuzuŋkuzuŋ ka ka dvaŋdvaŋa a nzakwa ni, nda la la ta vata huɗa həga katsi, 38dzaʼa sab sa mnda dra skwi ŋa Lazglafta ma həga. Saba ni ta wa tgha, dzaʼa haf ha ta tsa həga ya ŋa fitik ndəfáŋ. 39Baɗ mandəfáŋa fitik, dzaʼa vradagha vra tsa mnda dra skwi ŋa Lazglafta ya. Ka kəʼa kəʼa, sgavagha sga tsa mavyavya ya ta vata huɗa həga katsi, 40dzaʼa mnaf mna, ka zlaɗapta lu ta palaha nda ksa da tsa mavyavya ya, ŋa laghwi da pghiŋta ma vli ta tsaɗ lu ta hula luwa. 41Dzaʼa hədzigiŋ hədza lu ta inda vli ma huɗa tsa həga ya, ŋa laghwi da pghiŋta ma vli ta tsaɗ lu ta hula luwa ta tsa haɗik dzaʼa hədzəgiŋta lu ya. 42Dzaʼa hlaf hla lu ta sanlaha ma palaha, ka dzihwamta da vla tsa palaha zlaɗgiŋ lu ya. Dzaʼa hlaf hla lu ta sana rɓisl ka sləhatá huɗa tsa həga ya.
43Tahula zlaɗiŋtá tsa palaha ya, nda ya tahula hədziŋtá kləwak ma tsa həga ya ka sləhəglata, ka zlagəglap zlaga tsa mavyavya ya ta tsa həga ya, 44dzaʼa vrəgladagha vra mnda dra skwi ŋa Lazglafta. Ka kəʼa kəʼa tamtá tsa mavyavya ya ta vgha ma tsa həga ya katsi, nda nza tsaya ka ghwaɗaka mavyavya kul laviŋtá lu ta hədziŋta. Nda nza tsa həga ya ka həga ta tsaɗ lu. 45Dzaʼa zlíŋ zla lu ta tsa həga ya. Palaha ni, nda udzuha tida, nda inda kləwak ni ka hlaghata pghidiŋta ma vli ta tsaɗ lu ta hula luwa.
46Ka lam la mndu da tsa həga ya ma tsa fitika hafta lu ya, nda nza tsa mndu ya ka mndu ta tsaɗ lu ha ga hawu. 47Ka hanam hana mndu ma tsa həga ya, ghwaɓiŋta ni ta lgutha ni. Ka zaŋ za mndu ta skwi ma tsa həga ya, ghwaɓiŋta ni ta lgutha ni.
48Ama ka vrəgladagha vra mnda dra skwi ŋa Lazglafta da tsa həga ya, kəʼa kəʼa sgavagha a tsa mavyavya ya tahula tsa sləhəglata ya wu, dzaʼa mnaŋ mna mnda dra skwi ŋa Lazglafta kazlay nda nza tsa həga ya ka həga kul tsaɗ lu kəʼa, kabga nda hla tsa mavyavya ya. 49Ŋa ghuɓa tsa həga ya ná, dzaʼa klaf kla mnda dra skwi ŋa Lazglafta ta ɗyakha his, nda udza sedra, nda sləvdza swida tuwak ka dva ghəlez, nda sluhwa izwap. 50Dzaʼa ghwanaf ghwa ta sani turtuk ma tsa ɗyakha ya ta siga rɓisl ndəghanaf lu nda ima dzuɓay mida. 51Dzaʼa klaf kla ta tsa udza sedra ya, nda tsa sluhwa izwap ya, nda tsa sləvdza swida tuwak ka dva ghəlez ya, nda tsa sana ɗyak ta ndiri ya, ŋa tsughumamta ni ta həŋ demdem ma tsa usa ɗyak ghwanaf tsi ya, nda ya ma ima dzuɓay ya. Ka wutsikafta ni ndəfáŋ səla ta tsa həga ya. 52Dzaʼa ghuɓiŋ ghuɓa ta tsa həga ya nda usa ɗyak, nda ima dzuɓay, nda ɗyak ta ndiri, nda udza sedra, nda sluhwa izwap, nda sləvdza swida tuwak ka dva ghəlez ya. 53Dzaʼa zlidiŋ zla ta tsa ɗyak ta ndiri ya ka ndraghata ni da mtak ta hula luwa. Mantsa ya dzaʼa slərɓanapta tsi ta zughu ta tsa həga ya. Dzaʼa nza nza kul haɗ tsaɗa tida.
54Tsaya tva skwi ŋa magay ta nghanatá inda mndərga ghwaɗaka lku, ka ka ghwaɗaka mavyavya a tsi: Zahar, 55nda mavyavya ta lgut, nda ya ta həga, 56nda skwi ta vzafta, nda ɗaŋwa lalam, nda dərnaha ta wuɗaku. 57Tsa tva skwi ŋa magay ya ná, ta taghay ta snaŋtá huzlaha nda mnduha nda skwa tsaɗa ta həŋ, nda ya kul haɗ skwa tsaɗa ta həŋ. Tsaya tva skwi ŋa magay ta ghəŋa ghwaɗaka lku nda ghwaɗaka mavyavya ta kəbaku nda kəba, » kaʼa.
Currently Selected:
Lev 14: xed
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
