KALKIRA 39
39
Baraw ma vi muli suu li ɓivunnana
1Asi cil baraw ma vi muli suu li sunda ɓivunna hu mbutluɓmana ni u baraw ma tlawam wili wilina u ma tlaw keŋ keŋŋa u ma tlawam war warna may, maŋ muli suu li ɓivunna. Asi ɗee baraw ma vi Aaron ma teteɗna ki ni zeɗ ko Yawe di Moizza na may.
2Nam ɗee baraw ma efodna ni u lorra, u baraw tlawna u ma wili wilina, u ma tlaw keŋ keŋŋa u ma tlawam war warna u baraw dlemba dereŋga may. 3Asi paa lorra ki ko barawra na, a ɗee duk ɦoŋ baraw ma tlawna, ma wili wilina ma tlaw keŋ keŋŋa u ma tlawam war warna u baraw dlemba haɓpa may. 4Nam ɗee zewna fun baraw ma efodna a gaɓam ay kolo kelnara. 5Zew ma njun baraw ma efodna li ni zew ma ko tam dewna, lammi u lorra u baraw tlawna u ma wili wilina u ma tlaw keŋ keŋŋa u ma tlawam war warna u baraw dlemba dereŋga ko Yawe di ay maŋ Moizza na. 6Asi ceɗ ɦini mayra yaɗ ana oniks mba', ŋguyuɗ keŋeɗ ki u lorra, ɓii sem suu Israelna kaɗu. 7Asi kalaɗ hu baraw ma efodna, ɦini ndaɗta mba' ni a gi humba kay suu Israelna ni ko Yawe di Moizza na.
Goo mbumbu ma gaɓam gudikŋa
8Ŋgoo dagan nam ɗee mbumbu ma gaɓam gudikŋa ni ko ndal baraw ma vi efodna na may, u lorra, baraw tlawna, ma wili wilina, ma tlaw keŋ keŋŋa, ma tlawam war warna u baraw dlemba dereŋga. 9Baraw ma gaɓam gudikŋa hayammi fun tam dew, fiyekemmi gor meter#39.9 gor meter (centimetre) Gor meter kis ni fun tam dew u meter dew. dok-mba' yam vadl hayammi na lay. 10Ndalam tam na kolo kolo fiɗi, ndalla jewra ni u ɦinira gus loɓma, ta yaɗ ana, sarduwan, topaz u emerodta. 11Ndalla mbara ni u ɦinira yaɗ ana eskarbukle, lazulit u jaspe. 12Ndalla hindira ni u agat, kornalin u ametist. 13Ndalla fiɗira ni u krisolit, beril, oniks. Ndaɗ halaŋ ay kali hu zuluɗu, gaɗ keŋeɗ ki ŋgoŋ ŋgoŋŋa u lorra may.
14Ҥinira doogo yam mba' ni kay sem suu Israelna na tew may. Ndaɗ ni doogo yam mba' ko sesi na may. Ndaɗ ay ɓiirira ni ko tampoŋŋa na, njaf maanagelay ni ka u sem huwa kay asi ni doogo yam mba'. 15Asi li zew ma njun baraw ma gaɓ gudikŋa ni u lorra gii ko ndal suuna gi zewnara na. 16Vunum ma kolona asi kal walak lorra hu mba' u zew ma njunumma ni u lorra halaŋ. 17Zew ma njunumma asi kalam ay hu walak mayra asi yooroɗ funda. 18Hu li ma asi njun zew lorra fun nana, tuɗ njunum ha ki eg baraw ma efodna, 19Baraw ma gaɓi gudikŋana, ii ma kurufuna asi li ŋgil walakka ha hu mba', a njunum vunum ha eg baraw ma efodna may. 20Baraw ma efodna asi li ŋgil walakka ay ii ma ki buruna na may a njunusi fun tasira. 21Asi taɓ baraw ma gaɓ gudikŋa eg tammi u walak ndaɗta. Ni kay a baraw ma gaɓi gudikŋana jok um ki ɗi ko Yawe di Moizza na.
Baraw ma teteɗ ma daŋŋa
22Ŋgoo dagan nam ɗee baraw ma kurufuna cuk ha ki kay seŋga ni u baraw ma wili wilina. 23Barawra ŋgol ndaɗta li ma kal yaŋ ha huna cooy duk gayra, vunuɗ ki dami ɗeera cocoo kay a ndaɗ haaɗira. 24Vun barawra ma gana asi ɦos tlena ki fun na luy luy, u baraw ma tlawam wili wilina, ma tlaw keŋ keŋŋa ma tlawam war warna u baraw dlemba dereŋga. 25Duk tlesuu ɦosi funna asi gaɓ geeleŋga duku geeleŋ ndaɗta yoo ni lorra taɗta. Asi ŋguf geeleŋga ki fun barawra duk tlesuu ɦosi funna na cutl. 26Gi geeleŋ dew ni gi va ma asi cilim namma dew may, ŋguf vun baraw ŋgol ndaɗta ki u asiya, ni kay a li sunda hu mbutluɓma ko Yawe di Moizza na.
27Ŋgoo dagan asi cil baraw ma njibirna dlemba cuk ta Aaron u goryomba. 28Asi cil gaɗamulla ni u baraw dlemba dereŋga lay u tlesuu ndalasi eg gaɗamullana ni u baraw dlemba lay, u kalasoŋga kurufura lay, u barawra cuk pay kurufura lay, ni u baraw dlemba halaŋ. 29Gandi ma njun huuna ni u baraw dlemba dereŋ ndaɗta lay tlawam wili wili may, tlaw keŋ keŋ may, tlawam war war may. Suu wi yal dam vun tlena cilimmi asiya ko ndal Yawe di Moizza na.
30Ŋgoo dagan asi yoo tampoŋŋa u lorra ni va ma teteɗna. Asi ɓii kolo kay va namma ni ɓiira «TETE ƊTA MAŊ YAWE». 31Asi cilim zew ma tlawam wili wilina umu, njunum ay kolo kay gaɗamulla ko Yawe di Moizza na.
Sun mbutluɓma daɓmi na
32Gola sun mbutluɓma daɓmi ko ndaɗta na. Suu Israelna halaŋ cuk tasi hu sunda, asi li u dlara Yawe daɗ maŋ Moizza halaŋ. 33Asi tuɗ mbutluɓma ay fok Moiz. Mbutluɓma u tlegeyem suu sunda kawi ma ɓalam kolona, gu nduŋga zulumba cooyra u kawi ma colom sem kolo kamma halaŋ. 34Baraw ma u bak gamlagina ma coori tlawna u baraw ma u bak vabak ma lus duk mbona, baraw ma cak ii lina kina. 35Zandukka Galamba, tokolora tlaɗ u ndaɗta u vunuɗ ma dugi funuɗna. 36Tabulla u tlegeyeɗ suu li sunda halaŋ u fu ma ɓivunna 37Pindilla yoori u lorra taɗtara gogor koɗ ma tin kura u tlesuu li sunda huna halaŋ, mbul ma vi kura. 38Givin ma togolla ma mini u lorra na, mbul ma fuura, mbul ma his ma ŋgalla, gojoli ma ay caki vun grekŋana. 39Givin ma togolla ma mini u kawi ma tlawna, tokolora tlamba u tlesuu li sunda huna halaŋ. Tassa ŋgolna u va ma nam tini kamma. 40Tlesuu njun kaana kolona u gu nduŋga, kawi ma col u nduŋga kolo kamma, gojoli ma ay caki vun grekŋana, zew ma njunumma, gu ma pam kolona u tlesuu li sunda hu mbutluɓmana halaŋ hu zira tokka lay. 41Baraw ma li sunda hu givin ma togolla, baraw ma teteɗ ma vi mul ma li ɓivunna Aaronna, u baraw ma goryom cukum tasi a li sunda ɓivunnana.
42Halaŋŋi ko ndal Yawe di Moizza na. Suu Israelna li sun ndaɗta ki dew dew halaŋ. 43Moiz wi sunda asi laɗta na ni, asi li gasi ko Yawe dira na may. Kay ndaɗta Moiz paɗ vunum ki kasiya.
Currently Selected:
KALKIRA 39: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
