HEBRENA 10
10
1Gaɗta vi suu Juifna ni ka va ma tak gasira ki na ɗegee gawɗi, ndaɗ ni ŋgus dlara jivira hin ha fokka. Ndaɗ ka ndak a mbuɗ suu mba eg Lonna ki ɗegeeɗi, u ɓivun ma lam tew tew, na olo, na olo hu basara basara ka daɓbi layna ni ka ndaki. 2Lini suu tok fok Lona asina ay u vira jivira hurusiya ni, coosira mbus kiyo, asi hin ka wi tasi ana ɓakŋa vasi kay coosira oloɗi. Ni hin hin lira li ɓivunna gaw may. 3U gasira ni ɓivun namma sun mamba ni kay a gi hum suuna kay coosira basara u basara. 4Kay busu mbutlina u ɦugunina ka ndak a yow cora vi suuna kiɗi.
5Hu li ma Kristu a mba hu duliyara wanni, nam di Lona anaba,
«Aŋ ka min ni va ma ɓivun u va ma ɦalɗi,
aŋ minin mbalatanu.
6Aŋ ka li furira ni kay va ma ɦala
u yoori suu ŋgal ki
kay li ma ɓivunnaɗi,
ka kay ɓivun ma ki ŋgaɓi kay
a yow cora kinaɗi lay.
7An di ana, An wanni Lona,
an mba ni kay a li va ma u min maŋgana
kay a li va ma ay ɓiiri
hu boy ma Ɓiirina kanna.»
8Nam gijaŋ dira ɗaŋi anaba, «Aŋ ka min ɓivunnaɗi, u tlesuu ɦalaɗi, u yoori suu ŋgal hu li ma ɓivunnaɗi. Aŋ ka min ɓivun kay yow cora kinaɗi lay, aŋ ka li furira kasiɗi.» Na may tlesuu asina ni li u magaara gaɗta. 9Nam di hu olo ana, «An wanni Lona, an mba ni kay a li u min maŋga.» Ni kay ndaɗta Lona bulum ɓivun ma jewna ki halaŋ, mbuɗum u ɓivunna vi Kristu. 10Kay mege, Yesu Kristu li tlesuu Lona minisina ki halaŋ, aygi cooygira mbus ki halaŋ u ɦala nam ɦal mbalatam kira, li sem dew ni ki daɓi halaŋ.
11Muli suu li ɓivunna halaŋ hu buuna tew tew coli u sesi kay a li sun masira, asi li tew tew ni ɓivun ma dew namma ka ndak a yow cora kiɗi lay. 12Kristu li ɓivunna sem dew kay cora. Ni ɓivun ma dlaamba tuɗ ha fok na gak gakŋa ŋgoo dagan nam kak hu bik ko Lona ma njufna. 13Cecemi nam ka juɓ a Lona cukum suu mam suu babalira kaŋga u sem ko va ma tin semma kamma na. 14U ɦal mamba dewra nam mbus cora vi suuna ki pasiyak a fafatɗa.
15Musuk Lonara daygi olo, ndaɗ di ɗaŋi anaba,
16«Gola, ni galamba an hin li u asira,
Bu Suuna di anaba, Ŋgoo buuna wanni
an hin tin gaɗ manda hurusiya,
an hin ɓiirisira hu saa masira.»
17Nam di hu olo ana, «Humun ka hin gan kay coosira u suluk masina oloɗi.» 18Lini cora bulum kiwa ni sa hin ka kal va ma ki ŋgaɓi a yamam ki oloɗi.
Ҥuɗuygi taygi eg Lona tok
19Gorsenna aygi ki buɗi a kal hu Li ma ki Saɓaki Teteɗna, ni u miɗ ma Yesu miɗna. 20Nam malaygi voɗta wilira iirira u baraw ma cak ii lina kina, ni di ana u mbalatam gaw. 21Mul ŋgol maygi ma li ɓivunna tini hu Ziŋ Lonara, 22Ҥuɗuygi taygi ay eg Lona tok, u huu ma jivina, u huu ma tini gasina, u huu ma ki mbusi pasiyak ko saa mayra cora, mbalatay ki mbusi u yo ma ɗilina. 23Vaygi huruygi eŋ kay boy ma aygi ka damma. Aygi wi ki gasi ana Lona hin li u va ma nam vi vunum kamma. 24Lakaygi jek jekee, njun u taygiya, gaɗaygi taygiya, miniygi taygi a li sunda jivira lay. 25Hin dlara tuɗ hu tok maygira kiɗi, laygi ko suu hiŋŋa ka tuɗ hu masira ɗira naɗi, gaɗaygi taygi duk taygi gaɗi na ɗow, kay mege buu vi Bu Suunana hin tok.
26Hu li ma aygi waygi gasira wi, lini aygi laygi cora na gak gaki ni, ɓivun ma yow cora kina ka oloɗi. 27Ni aygi hin laygi ndaana, juɓugi ni va ma hin mbay ha fokŋa, ni di ana ɓakŋa u kura ŋgal cora, ci suu babalira vi Lona kiyo. 28Sa ma hum ka u gaɗta vi Moiz ɗina, asi cam ki ni ka wam hahawambi. Lini suuna wam ki wa ana nammi sa ma li cora, suu diki kamma li goy mba' u hindi. 29Ni sa ma pan Goŋ Lonna hin lini nana ɗaŋge, nam hin busuna vi Goŋ Lonna ma mbus cora kina ko va ma ɦawana na, ŋgul Musukka oora. Agi ndak saa kagi ana ɓakŋa vi sa namma hin lini coo naɗi su? 30Aygi waygi sa ma di anaba, «Sa ma sasugul suuna ni anu, an hin warakaŋŋi anu.» Di olo ana, «Bu Suuna hin kaɓakŋa kay suu mamma.» 31Sana a ndi ki kaŋga ko Lona ma iirina ni loɓ cocoo.
32Humugi gagi kay va ma agi wam ay jewna. Hu buu namma agi fagi kiɗikka vi Lonara fi ni, agi fagi wihawra ŋgolo, na lay ni agi lagi saɓak hu duu namma. 33Fali tari ni asi ŋgulugiya, lasagi ki ii suuna halaŋ, fali tari ni agi tagi mini a njun u suu fi lassa ko ndaɗta nana. 34Agi fagi wihawra hu daŋgayna u yowra asi yowogi tlegeyegira, li ni tlena baay lay, agi vi kagi u furira, kay ki wi kagi ana bege ma gasina ma kak didinna ha foko. 35Hin gasi magira kiɗi, warak ma ŋgolna ka juɓa. 36Agi min a lini lalamba, kay a li va ma Lona minimma, hin fi va ma nam vi vunum kamma may. 37Ko magaara di ana,
«Lina hin tok, hin ew daŋ,
sa ma a mbayna hin mbaa,
nam ka a vi yam ayɗi.
38Kay ndaɗta sa ma irim ɗegeena
kak iiri ni hu vira,
lini nam hoŋ ki daganwa ni,
an ka furi kam oloɗi.»
39Aygi ka duk suu hoŋ ki dagan hin ba kinaɗi. Aygi ni duk suu vina ka hu voɗta suɗta.
Currently Selected:
HEBRENA 10: BMS
Highlight
Copy
Compare
Share
Want to have your highlights saved across all your devices? Sign up or sign in
Bible Moussey © Bible Society of Chad, 2002.
