MATIYE 2
2
Suu wi dlara u ciciwra yow ay u lo maɗiina a gol Yesu
1Yesu vuɗ Betlehem hu mbassa Yudera. Ni hu li ma Herod a mul masina. Suu wi dlara u ciciwra yow ay u lo maɗiina, mbay Yerusalem. 2Asi joɓ ana, «Mulna vi suu Juif ma vuɗ wilina ka ni arage? Ami ay u lo maɗiina, wi ciciwra ay kamu, ami mbay a goɓ ga fokomu.»
3Mulna Herod hum na ni, vundikim ɓigim kay boy namma, u suu mamsina halaŋ. 4Nam tok muli suu li ɓivunna u suu wi magaara gaɗta ay egem wanni, joɓosi kay li ma Sa Lona Fuurumma vuɗ huna. 5Asi dam ana, «Nam hin vuɗ Betlehem hu mbassa Yudera. Ni dlara sa jok vun Lona ɓiiriɗ ay ana,
6Betlehem, ni zina hu mbassa Yudera,
ni ka zi ma goonaɗi.
Kayme mul ma hin a tuɗ
fok suu man suu Israelna,
hin vuɗ ni huwa.»
7Nam mulna Herod yi suu wi dlara ay egem ŋgaya, nam joɓosi ana asi wi ciciwra ni saɓage. 8Nam tinisi hu voɗta Betlehemba, dasi ana, «Tuɗugi halagi goo namma. Agi fam ay wa ni, mbay danu, an tuɗ goɓ ga fokom may.»
9Asi hum boy ma mulna dasinana hummi, cuk tasi gaw. Ciciw mayra asi waɗ ay u maɗiinara tuɗ ha fokosiya, ndaɗ i col kay zira goona ka hura. 10Asi wi ciciwra na ni, hurusi furi cocoo. 11Asi sel kalafi hu zira, wi goona ko sum Mari. Asi goɓ kaŋga fokomu. Asi buɗ tlegeyesi ki buɗ ni, ɦam lorra may, mbitla may, mbul ma his jivina may. 12Asi buu njeŋge wanni, Lona dasi hu doyra ana asi hoŋ voo wanni, tli kay mulna Herod oloɗi. Asi wi na ni, tli voɗta daŋga gaw.
Somoyoŋ Yesuna pii u nam hu mbassa Egipte
13Suu wi dlara u ciciwra tuɗ tuɗ ni, sa sunda huulona di doyra maŋ Yosef ana, «Col koloo! Tli goona u sumu, piirigi hu mbassa Egipte. Aŋ kak hu mbas ndaɗta gak gak, an hin daŋ tuwa, kayme Herod hal goona a cam kiyo.»
14Yosef col koloo duk njeŋgera, tli goona u sumu, tuɗ hu mbassa Egipte gaw. 15Nam kak hu na gak gak, Herod miɗ ki tuwa. Dla ndaɗta li na ni u njaɗ mayra Bu Suuna daɗ maŋ sa jokom vunumma ana, «An yi goronna ay ki hu mbassa Egipte.»
Herod ci gorkemba kiyo
16Herod wi ana suu wi dlara ganam yam mi ganiya ni, hurum ɓeŋ ki cocoo. Nam cuk suu mamma ana ci gor njufi suu vuɗ wilina u suu basaɗasi tew mbambana kiyo. Ni kayra suu wi dlara dam ana asi wi ciciwra ni hu basa ndaɗta. 17Li ki ni dlara Jeremi, sa jok vun Lona, daɗta ana,
18«Asi hum soora
u tii ma hahawra hu zina Rama.
Rakel tii ni kay goryoɗu.
Ndaɗ ka min ana sa heɓeɗ huruɗɗi.
Kay goryoɗ ki miɗiya.»
Somoyoŋ Yesuna hoŋ ay mbeera voo
19Herod miɗ ki miɗ ni, sa sunda huulona hoŋ di doyra maŋ Yosef hu mbassa Egipte, 20ana, «Col koloo! Tli goona u sumu, hoŋogi hu mbassa Israella. Suu hal a ci goona kina, miɗ ki wa.»
21Yosef col koloo, tli goona u sumu, hoŋ ay hu mbassa Israella. 22Nam hum ana goŋ Herodna sem ana Arselaus mbuɗ a mulna hu mbassa Yudera balam bumu ni, nam li ndaana a hoŋ hura. Doyra hoŋ takamu, nam tuɗ hu mbassa Galilera, 23kak hu zina yam ana Nazaret. Li ki ni va ma suu jok vun Lona damma, «Suuna hin yam ana sa Nazaretna.»
Currently Selected:
MATIYE 2: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.