Nehemias 9
9
Pigtapat da ring Tau ing Kasalanan da
1Inyang kadua nang pulu't apat a aldo ning bulan a ita, mitipun la ding memalen na ning Israel ban mag-ayunu.#9:1 MAG-AYUNU: e mamangan kilub ning mitakdang panaun ban ipakilala king ing tau malungkut ya at sisisi king depat nang pamikasala. Misulud lang imalan a magaspang#9:1 O kaya: langgotsi. at mibiling alikabuk karing buntuk da. 2Kewani ra ing sarili da karing dayuan; tinalakad la at pigtapat da ing kasalanan da at antimu rin ing depat dang pamikasala ding karelang makatua#9:2 O kaya: pipumpunan. 3Makatalakad la karing lugal da kilub ning atlung oras kabang mababasa ya ing Kautusan ning Ginung karelang Dios. At karing tutuking atlung oras pigtapat da ing depat dang pamikasala, at simban de ing Ginung karelang Dios.
4Makatalakad la babo ning entabladu ding Levitang di Jesua, Bani, Kadmiel, Sebania, Bunni, Serebia, Bani, at i Kenani. King masikan a siwala, menalangin la king Ginung karelang Dios.
5Kaybat na nita, sinabi da ri Jesua, Kadmiel, Bani, Hasabneia, Serebia, Hodia, Sebania, at i Petahia:
Talakad tamu at purian ya ing Ginung kekatamung Dios,
purian ya king kapilan pa man!
Purian ya ing makaligaya nang lagyu
agyang alang amanung kapurian at pamipanuan a malyaring karapatdapat.
Ing Panalangin ning Pamanisi
6Kanita miyabe-abe reng sinabi iting manalangin:
Bukud mung ika Ginu, ing Ginu;
ika ing linalang king meto sikluban at karing batuin.
Ika ing linalang king yatu, king dagat,
at karing karela manuknangan;
ika ing minie bie karela.
Ding sablang upaya king banua duruku la at sasamba keka.
7 # Gen 11:31; 12:1; Gen 17:5. Ika ing Ginung Dios, ing memili kang Abram
at milual king Ur ning Babilonia;
Abraham ing pemalagyu mu.
8 # Gen 15:18-21. Ikit mu king tapat ya keka,
inya kang Abraham ka ginawang kasunduan.
Pengaku mung ibie mu la kang Abraham
ding gabun da ring Cananeo,
Heteo, Amoreo, Perezeo,
Jebuseo, at Girgaseo,
ban karin la manuknangan ding lahi na.
Tiparan mu ing kekang pengaku
uling tune kang tapat.
9 # Exo 3:7; Exo 14:10-12. Ikit mu ing kasakitan a delanan da ring kekaming makatua karin Ehipto;
ing karelang aus dimdam mu inyang atyu la king Dagat da ring Timbu.
10 # Exo 7:8—12:32. Ginawa kang bage pagmumulalan laban king karelang ari,
karing pamuntuk at memalen na,
uling pigbagsikan da la ring kekaming makatua.
At ing Lagyu mu angga ngeni pikabaluan ya.
11 # Exo 14:21-29; Exo 15:4, 5. Pinitna me ing dagat king akakit da;
king malanging gabun libutad ning dagat karin la linakad,
at detang tatagal karela
anti lang batung pepalbug mu king kalalaman na.
12 # Exo 13:21, 22. Bukud kaniti, neng aldo pitnubayan mu la king kapamilatan ning asias a biga,
at asias a api neng bengi
ban suluan ing dalanan da king paglakbe ra.
13 # Exo 19:18—23:33. Ibat banua king Bunduk ning Sinai karin ka minta;
karing kekang memalen migsalita ka,
at ding mayap mung tuntunan at kautusan karela binie mu la.
14Pepabalu mu karela king ing Aldo ning Sabbath#9:14 SABBATH: ing aldo ning pamagpaynawa o tuknang magobra. sukat deng pangilinan,
at king kapamilatan ning talasuyu mung i Moises
ding kekang tuntunan at kautusan karela binie mu la.
15 # Exo 16:4-15; Exo 17:1-7; Deut 1:21. Inyang meranup la, peparala kang tinapeng ibat banua,
at inyang mau lang danum
king batung ating sibul karin mu la pepainum.
Sinabi mu karela king bandian de ing gabun
a pengaku mung ibie karela.
16 # Bilang 14:1-4; Deut 1:26-33. Oneng ding makatua mi migmaragul la, at pepasias da lang buntuk da,
at e memintu karing utus mu.
17 # Exo 34:6; Bilang 14:18. Karing utus mu e la memintu;
kelinguan da ing sablang bage pagmumulalan a depat mu;
buntuk da pepasias da la,
at memili lang karela manimuna
ban king Ehipto maging ipus pasibayu.
Oneng metung kang Dios a makasadiang mamatawad,
maganaka, at malunusan,
e agad mimua, at tune malugud.
Inya e mu la pepaburen.
18 # Exo 32:1-4. Ginawa lang rebultu a kawangis ning biserung baka,
at sinabi ra king iti ya ing dios dang milual karela king Ehipto!
Makanyan lang dinapat maragul a kalapastanganan keka.
19 # Deut 8:2-4. Uli ning maragul mung lunus
e mo pepaburen king ilang;
e me leko ing asias a biga at api
neng maglakbe la aldo't bengi.
20King kekang kayapan tiru me karela ing dalan a sukat dang dalanan;
e mu pigkaymut karela ing pamangan a manna at ing danum a inuman da.
21Apat apulung banua mong sinustentuan king ilang,
at e la migkulangan king nanuman;
e melaun ing karelang imalan,
at bitis da e la mengalbag king karelang paglakad.
22 # Bilang 21:21-35. Dininan mu lang kayarian ampon taung sasakupan;
dininan mong gabun,
inya sekupan de ing Hesbon, ing gabun nang Aring Sihon,
at ing gabun ning Bashan, ing gabun nang Aring Og.
23 # Gen 15:5; 22:17; Jos 3:14-17. Peparakal mu la ding anak da,
kasing dakal da la ring batuin ning banua,
at dela mu la king gabun
a pengaku mung ibie karing makatua da ban maging bandi ra.
24 # Jos 11:23. Inya sekupan de ing gabun ning Canaan,
at simbut ding taung karin manuknangan.
Karing gamat da ari at kalaban da binie mu la,
ban daptan da ing buri dang gawan karela.
25 # Deut 6:10, 11. Abihag da lang pakakutang siudad,
matabang gabun, bale mitmung pibandian,
depositung danum,#9:25 O kaya: batung talaga o cistern king Inglis. mulahan olibo at ubas,
at miyayaliwa pang tanaman a mamunga.
Mengan la at kinabsi at metaba la.
Meligaya la king mayap a binie mu karela.
26 # Ukum 2:11-16. # Kab 2:10-20. Oneng linaban la keka;
e la memintu karing utus mu,
linele re ing Kautusan mu.
Pete da la ring propeta a babie babala karela ban mibalik lub keka.
Dinapat lang maragul a kalapastanganan keka.
27Inya pepailalam mu la karing kalaban da, at pepasakitan da la.
King karelang delanan a kasakitan minaus la keka,
at ibat banua pekiramdaman mu la.
Uli ning maragul mung lunus karela dininan mu lang manimuna
ban karing kalaban iligtas da la.
28Inyang payapa na, dinapat no namang pamikasala laban keka,
inya pasibayu mu lang pepailalam karing karelang kalaban.
Inyang minaus la't sinaingsing keka,
ibat banua pekiramdaman mu la,
at king kekang maragul a lunus ulit-ulit mu lang kinabus.
29 # Lev 18:5. Belan mu la ban mibalik at tupad karing utus mu,
oneng migmatas la at e la memintu karing utus mu
agyang ing Kautusan mu ya ing babie bie karela.
Mesias la buntuk at e la bisang mamintu.
30 # 2 Ari 17:13-18; 2 Cro 36:15, 16. Pibata mu la kilub ding dakal a banua,
inaus mu la pansin kapamilatan ding pepawaga mu karing propeta,
oneng migmaklak-maklakan la.
Inya karing gamat ding dayuan keka lang pepailalam.
31Makanyan man, e mu la gilutan at gisan
uli ning maragul mung kapakaluluan.
Dios kang maganaka at malunusan.
32 # 2 Ari 15:19, 29; 17:3-6; Ezra 4:2, 10. Inya, ika, ing kekeng Dios, Dios kang marangal,
mayupaya ka, at makapangilabut;
tapat tutupad king kekang pangaku.
E mu sana lalawan mayan ing digpang kasakitan
karing kekeng ari, manimuna, pari, at propeta;
karing kekeng makatua,
at karing sablang kekang memalen
memagkasakit la uli ning pamaniakup da ring ari ning Asiria.
33Atin kang matulid ing perusan mu kami;
tapat ka kekami agyang mikasala ke keka.
34Ding kekeng makatua, ari, manimuna, at pari
e re tiparan ing kekang kautusan.
Ding kekang utus at babala e da la pekiramdaman.
35Kabang atilu king karelang kayarian
at ning binie mung labis-labis a kayapan
king malapad at matabang gabun a binie mu karela;
e la rin tinuknang king dapat dang pamikasala ni keka sinuyung tapat.
36Inya meging ipus kami ngeni king mismung binie mung gabun,
keting matabang lugal a babie king kabiayan mi.
37Ing dakal nang pupul karing ari mumuli,
uli ning pamikasala mi karela pepailalam mu kami,
pati animal a sese mi;
alang kalupa ing kasakitan mi ngeni!
Ing Pangakung Tupad king Kasunduan
38Uli na niting sablang milyari, ikaming memalen na ning Israel, susulat mi ing masusi ming pangaku. At ding kekaming manimuna, ding kekaming Levita, at pari ayunan da at migpirma lang kayabe mi.
Currently Selected:
Nehemias 9: PmPV
Highlight
Copy
Compare
Share
Want to have your highlights saved across all your devices? Sign up or sign in
Philippine Bible Society New Testament © 1981, Bible © 1994
