HEBRENA 1
1
Lona ɓak maŋ suuna u Goromma
1Ay jewra Lona ɓak somoyoygi sem bolowo. Di suu jokom vunumma u yal ma daŋŋa zeɗ zeɗ lay. 2Kay aygi suu ka hu buu ma dagan cecemina nam daygi boyna ni hu Goromma. Lona li tlena halaŋŋi u namu, tle asina halaŋ Lona hinimsina halaŋŋi komu. 3Nam weleɗ kiɗikka ŋgolla vi Lonara, nam tli tammi u Lona tamba gasi, tlena coli hu liisi ni u saɓakŋa vi boy mamma. Hu li ma nam mbus cora vi suuna ki pasiyak mbusni, nam i kolo huulona kaki hu bik ko Lona ma njufna ma saɓakŋa kom belna.
Goona ŋgol su suu sunda huulona
4Goona mbuɗ ni ŋgol su suu sunda huulona, Lona tinim semma ŋgolna kam su masina. 5Duk suu sunda huulona halaŋŋi nam di maa ka dew ana,
«Aŋŋi Goronna,
karam an mbuɗ ni Buŋu»,
ka naɗi lay. Nam di ka maŋ sa sunda huulona maa dew ana,
«An hin li a Bumu,
nam hin li a goronna may,» ka naɗi.
6Hu li ma Lona a sun Gorom ma dewna ay kaŋgara wanni nam di ana,
«Suu sunda huulona halaŋŋi
hin goɓ kaŋga fokomu.»
7Gola ni boy ma Lona dam kay suu sunda huulona,
«Lona li suu mam suu sunda huulona ki semeɗna,
suu sunumma nam lasi ki sin kura.»
8Kay Goona ni, Lona di ana,
«Dlam maŋga mulla, Lona,
tiniŋ kaɗ ni a fafatɗa.
Aŋ ti mul maŋga ni u ɗegeera.
9Aŋ min ni dlara ɗegeera,
ta cora ni aŋ noyoɗ kiyo,
ni kay ndaɗta Lona,
Looŋŋa, manaŋŋa,
nam oyoŋ huruŋ u furira
kay ɦala nam ɦaŋ li ma jivina,
jivi su ma nam ɦam maŋ ndarayaŋŋana bel.»
10Nam di olo ana,
«Ni aŋu Bu Suuna hu jewra tin ayra
li ndaŋgara ni aŋu.
Li kolora ni u koŋ taŋga lay.
11Asi halaŋŋi hin daɓ kiyo,
aŋ hin hin iiriya,
asi hin mbuɗ ki ni ko barawina na.
12Aŋ hin ɗuɗusi ki ko baraw ma cuk tara na.
Asi hin mbuɗ ki ni ko barawina na.
Aŋ hin li ni ko taŋga ndaɗta na
ka mbuɗ maaɗi a fafatɗa.»
13Duk suu sunda huulona ni nam di maa ka dew ana,
«Aŋ kak kay bikin ma njufna,
gak gak an cukuŋ suu babali maŋsina
kaŋga u seŋu
ko tlesuu tin semma kasina na,» ka naɗi.
14Suu sunda huulona asina ni suurage? Ni ŋgussa suu sun Lona suu nam cukusi a njun u suu fi suɗtana.
Currently Selected:
HEBRENA 1: BMS
Highlight
Copy
Compare
Share
Want to have your highlights saved across all your devices? Sign up or sign in
Bible Moussey © Bible Society of Chad, 2002.
