Zaburi 140
140
Duwa ya kurikengera mmakono mwa maaduwi
Ka mwimbaji. Zaburi ya Daudi.
1Yarabi Mola, ninusuru mmakono mwa wabaya;
nikengere ka wakakatima,
2wakuwa mmyoyo iwapo mipango ya ubaya,
na daima wankusalamula vita.
3Wánola lulimi kamba ra nyoka;
sumu ya namarawe iwa sini ya mivumbu yawo. Fikiri
4Nikengere, Mola, mmakono mwa wabaya;
nikengere mmakono mwa wakakatima,
wanipángira kunikwakurisa maulu angu.
5Wakuridãi waninikira nambo nifyature,
na mizizi, wenika nyavu nikoreke;
munjira mwanipita waninikira viruzi. Fikiri
6Níntangaza Mola: “Uwe kuwa Nlungu wangu.”
Sikira, Mola, shauti ya kulebela kwangu!
7Uwe Mola, Mwenye wangu,
Nvushi wangu wa uwezo,
unikengera nkiswa suku ya vita.
8Usiwape viwajíbu wabaya, Mola!
Usase mipango yawo kuwa na faida,
ipate wasije kuridãi. Fikiri
9Wanizungurize, ubaya úlawa mmivumbu mwawo,
uwagwirire nviswa vyawo, uwafinike!
10Makala a moto awagwirire!
Wefyeriwe pamoto,
wefyeriwe mmapondo sawakidiri kulawa!
11Wenye kukejeli wasikaziwe mulumwengu‑mu!
Balayi iwafulate wakakátima mpaka kifo cawo!
12Nukwijiwa kuwa Mola ákengera
haki ya munu wakushanga,
ántendera shariya masikini.
13Ka ukweli wenye shariya wáshukuru zina rako,
na wanu wakoloka wakuja mbere yako.
Currently Selected:
Zaburi 140: wmwBI
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
