HEBRENA 9
9
Tokka kaŋga kay ndaŋgara ura kolo huulonara
1Galamba jewra gaɗ maɗta ka kay tokka Ziŋ Lonara kaŋga kay ndaŋgara kaa. 2Mbutluɓma ay miniya, li ma jewna yam ana Li ma Teteɗna. Hu li namma wanni pindilla kaa, u fu ma ɦam maŋ Lona tini kay tabulla. 3Ha ŋgoo dagan baraw ma cak ii lina yam ana Li ma Saɓaki Teteɗna. 4Hu li namma ni givin ma togolla ma ŋgal ɓivun ma hisna mini u lorra ka huwa. Hu li namma ni Zandukka Galamba, taɗ hori u lor huruɗu, doyra lorra u manna huruɗu, u tokolora vi Aaron ta tin ɓorara, u ɦinira ceɗira u boyna vi galamba ɓiiri kaɗu. 5Kolo kay zandukka wanni Serubimma laki kaɗu a taki ana Lona kaa, garaŋasi ki bari kay li ma ɓivunna kay cora. Ni ka hu li ma vi u boy namma ki bel belɗi.
6Tle asina li ay ni na, muli suu li ɓivunna sel hu mbutluɓma hu buuna tew tew a li sun masira. 7Mul ŋgol ma li ɓivunna nam dew kal hu mbutluɓma mbana u basara nam li yami dew. Nam kal u busu yoo ma li ɓivunna maŋ Lona kay tamba, kay cora vi suuna asi laɗ ii viɗtara. 8Musuk Lonara tak ki ana voɗta kay Li ma Saɓaki Teteɗna bay mal ki tuwa, ni ay hu li ma mbutluɓma jewna ka tuna. 9Dla ndaɗta halaŋŋi tak ki kay ŋgus dlara ka cecemira. Ni di ana ɦala u ɓivun ma lam u yoorina maŋ Lona ka ndak mbuɗ huu sa ma li usina ki jiviɗi. 10Tin ay ni gaɗta vi suuna kay tlesuu tira u tlesuu cira njaf tokka daŋga zeɗ zeɗ kay a mbus tara ki jivira. Ni kay gaɗta vi sana ɦawaa gak gak a tew hu li ma Lona hin min tlena wili gadlana.
11Kristu mba ko mul ŋgol ma li ɓivunna na kay tlesuu ka cecemina. Mbutluɓma nam li sun mamba huna dlam ŋgol suwa, nam ki teteɗ lay, minimmi ka suunaɗi, ni di anaba, nam ka hu duliyaraɗi. 12Falira Kristu kal hu Li ma ki Saɓaki Teteɗna, nam ka kal u busu ɦugunina u busu mbutlugina kombi, nam ɦal ni busuɗum sem dew kay cooygira a fafatɗa, kay ɦaygi suɗta ka daɓ kiɗira. 13Busuna vi ɦugunina u mbutlugina u busu mbutl ma ŋgaɗam kina, asi yamammi kay suu ki mbuɗi njenjena a mbususi ki jivi teteɗ kay njenje masira kiɗikka. 14Lini jivi na ni busu Kristu hin lini ko me na ɗaŋge, u Musukka didinda nam ɦal tam maŋ Lona ni ɓivun ma pasiyakŋa. Bu Suuna hin mbuɗuygi saa maygira cora kiyo, kay aygi sunuygi Lona ma iirina.
15Gola Kristu ni sa ma duk ɦoŋga kay galamba wilira, kay suu Lona yasina mba fi iirira ka daɓ kiɗira ta nam vi vunum kaɗ hu jona vi Lonara. Asi ndak kay miɗta, miɗ namma mba ni a buɗ suuna ki hu coosira asi laɗ hu li ma asi hum ay u galamba basira.
16Sana li ka iiri tuwa ni vun maɗ kaɗi, boy ma nam dam kana mbuɗ saɓakŋa ni hu li ma nam miɗ kina. 17Vun maɗna malamma li ka tuwa ni saɓakam kaɗi, nam mbuɗ saɓakŋa ni hu li ma nam miɗ kina. 18Galamba jewra u taɗta lay ni ka fi saɓakŋa bay busuna vo kiɗi. 19Jew Moiz di gaɗta ki fok suuna halaŋ ko ay ɓiiri hu magarara na. Ŋgoo dagan nam tli busu mbutlna u yona komu yamam ki kay magaara gaɗta, kay suuna lay halaŋ u hum gu ma yam ana hisop u baraw tlaw ma cili u tlimiɗ timigiinana. 20Moiz ana ni busu ma vi galamba u Lona nam ɦagina kay agi mba lak ɗegee. 21Moiz yam busuna ki kay mbutluɓma lay, u tlesuu li sunda u asi hu tokkana halaŋ. 22U gaɗta ni tlena halaŋ mbuɗ ki pasiyak ni u busuna, cora ka bulum ki bay busuna yam kiɗi.
Ɓivunna vi Kristu yow cora kiyo
23Lini tlesuu ay lasina tak ki ana suu ha huulona ki pasiyaki ni, tasira suu ha kolona mbuɗ ki pasiyakŋi u ɓivun ma daŋŋa ma jivi suna. 24Kay Kristu kal ka ni hu zi ma sa warna minim u komma a tak ki kay dlara gasiraɗi, nam kalni huulona tamba gaw a tak tam ki fok Lona ni kaygiya. 25Mul ŋgol ma li ɓivunna vi suu Juifna kal hu Li ma Teteɗna hu basara tew tew u busuna vi yoorina. Kristu kal hu li ma a li ɓivunna ni u tamba ka sem bolowɗi. 26Lini naɗi ni nam gijaŋ wihawra sem bolowo ay u minda min duliyara day. A gasira nam li cecemi na sem dew ni a fafatɗa. Ni lina hin tok a daɓa, nam a bulum cora kira wanni ɦal tamba a ɓivunna gaw. 27Suuna halaŋ ki ŋgaɓi a miɗ sesi dew, ŋgoo dagan ni kaɓakŋa vi Lona may. 28Kristu ɦal tam a ɓivunna sem dew ni na may, kay yow cora vi suuna ki bolowo. Nam hin hoŋ tak tam a mbara ni ka kay yow cora oloɗi, ni kay a suɗ suu ka juɓumma.
Currently Selected:
HEBRENA 9: BMS
Highlight
Copy
Compare
Share
Want to have your highlights saved across all your devices? Sign up or sign in
Bible Moussey © Bible Society of Chad, 2002.
