Popular Bible Verses from Nehemias 9

Share

Oneng ding makatua mi migmaragul la, at pepasias da lang buntuk da, at e memintu karing utus mu. Karing utus mu e la memintu; kelinguan da ing sablang bage pagmumulalan a depat mu; buntuk da pepasias da la, at memili lang karela manimuna ban king Ehipto maging ipus pasibayu. Oneng metung kang Dios a makasadiang mamatawad, maganaka, at malunusan, e agad mimua, at tune malugud. Inya e mu la pepaburen.

Kanita miyabe-abe reng sinabi iting manalangin: Bukud mung ika GINU, ing GINU; ika ing linalang king meto sikluban at karing batuin. Ika ing linalang king yatu, king dagat, at karing karela manuknangan; ika ing minie bie karela. Ding sablang upaya king banua duruku la at sasamba keka.

Uli ning maragul mung lunus e mo pepaburen king ilang; e me leko ing asias a biga at api neng maglakbe la aldo't bengi. King kekang kayapan tiru me karela ing dalan a sukat dang dalanan; e mu pigkaymut karela ing pamangan a manna at ing danum a inuman da. Apat apulung banua mong sinustentuan king ilang, at e la migkulangan king nanuman; e melaun ing karelang imalan, at bitis da e la mengalbag king karelang paglakad.