KALKIRA 11

Moiz di ki kay miɗ ma gor suu ŋgolona miɗna. Dlara mbuɗta doogora ta daɓ daganda

1Yawe di Moiz ana, «An min mbaa tuguɗira daɓ daganda kay Faraw, kay suu Egiptena halaŋ lay. Ŋgoo dla ndaɗta ni nam hin hinigi agi tuɗa. Ka hinigi a tuɗ ɦawaɗi, nam hin dikigi ni a fafaɗta. 2Aŋ di suu Israelna asi joɓ suu vok ziisina, cara joɓ ndaraɗta vok zina lay, kay gi doonora, lorra, u gursuna.» 3Yawe hin kal oo mamba huu suu Egiptena. Moiz hin mbuɗ ŋgol coco hu mbassa Egiptera, ii suu sunda vi Faraw, ŋgol ii suu Egiptena halaŋ.

4Moiz di ana, «Yawe di ana karam duk ŋgikka ni an hin kal ay ki duk suu Egiptena. 5Gor njufii suu vuɗ fok jew hu Egiptena halaŋ hin miɗ kiyo. Goŋ Faraw ma ŋgolna ma a kak gin kay mul mambana, goŋ ca mayra li sunda hu li ma luɗ fuɗta ma ŋgolna lay ta ta gor yoori suu vuɗ jewna lay. 6Tii ma ŋgolna hin tum kolo hu mbassa Egiptera cocoo, dlara ko ndaɗta na bay li dew tuwa, ha fokka lay ndaɗ ka li na oloɗi. 7May duk suu Israelna ni di lay ka buɗi lay, vabak lay ka miɗɗi lay, kay a agi wi ki ana Yawe ɓorow ii suu Israelna ki u suu Egiptena». 8Moiz di olo ana, «Hu buu namma suu sun maŋsina hin mba egenu goɓ kaŋga fokonu, dan ana, agi u suu maŋsina halaŋ tuɗugiya, hu li namma ni an hin tuɗa.» Moiz hurum ɓeŋ cocoo, kal ay ki vi Farawni u yara.

9Yawe di Moiz ana, «Faraw ka hin a humuŋ vunuŋgi. An li dlara mbuɗ mbuɗta van coco lay ni nam ka min a humbi.» 10Moiz u Aaron li dlara mbuɗ mbuɗ ndaɗta halaŋ fok Faraw, na may Yawe so huu Faraw gak gak ka min a hin suu Israelna a cuk ki hu mbas mambaɗi.

Currently Selected:

KALKIRA 11: BMS

Highlight

Copy