Zaburi 139
139
Mwenyezimungu akwijiwa vinu piya
Ka mwimbaji. Zaburi ya Daudi.
1Mola, uwe kunitunza na kunijiwa.
2Ukwijiwa panikala na panilamuka;
uri baidi ukwijiwa mawazo angu.
3Úpima njira yangu na wakati wanipumula;
ukwijiwa canitenda piya.
4Usowezi saunanifika palulimi,
ha Mola, uwe piya kwijiwa mida.
5Uwe únizunguriza, nyuma na mbere,
na únitula makono ako julu yangu.
6Wijiwifu‑wo wa matajabisa pakulu kwangu,
nkulu pakulu, unipúnda kimo.
7Níkamba nirisapuse na Roho yako nuke ndepi?
Nikasa kuwa mbere yako nituwirire ndepi?
8Nikikwera mbinguni, eko kuwapo;
nikitengeza kinanda cangu Kuzimu,
neko novyo kuwapo.
9Nikikwera na mbawa za alufajiri
na nikikala nanyenje ya mwani,
10anta neko nkono wako únilongoza,
nkono wako nriro únikorera.
11Anta paniwaza nirifise ngiza,
au paniwaza kuwa nuru inizungurize itaduke usiku,
12níwona kuwa anta giza siko kwinukala kwako uwe.
Usiku úlangala kamba nsana,
kamana kwako uwe giza ndi nuru.
13Uwe kunumba caniri omi,
na kunisona mmatumbo mwa mama.
14Omi núkutukuza,
konta kunitenda kwa namuna maalumu na vyakutajabisa.
Kazi zako za matajabisa!
Roho yangu ikwijiwa evyo sana-sana.
15Panumbiwe kisiiri-siiri,
panipakasiwe sini ya ardhi#139:15 Ulumwengu wa nowo wakati‑wo, ewo wakiwaza kuwa wanu wakumbiwa sini ya ardhi ikisa wakiperekiwa mpaka mmatumbo mwa mama zawo.,
makongolo angu aarifisirire nowe.
16Maso ako aniwona tangu mwanzo wakumbiwa;
suku zangu piya zandikiwa mbuku mwako,
kábula yakuwepo ewo mojawapo.
17Ha Mwenyezimungu,
mawazo ako faida pakulu kwangu omi!
Isabu yawo ulu pakulu!
18Ninawalanga mawazo‑yo,
nanga apúnda songolo za nsanga.
Nikilamuka, nizidi kuwa nawe!
19Mwenyezimungu, vyema unawolaya wabaya!
Wanitanuke visomi!
20Ewo wákusowerera mabaya;
kwa kuwa maaduwi wako, wábishana na zina rako.
21Mola, sikweli kuwa níwena wari kukwina?
Sikweli kuwa wánikima ware wabishána nowe?
22Wánikima pakulu!
Níwatula kuwa maaduwi wangu!
23Yarabi Mwenyezimungu,
nitunze wijiwe moyo wangu;
niyerere, wijiwe mawazo angu.
24Wona kamba ciwapo caniténda cakukukima,
na unilongoze kwa njira ya milele.
Currently Selected:
Zaburi 139: wmwBI
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
