ROMMA 9
9
Lona u suu mam suu nam manasina
1An dini gasira an kaboyɗi, an ni maŋ Kristu, hu wiinda Musuk Lonara ka takan ana an di ni gasira. 2Hurun tan hurun coco u hahawra gak gak. 3An min ana lini Lona gan vunna ɓorowon duk ɦoŋon ki u Kristu kay gorsen suu hu njafanna lay ni giya. 4Asi ni njaf suu Israelna Lona hin mbuɗusi ki a goryomu, ɦasi ana nam ka egesi hu ŋgol mamba tew tew, nam vi galamba u asiya, ɦasi gaɗta, li tokka, vi vunna u asiya. 5Asi ni hu dee somora vi suu Israelna, u Sa Lona Fuurumma, ko sa warna na, ka hu dee masira may. Nam su suuna u tlena halaŋ, Lona, ma suuna geleɗem na gak gak hu daɓ kiɗira. Amin.
6An ka min di ana vi vun ma vi Lonna mbuɗ ki ɦawaa naɗi, njafna vi suu Israelna ni ka asi suu Israel suu gasina halaŋgi. 7Njafna vi Abraham ni ka goryom suu nam vuɗusina belɗi, Lona di Abraham ana, «Goryoŋ Isaakŋa hol hin ndummi ko goryoŋ na.» 8Ni di ana gor suu vuɗusi u saara vi sa warna ni ka goryoŋ Lonnaɗi. Gorro suu vuɗ hu vi vunna vi Lonana ni suu hu njaf mammana. 9Lona di ki hu vi vun mamma anaba, «Hu li ma an hin hoŋ ayna Sara hin vuɗ gooro.»
10Ni ka kay ndaɗta holɗi, goryoŋ Rebekana mba' jakŋi busi ni dew, buygi ma ŋgolna Isaak. 11-12Lona u ŋgaɓ mamba ŋgaɓ suuna, ŋgaɓ mamba ni u yira nam yasira, ni ka kay sun masiraɗi, va ma tak ki ana Lona ka coli kay ŋgaɓ mambana ni, nam di Rebeka ni goryoɗ bay vuɗ tu lay asi bay li jivira u cora tu lay, ana, «Ma ŋgolna hin sun ma goona.» 13Ko ɓiira dira na
«An min ni Yakob noy Ezaw kiyo.»
14Hin daygi ni ana mege? Lona hin mbuɗ co su? Nam ka mbuɗ coɗi. 15Lona di Moiz ana, «An min wi hahaw sa ma an min wam hahawamma, sa ma an min a li oora kamma ni an lamba.» 16Dla ndaɗta ni ka minda vi sana u saɓak mammaɗi, ni Lona dew ma wi haw haw suuna. 17Lona di maŋ Faraw, mul ma Egiptena, hu Boy ma Ɓiirina ana «An kakaŋ a mulna a takaŋ saɓak manna, a suuna kay ndaŋgara halaŋ mba wan sen kiyo.» 18Lona wi hahaw sa ma nam min lam jivira kamma, sa ma nam soom hurum hu coombana zuɗum um ha hu may.
Yaŋ Lonara u oo mamba
19Aŋ hin dan ana hurum hin ɓeŋŋi nana daŋ ologe? Sa hin ciwayra u minda vi Lona ni gege. 20Aŋ sa namma ni gege, ma hin ciwayra u Lona? Doy luɓuna hin joɓ malamma minimma ana, «Aŋ lan na ni kay mege na su?» 21Sa ma min doyna ndak a li va ma nam min lam u luɓuna ni namu. U luɓu namma nam ndak a min doy ma saɓakŋa hin min ma ɦawana lay.
22Va ma agi min dam kay Lonna ni mege? Nam min a tak yaamba u saɓak mamma kiyo. Kay ndaɗta nam siɓ ŋgolo u ɗigilla kay suu yaamba mba gin kasina hin tok a baasi kina. 23Nam a tak ɦizza vi ŋgol mamba ki u oora nam laɗta ni, nam min ki fok jew a ɦay ŋgol mamba. 24Aygi suu nam yaygina ni ka duk njaf suu Juifna holɗi, ni duk njaf suu daŋŋa lay. 25Ko ɓii aygi hu magaara vi Ose na,
«Njaf ma ka a suu mannaɗina
an hin yasi a suu manna,
njaf suu an ka minisiɗina
an hin yasi a suu mansina.»
26Hu li ma asi di kasi ana
ka suu mannaɗina, hu li namma ni
asi hin yasi a,
«goryoŋ Lona ma iirina.»
27Ezayi ɓii boy namma ni kay suu Israelna, «Lini suu Israelna zuli co co ko ŋgetlna del lumma na lay ni, suu hin suɗ ki dukusina ni ew ɦawaa. 28Bu Suuna hin li u boy mamma nam dam kina kay ndaŋgara na zak.» 29Ni ko Ezayi di ay ki fok jewra na
«Lini Bu Suuna ma Saɓakŋa Kom Belna
hin njaf suu taa ka ɦiwɗi ni
aygi hin li ki ni ko suu Sodomma
u suu Gomorna na.»
Israel u Boy ma Ayra
30Hin daygi kay boy namma ni ana mege? Suu ana asi ka suu Juifnaɗi lay, ka suu hal a mbuɗ tasi ɗegee fok Lonaɗi layna, asi mbuɗ ki ɗegee u vira. 31Suu Israelna suu hal a mbuɗ tasi ɗegee fok Lona u gaɗtana, tew ka a li va ma gaɗta dammaɗi lay. 32Kay asi hal ka a mbuɗ tasi ii Lona ɗegee u viraɗi, asi hal a mbuɗ tasi ɗegee ni u sun masira, ni asi daɓ tasi kay ɦinira daɓ semma. 33Ɓiira di ana,
«Gologi an tin hu Siyon ɦini
ma daɓ semma ni ɦini ma
ndi sana kaŋgana sa tin hurum kamma
ka mbuɗ ki zoloɗi.»
Currently Selected:
ROMMA 9: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
