Zaburi 145
145
Wema, ukulu na rehema za Mwenyezimungu
Rimbo rimoja rakutukuza. Zaburi ya Daudi.
1Nlungu wangu, nfalume wangu,
núkukurisa!
Nísifu zina rako daima milele!
2Suku daima nísifu,
nítukuza zina rako daima milele!
3Nkulu ndi Mola, na ndi ajúzi pakulu kusifiwa;
ukulu wake auna mwinsho.
4Kizazi kimoja cítangaza kazi yako kizazi cengine,
wakwereza vikulu-vikulu vyautendire.
5Wásowera kuhusu ubora na utukufu wako;
nífikiri vyautendire vyakutajabisa.
6Wakwereza uwezo wa mambo ako akopesa,
na omi nítangaza ukulu wako.
7Wáwejiwisa wanu ukulu wa wema wako,
na wakwimba kuhusu shariya yako.
8Mola ndi mwenyé rehema na huruma pakulu,
ákawa kukimiwa, rímwijala pendo rakwaminika.
9Mola mwema ka wanu piya;
huruma zake zíwafika viyumbe vyake piya.
10Mola, viyumbe vyako piya vyukushukuru,
na piya watakatifu wako wákusifu.
11Wakwereza utukufu wa ufalume wako,
wásowera kuhusu uwezo wako,
12wawejiwise wanadamu kazi zako za uwezo,
wawejiwise ubora na utukufu wa ufalume wako.
13Ufalume wako ndi ufalume sauna mwinsho,
na kutawala kwako ka daima vizazi piya.
[Mola kawa nawo kauli kwa usowezi piya,
na akolota meema kwa piya vyaatenda.]#145:13 Mandiko mengine aupo upande wa eyi aya‑yi.
14Mola áwakorera piya wenye kugwa,
na áwalamusa piya wenye kukafilika.
15Maso a viyumbe piya ákurindira,
na úwapa cakurya wakati maalumu.
16Úfungula makono ako,
únafusi viwájibu viyumbe piya.
17Mola ndi mwenyé shariya kwa njira zake piya,
na mwenye meema vyaaténda piya.
18Mola kawa karibu ka piya wanlébela,
piya wanlébela ka ukweli.
19Iye atimiza viwájibu wenye kumopa;
asikira lukuto rawo, na awavusha.
20Mola áwasunga piya wenye kumpenda,
fala wabaya piya awangamiza.
21Na kanywa yangu nukusifu Mola!
Viyumbe piya visifu zina rako takatifu
daima milele!
Currently Selected:
Zaburi 145: wmwBI
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
