KALKIRA 40

Voɗta kay a pi mbutluɓma ki koloo, lam ki teteɗ may

1Yawe di Moiz ana: 2«Hu til ma jewna, hu buu ma dewna ni aŋ pi mbutluɓma ki koloo, ni li ma agi ŋgaf tagi huna. 3Aŋ tin Zandukka Galamba huwa, aŋ tiniɗ ha ki ŋgoo baraw ma caki dukŋa daganna. 4Aŋ tli tabulla tiniɗ hu liiɗ u tlegeyeɗ suu kaɗna halaŋ. Aŋ tli pindilla ha kalafiya, tin kura hu may. 5Aŋ tin givin ma togolla ma ŋgal mbul ma his jivina fok Zandukka Galamba na tok. Aŋ njun gojolina ki fun vun mbutluɓ ma kal ha kalafina. 6Aŋ tin givin ma togolla eg vun ma kal ha kalafi hu mbutluɓmana na tok. 7Aŋ tin tassa ŋgol ma mbussa duk ɦoŋ givin ma togolla u mbutluɓma na gay. Aŋ voom mbona hurum may. 8Aŋ pi nduŋga ay ŋguy kay mbutluɓmara, cak gojolina ay vun grekŋa may. 9Aŋ tli mbul ma fuura fuu mbutluɓma u tlesuu kurufu hurumma halaŋ, aŋ lasi ki teteɗ u tlesuu li sunda huna halaŋ halaŋ. Asi hin ki ni teteɗ. 10Aŋ fuu givin ma togolla u tlesuu li sunda huna halaŋ. Aŋ lasi ki teteɗ, asi hin ki ni teteɗ may. 11Aŋ fuu tassa ŋgolna u va ma nam tini kamma lay, aŋ lasi ki teteɗ. 12Aŋ tak Aaron u goryom ki fun mbutluɓ ma suuna tok huna. Aŋ mbususi ki u yona. 13Aŋ cuk baraw ma teteɗna ta Aaron, fuurumu, aŋ mbuɗum ki teteɗ a nam li sunda lan ɓivunna. 14Ŋgoo dagan aŋ takam goryomu, cukusi baraw ma njibirna ma li sunda hu mbutluɓmana tasiya, 15aŋ fuurusi ki ko ndal busi na may, kay a asi li sunda lan ɓivunna. Fuura aŋ fuurusira ɦasi ni sunda a fafaɗta ha ni hu basara basara na gak gak.»

Moiz pi mbutluɓma ki koloo

16Moiz gijaŋ sunda ni na gaw, nam li ni ko ndal Yawe damba na may. 17Ni hu til ma jewna hu basara mbara, hu buu ma dewna may. Mbutluɓma min ki ni na gaw. 18Moiz pi mbutluɓma, nam njaa kawi ma col guna kamma pi nduŋga huwa, min zulla kal tokolora hura col mbutluɓma ki koloo. 19Ŋgoo dagan nam baa baraw ma ŋgolna ay kamu, hin kuluɓ baraw ma baaram yamma ay kayam hu olo ko ndal Yawe di Moizza na. 20Nam yow ɦini mayra gaɗta ɓiiri kaɗta cukuɗ hu Zandukka kalaɗ tokolora keŋeɗu, dug vun Zandukka hu may. 21Nam kal Zandukka ha kalafi hu mbutluɓma, cak ii Zandukka ha ki u baraw ma ŋgolna ko ndal Yawe di Moizza na. 22Nam tin tabulla kalafi hu mbutluɓma keŋ ma ii mbayawna na, ki ni ii bunsu ŋgoo baraw ma caki kurufuna. 23Nam njaa funa kayam fok Yawe, ko Yawe di Moizza na. 24Nam tin pindilla kalafi hu mbutluɓma vok taɗ u tabulla na keŋ ma hiŋŋa ii dali na. 25Nam tin ku pindilla fok Yawe, ko Yawe di Moizza na. 26Nam tin givin ma togolla ta yoori u lorra hu mbutluɓma vok baraw ma caki dukŋa na gay. 27Nam ɗus mbul ma his jivina huwa ko Yawe di Moizza na. 28Nam cak gojolina fun vun ma kal kalafi hu mbutluɓmana. 29Nam tin givin ma togolla fun vun mbutluɓma na ni ŋgaɗ ɓivun ma ŋgal kina u ɓivun ma njaf wana huwa ko Yawe di Moizza na. 30Nam tin tassa ma mbussa duk ɦoŋ givin ma togolla u mbutluɓma na, vo yona hu a mbussa may. 31Moiz may, Aaron u goryom may, mbus kosi huwa, mbus sesi ki may. 32Hu li ma asi a cuk kalafi hu mbutluɓma, ɗowba a tuɗ fun givin ma togolla ni, asi mbus kiyo, ko Yawe di Moizza na. 33Nam gi kaana ay ki kay mbutluɓma, cak gojolina ay ki vun grekŋa may. Moiz daɓ sunda ki halaŋ ko ndaɗta na.

Bibiŋil Yawera oy ki hu mbutluɓma

34Ɗugulla kuluɓ ki kay mbutluɓma, bibiŋil Yawe oy ki kalafi hu mbutluɓma.#1 Mul. 8.10-11; Eza. 6.4; Eze. 43.4-5; Wira 15.8 35Moiz ka ndak a kal kalafi hu mbutluɓmaɗi, kay ana ɗugulla ka kayami, bibiŋil Yawe ki oy kalafi huwa. 36Suu Israelna a jok usira ni hu li ma asi wi ɗugulla ka ki kolona tuwa. 37May lini ɗugulla ka kay mbutluɓma tuwa ni asi ka jok usiɗi, ta ta hu buu ma ndaɗ ka kina tuwa. 38Kay faali halaŋŋi ɗugulla vi Yawera ka kolo kasiya, njeŋge ni ɗugul ndaɗta mbuɗ kasi a kura wi lina. Ku ndaɗta ha kini kay suu Israelna halaŋ, ha hu li ma asi jok huna halaŋ lay.

Currently Selected:

KALKIRA 40: BMS

Highlight

Copy