MATIYE 15

Yesu ciwayra u suu Farisenna kay dlaasira

(Mark 7.1-13)

1Suu Farisenna u suu wi magaara gaɗta col ay Yerusalem mbay eg Yesu, joɓom ana, 2«Suu maŋsina ka li u gaɗta vi somoyoyraɗi ni kay mege? Asi ti funa bay mbus kosi ko gaɗ maygira dira na ni nanage?» 3Yesu dasi ana, «Agi hin gaɗta vi Londa ki ta, a lagi dlaagira kay tagira ni kay mege? 4Lona di ni na ɗow ana, Tli yam buŋ u suŋ koloo. Sa pan bum u summa cam ki ciya. 5Gola agi gaɗ ana, Sa di maŋ bum u sum ana, Tlesuu an hinisi a njunugi gin u asina an ɦasi ki maŋ Lona a purra wa. 6Ni agi doo ki ni ana sa tli yam bum u sum koloɗi ni naɗi su? Agi mbuɗ boy ma vi Lonna ki lalas, u dlaagira agi haɗ suuna u ndaɗta. 7Agi suu hurugi mba mbana, Ezayi di ki jew kagi na ni u voɗoɗu.

8Lon di ana,

Suu dee ndaɗta ŋgaan u vunusiya,

hurusi ki egen day.

9Asi lan un ay gaa fokon ni ɦawaa.

Boy ma suuna ɓakamma ni

haɗta vi suuna ɦawaa,

asi vammi ko Boy ma vi Lonna na.»

Tlesuu ɓeŋ sana, mbuɗum ki njenjena

(Mark 7.14-23)

10Yesu tin um yi suuna ay egem, dasi ana, «Humun ki vunun haa wagi u boy namma ki jivi may. 11Va kal ha fun sana ka mbuɗum njenjeɗi. Va ma kal ay ki fun sanna mbuɗum njenjera ni namu.»

12Suu haɗina ɦuɗ tasi eg Yesu, dam ana, «Aŋ ka wi ana suu Farisenna hum na ni, hurusi haɗ cocoo, naɗi su?» 13Nam dasi ana, «Guguni suu Bun ma kolo huulona pasi kaɗi na halaŋŋi, hin paɗ kiyo. 14Suu Farisenna agi hinisi na ta. Asi ni ko suu dugina li ta suu ndarayasi suu dugina na. Lini sa dugina li ta ndaram ma dugina ni, asi hin cuk hu zulla jak.» 15Piyer hum na ni, dam ana, «Gami u boy namma ki jiviya.» 16Yesu ana, «Agi lay ni ka wi u boy namma ki jiviɗi su? 17Agi ka wi ana va kal ha fun sanna, tuɗ ki ni hurum kurufu, hin o ki ni sotna. 18Va ma kal ay ki fun sanna, col ay ni hurum kurufu, ɓeŋem ki ni namu. 19Saara cora col ay hu sana, zuɗum um ha a ci maɗna, li zoŋga may, li dla cora, kulna, kaboyna, li ŋgeŋŋa kay suuna halaŋ lay. 20Ni dlara mbuɗ sana ki njenjera, lini ti funa bay mbus koŋ ki lay ni, ka mbuɗ sana ki njenjeɗi.»

Cara hu njaf ma daŋŋa tin huruɗ kay Yesu

(Mark 7.24-30)

21Yesu col ay ki tana, tuɗ ɦoŋzina tok eg zi ŋgolna Tir u Sidonna. 22Cara kanaanda ka ɦoŋzi namma, mba eg Yesu, sawalla kolo ana, «Bu Suuna, Goŋ Davidna, wan hahawanna wi ge! Ful ma cona ka lasan goronda cocoo.» 23Yesu daɗ vun ka dukgi. Suu haɗi mamsina ɦuɗ tasi egemu, dam ana, «Daɗu ndaɗ tuɗa. Ndaɗ taygi vundikiygi u wal maɗta ɦay.» 24Yesu hoŋ dira ana, «Sunun ay ni kay timigii suu ki viɗi suu Israelna doy hol.» 25Cara mba goɓ gaa fokom, dam ana, «Mala Haɗta, njunun njun ge.» 26Yesu daɗ ana, «Tli funa vi kemba, ɦam ki maŋ gor diginina ni, ka jiviɗi.» 27Ndaɗ hoŋom dira ana, «Na daŋ may, Mala Haɗta. Gor diginina lay ni mbasa felek u fu ma yak ki kaŋga ko kembana layɗi su.» 28Yesu daɗ ana, «Cara, huruk vii ŋgol ɦay. Dlara ndak joɓ kaɗta, ndak hin faɗu.» Goroɗta garaɗ ki hu li namma gaw.

Yesu garaɗ suu tuguɗira ki cocoo

29Yesu gi tam ki, tuɗ fun lumma Galilena. Nam taɓa, kak kay ɦinira. 30Suuna mbay egem bolowo, mbaa suu dalira, suu dugina, suu dagina, suu ndumuna u suu tuguɗira daŋga ŋgol lay. Asi cukusi fok Yesu, nam mbuɗusi ki jiviya. 31Asi wi suu ndumuna mbuɗ ɓakka, suu dagina garaɗ kiyo, suu dalira mbuɗ tuɗa, suu dugina mbuɗ wi lay ni, suu molina mbuɗ gol na tigiriw, gijaŋ geleɗ Lo ma Israelna gaw.

Yesu ɦal funa maŋ suuna bup bup fiɗi

(Mark 8.1-10)

32Yesu yi suu haɗi mamsina ay egem, dasi ana, «Suuna mbuɗ irin hahawi. Asi li buuna un ca ni hindi, va ti ka kosi oloɗi. An ka hinisi tuɗ voo u mayraɗi, asi hin say ha ki voɗo.» 33Suu haɗina joɓom ana, «Aygi fi fu ma ɦam maŋ suu bolow asina ki ŋgoo bagi ni arage?» 34Yesu joɓosi ana, «Ta fun kogi ni gage?» Asi ana, «Funa kiɗisiya, kulufna nde may.» 35Nam di maŋ suuna ana, «Mologi kaŋgaa.» 36Nam yow fu ma kiɗisiyana u kulufna kom yow ni, gi deɓ Lona kamu, nam ɓorowom irim ki duk ɓorow ni, ɦam maŋ suu haɗi mamsina ana ɓorowom ha ki maŋ suuna. 37Gegelay ti funa, hoɓ ki u mayamu. Suu haɗina yowom umba hinda aya, oy kaalamina kiɗisiya. 38Asi suu ti fu namma bup bup fiɗi, ndum boyogina u kemba ka dukgi. 39Yesu hin suuna mbee mbee ni, ful hu lumba, i hu mbassa Magadan.

Currently Selected:

MATIYE 15: BMS

Highlight

Copy