Sab 24

Dzratá wa Yawe nda la Israʼila

1Ka Yawe nda Musa mantsa: « Safwa sa da iʼi, kaghuni nda Haruna, nda Nadav, nda Avihuʼ, nda sanlaha ma la galata mndu ndəfáŋ mbsak mataba la Israʼila. Ka tsəlɓakta kuni diʼiŋ. 2Tahula tsa, ŋa gavagaghata kagha Musa turtukwa gha ta vata iʼi Yawe, ma gavagagha sanlaha. Yaha hamata mnduha guli da safi mista gha ta ghwá, » kaʼa.

3Ka sliʼaftá Musa ka laghu da mnanatá la Israʼila ta inda gwaɗaha nda gumaha mnana Yawe. Ka zlghaftá inda taŋ ta wa ni ka skwa turtuk, ka həŋ mantsa: « Inda gwaɗaha mna Yawe ná, dzaʼa magay ŋni manda va tsaya, » ka həŋ. 4Ka vindaftá Musa ta inda gwaɗaha Yawe. Ka sliʼaftá tsi wrək tgha, ka baftá tsi ta gwir mista tsa ghwá ya. Ka dzagwatá tsi ta palaha ghwaŋpəɗ his, ta mndəra la Israʼila, ta mndəra la Israʼila ghwaŋpəɗ his. 5Ka ghunaftá tsi ta sanlaha ma duhwalha la Israʼila ŋa draftá skwi ŋa pla ghəŋ ŋa dray tsuh tsuh. Ka vlaŋtá həŋ ta lghəŋha ta Yawe ŋa pla ghəŋa zɗaku. 6Ka taʼatá Musa ta rita usa tsa riniha ya, ka paghamta ma glifiŋha, pɗakwa rita ni ka wutsikaftá tsi ta gwir. 7Ka klaftá tsi ta deftera dzratá wi, ka dzaŋafta ta snay sləməŋa mnduha. Ka həŋ mantsa: « Inda gwaɗaha mna Yawe ná, dzaʼa magay ŋni manda va tsaya, dzaʼa sna sna ŋni, » ka həŋ. 8Ka klaftá Musa ta tsa us ya ka wutsikafta ta mnduha, kaʼa mantsa: « Nana us na, ta maraŋta dzratá wa Yawe nda kaghuni, manda ya mna tsi ma inda gwaɗa ni, » kaʼa.

9Tahula tsa, ka laf Musa ta ghwá nda i Haruna, nda Nadav, nda Avihuʼ, nda tsa la galata mnduha ndəfáŋ mbsak mataba la Israʼila ya. 10Ka nghaŋtá həŋ ta Lazglafta la Israʼila. Mista səla ni mamu sana skwi manda brika pala ka saffir#24:10 Saffir: Tsaya sana pala ka kubwalkubwal ɗina katakata hezleʼ. manda ghudzifa luwa hezleʼ. 11Ama tsa maliha la Israʼila ya ná, haɗ ghwaɗaka skwi magana Lazglafta ta həŋ wa. Ka vitsanavata həŋ, ka zə həŋ, ka sə həŋ ta skwi.

Ləglafa Musa ta ghwá Sinay

12Ka Yawe nda Musa mantsa: « Saf sa da iʼi ta ghwá, ka nzata ka, dzaʼa vlagha vla yu ta klamha vindaf yu tida ta skwiha ŋa taghay nda zlahuha ŋa taghanaftá la Israʼila, » kaʼa. 13Ka sliʼafta Musa nda Yəhusuwa slufa ni, ka lafi Musa ta ghwá Lazglafta, 14tahula mnanata ni ta la galata mnduha: « Kəzlaŋnawa kəzla hadna ha ta vragatá ŋni slaghunaghata. Wya i Haruna nda Hur kawadaga nda kaghuni. Ka mamu skwi ŋa dzray mataba sana mndu nda sana mndu katsi slanaghata ni ta həŋ, » kaʼa.

15Manda lafa Musa ta ghwá, ka bukwamtá kusay ta tsa ghwá ya. 16Ka gɗavatá glakwa Yawe ta ghwá Sinay, ka bukwamtá kusay ka fitik mkuʼ. Baɗ mandəfáŋa fitik, ka hgaŋtá tsi ta Musa ma kusay. 17Ka nghaŋtá la Israʼila ta glakwa Yawe manda vu ta zləghaku katakata ta bɗəma ghwá. 18Ka lam Musa da tsa kusay ya, ka laf ta tsa ghwá ya. Ka zatá Musa ta fitik fwaɗ mbsak, nda rviɗik fwaɗ mbsak ta tsa ghwá ya.

Currently Selected:

Sab 24: xed

Highlight

Copy

Compare