MATIYE 16

Suu Farisenna u suu Sadusenna joɓ Yesu ana lasi dlara mbuɗta

(Mark 8.11-13; Luk 12.54-56)

1Suu Farisenna u suu Sadusenna ɦuɗ tasi eg Yesu. A duum delemba asi joɓom ana nam lasi dlara mbuɗta a takasi saɓakam ma col ay kolo huulona. 2Yesu hoŋosi dira ana, «Fiɗigi faɗta a ndi kaŋgara lini huulona tlawi ni, agi di ana lina karam jiviya. 3Nda vinda ni, faɗta mun ki wa ni, agi ana, Ndaɗ ti loloo. Agi wi yal ma ŋga tlesuu kolona. Agi ndak ka wi takka li kolo hu lina vi Lonaraɗi. 4Agi njaf ma cona, hurugi ka tini kay Lonaɗi, joɓ dlara mbuɗta ni amege? Dlara mbuɗta daŋ ta sa takagi sura vi Jonassa kaɗi.» Nam hinisi tani, tuɗ gaw.

Kuffa vi suu Farisenna ura vi suu Sadusennara

(Mark 8.14-21)

5Suu haɗina ɗuŋ lumma ki bay yow mappa ay kosiya. 6Yesu dasi ana, «Gol tagi jivi ko kuffa vi suu Farisenna ura vi suu Sadusenna.» 7Suu haɗina hosok tasi ana, «Nam ɓak na ni kay mappa ka koygiɗira.» 8Yesu wasi asi hosok tasi na ni, nam dasi ana, «Agi ɓak duk tagi ana nam di ni kay mappa ka komiɗira ni nanage? Agi suu hurugi ka tini ŋgolɗi na. 9Agi bay hum tu su? Humugi ka gagi kay fu ma vadl ma an ɦam maŋ suu bup bup vadlnaɗi su? Umba hin ay kosira oy kaalamina gage? 10Humugi ka gagi kay fu ma kiɗisiya ma an ɦam maŋ suu bup bup fiɗinɗi su? Umba ay kosira oy kaalamina ni gage? 11Agi ka wi ana an ɓakagi ni ka kay fuɗi, naɗi su? Gol tagi jivi ko kuffa vi suu Farisenna ura vi suu Sadusennara.»

12Asi hum ki ana Yesu ɓakasi kay kuffa na ni, ni kay haɗta vi suu Farisenna ura vi suu Sadusenna.

Piyer di ki kay Yesu ana nam ni Sa Lona Fuurumma

(Mark 8.27-30; Luk 9.18-21)

13Yesu tuɗ hu mbassa tok eg ɦoŋzina yam ana Sesare vi Filip. Nam joɓ suu haɗi mamsina ana, «Suuna ɓak kay Goŋ Sanna ana mege?» 14Asi hoŋom dira ana, «Suu ɦiw ana aŋŋi Jaŋ ma mbus batemma, suu daŋŋa ana aŋŋi Eli, suu hiŋŋa ana aŋŋi Jeremi, li ka naɗi ni sa dew duk suu jok vun Lonna.» 15Yesu joɓosi ana, «Agi may ni? Agi di kan ana me may ge?» 16Simon Piyer dam ana, «Aŋŋi Sa Lona Fuurumma, Goŋ Lo ma iirina.» 17Yesu hoŋ dam ana, «Heɓpa ka kaŋu, Simon goŋ Jaŋŋa, boy ma aŋ damma fam ay ka vi sa warnaɗi, fam ay ni ko Bun ma kolo huulona. 18An daŋ ana aŋŋi Ҥinira, ɦini ndaɗta an min zinda kaɗu. Saɓak Maɗna lay ni ka ndak a laɗ va egeɗɗi. 19An hin ɦaŋ vun zira vi Mulla huulonara koŋu. Va ma aŋ njunum kaŋga kay ndaŋgara, ha njuni kolo huulona may. Va ma aŋ buɗum ki kay ndaŋgara, ha buɗi kolo huulona may.»

20Yesu gaɗ suu haɗi mamsina ana asi di ki kam ana nammi Sa Lona Fuurumma naɗi.

Yesu di kay miɗ mamma u paɗ mamba kolora

(Mark 8.31—9.1; Luk 9.22-27)

21Hu li namma Yesu gijaŋ njaɗ maŋ suu haɗi mamsina ana, «Lini nanagelay ni ko an tuɗ Yerusalem. Hu li namma suu ŋgolona u muli suu li ɓivunna u suu wi magaara gaɗta hin lasan cocoo. Asi hin can ki lay. Hu buu ma hindina an hin paɗ ki kolo iiriya.» 22Piyer vi bik Yesu, tayam ay ki keŋe, yalam ana, «Ka naɗi, Bu Suuna dla ndaɗta ka mba kaŋ na ndeɗi.» 23Yesu ɦal ŋgorom maŋ Piyer, dam ana, «Ҥuɗ taŋ ha ki egen day, Satan. Aŋ hal a zuɗun ni hu cora ɦawaa. Saaraŋ ka kora vi Lonara naɗi. Nira vi suu warnara.» 24Nam hin di suu haɗi mamsina ana, «Lini sana min a tuɗ kay cerenu ni, maa dla tam kiyo, tli garak mamma, tuɗ ay unu. 25Sa min a suɗ iiri mambana, ndaɗ hin ba kiyo. Sa ba iiri mamba ki kanna, nam hin faɗu. 26Sana li ana tlesuu hu duliyarana halaŋ lini komu ni, nam ba iiri mamba ki wa ni, tlesuu asina hin mbuɗum mege? Va san fam a hin mbuɗ iiri mamba un ni mege? 27Na daŋŋi Goŋ Sanna hin mbay u bibiŋilla vi Bumba u suu mam suu sunda huulona may, hu li namma nam hin warak gegelay u dlara nam laɗta. 28An dagi ha ni gasira, suu dukugi ɦiw ka daɓ ki miɗna bay wi Goŋ Sanna mbay u mul mambaraɗi.»

Currently Selected:

MATIYE 16: BMS

Highlight

Copy