ROMMA 10
10
1Gorsenna va ma an min joɓ Lona hurun tini kam halaŋŋa ni kay suu Juifna ana asi suɗ kiyo. 2An ndak di kasi ana tasi feɗ a sun Lona, na may uɗ ka irisiɗi. 3Asi hum u mayra ana Lona min mbuɗ suuna ki fokom ɗegee ni namura kaɗi, asi hal a mbuɗ ɗegeera ni u min masira kay tasira, ni asi hum ka u dla mayra Lona min mbuɗ suuna ɗegee ni namuraɗi. 4Kristu mba tin kini gaɗta vi Moizza hu liiɗu, kay a suu vina halaŋ mbuɗ ki ɗegee fok Lona.
Suu vi u Bu Suuna halaŋŋa suɗta ni masira
5Va ma Moiz ɓiirim kay dla mayra sana a mbuɗ ki ɗegee fok Lona kay hum u gaɗtara, «Sa ma hum u gaɗtana kak iirira ni uɗ may.» 6Dira di ki ana, dlara sana a mbuɗ ɗegee fok Lonara ni u vira, «Di taŋ huruŋ ana sana hin ful kolo huulona ni gege naɗi.» (Ni kay a di ana a mbaa Kristu ay kaŋgara.) 7Ka di ana «Sa ma hin cuk sem ay kaŋga duk ndaŋgara ni gege,» naɗi lay (ni kay di ana sa ma hin kal kaŋga hu zulla a col Kristu ay ki kolo duk suu miɗina ni gege). 8Ɓiira di ana mege? «Boyna ka egeŋ tok vunuŋ u huruŋ lay.» Boy namma ni boyna vi vira ma ami ka damma. 9Lini aŋ di ki u vunuŋ fok suuna ana Yesu ni Bu Suuna, vi huruŋ wa ana Lona colom ki kolo iiri duk suu miɗina ni, aŋ hin fi suɗta. 10Sana vi u hurum wa ni, Lona mbuɗum ki sa ma ɗegeena, sana di ki u vunumu Lona suɗum kiyo. 11Boy ma Ɓiirina di ana, «Sa ma tin hurum kamma ka mbuɗ ki zoloɗi.» 12Suu Juifna u njaf suu daŋŋa ka zeɗ zeɗɗi, kay asi halaŋ Bu Suuna masina ni dew ma ɦal tlena maŋ suu yam semma. 13Kay ɓiira di ana, «Suu yi sem Bu Suunana halaŋ mba fi suɗta.»
14Sana hin ndak a yam sem bay vi ummi nanage? Asi hin humma, viya bay sa ɓakasi ni nanage? Asi hin hum bay sana dasi boyna ni nanage? 15Asi di boyna ki bay sa cukusi ni nanage? Ko ɓiira di kira na, «Jivi ɦay kay suu tuɗ a di Boy ma Ayra kina.» 16Suuna vi Boy ma Ayra ka halaŋgi, Ezayi di ana, «Bu Suuna sana vami boy mamina ni gege?» 17Vira mbay ni u humba hum boyna, boy ma dam namma ni boyna vi Kristu.
18An ka joɓ mi anaba asi ni bay hum boyna tu su? Ni asi humiya, kay ɓiira di ana,
«Suuna humusi delesi
ha ki kay ndaŋgara halaŋ lay.
Boy masina tew
hu li ma duliyara daɓ ki huna.»
19An ka joɓ olo ana na ni suu Israelna bay hum su? Hoŋ dira kay boy namma Moiz di jew ana, «Lona di ana an min mbuɗugi hurugi yowmusna eg njaf suu daŋŋa. An hin mbuɗugi ya kay njaf suu ka wi dlaɗina.»
20Ezayi di olo ana,
«Lona di ana,
An ɦal tan ki maŋ suu halan kaɗina,
suu joɓon va kaɗina
an tak tan irisiya.»
21Kay suu Israelna nam di anaba, «Hu buuna tew tew an kon ki mali kay a vi suu ka vi vunɗina, suu hurusi honira.»
Currently Selected:
ROMMA 10: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
