KALKIRA 10

Dlara mbuɗta kalavandira u baa jeena

1Yawe di Moiz ana, «Tuɗ vi Faraw kay an soom hurummi an daŋ may, u suu sun mamsina halaŋ kay a tak ki dukusi ana An Kaa. 2Ni kay a aŋ hin cuɗ dla ndaɗta ka maŋ goroŋ u goŋgolo maŋŋa kay dlara an laɗ eg suu Egiptena wandara u dlara mbuɗ mbuɗta an laɗ dukusira a agi wi ki ana anni Yawe.» 3Moiz u Aaron tuɗ vi Faraw dam ana, «Yawe, Lo ma vi suu Hebrena, di ana, Aŋ hin a hoŋ yaŋ ga fokonni saɓa tuge? Hinin suu mansina asi tuɗ sununu. 4Lini aŋ ka hinin suu mansina a tuɗɗi gakini, vin wanni an hin mbaa baa jeena hu mbas maŋga. 5Nam hin cuk wanni aŋ ka wi yam ndaŋgara kiɗi u tlesuu hin ko dlaŋmaginana nam hin tasi ki halaŋ halaŋ, nam hin tagi hum ŋgusugi suu hu senenana ki halaŋ lay. 6Asi hin oy ki vo hu ziiŋu hu ziŋ suu sun maŋsina, hu zina vi suu Egiptena halaŋ. Ni va ma buyuŋ ŋgolona u somoyoŋ lay wam ay ka jewɗina hu li ma asi ay hu duliyara dayna.» Moiz gi tam hoŋ ki dagan hin ziŋ Farawna.

7Suu sunda vi Faraw ɓak tasi ana, «Sa namma a hin hiniygi dla cora mbaaraygira ay kaygira kini saɓage? Aŋ hin suu asina asi tuɗ sun Yawe, Loosina. Aŋ ka wi ana suu Egiptena daɓ ki ni daɓiya naɗi su?» 8Asi hoŋ gi Moiz u Aaron ay eg Faraw dasi ana, «Tuɗugi sunugi Yawe, Loogina ɗaŋŋi suu tuɗna ni gegege?» 9Moiz dasi ana, «Ami tuɗni u goryomiya u suu mami suu maarina, ami tuɗ u gorɓii mamisina u gor njufiina lay u yoori mami suu ŋgolona u suu gorina lay, kay koy ndaɗta kami ni a ŋga ni Yawe.» 10Faraw dasi ana, «Ko Yawe li u agiya, lini an hinigi agi tuɗ u goryogi lay ni, gola agi hal ni dlara cora. 11Ni ka ndak a li naɗi, agi suu ŋgolona tuɗugi ni agi hol tuɗ sunugi Yawe, kay agi halni na daŋ may.» Asi dikisi ay ki taraŋ vi Faraw.

12Yawe di Moiz ana, «Maɗ koŋ kolo kay mbassa Egiptera, yasi jeena ay kasiya, nam mba cuk kay mbassa Egiptera. Nam ti usu ma hu mbassana ki halaŋ, ti tlesuu usi hin ka ko dlaŋmaginana kiyo.» 13Moiz tli tokolo mamba kolo kay mbassa Egiptera, Yawe paɗ babaana ay kolo u maɗiina na ni hu buu namma u njeŋgera halaŋ tuɗ tew maɗiiya ni, babaa ma u maɗiinana mbaa jeena aya. 14Jeena cuk ki kay yam mbassa Egiptera halaŋ, etl ki kay yam ndaŋgara halaŋ halaŋ. Jee namma ay jew dayra ni li ka na ɦoyɗi, ha fokka lay nam ka ndak a li naɗi lay.#Wira 9.2-3 15Nam kuluɓ yam mbassa ki na halaŋ, mbuɗ lina ki ndufunda na gim. Nam ti usuna ki halaŋ ti vuɗ ŋgusi suu maa ka ko dlaŋmaginana ki lay, ŋgusugina hin halaŋŋi hum ka kasi oloɗi ki ni hu mbassa Egiptera halaŋ halaŋ.

16Faraw gi sunda a hal Moiz u Aaron ay na zak zak ana, «An li cora eg Yawe, Loogina, egegi agi lay. 17Cemi an cenegiya heɓ hurugi egen olo. Cen Yawe, Loogina, a nam wan hahawan dikin miɗ namma ha ki egen na dikge.» 18Moiz kal ay ki vi Faraw cen Yawe. 19Yawe mbuɗ ii babaa ma ŋgolna u fiɗigina, babaa namma tuɗ u jeena tuɗum ha ki duk mbo Lum ŋgol ma Cerewna. Jee na dew lay hin ka hu mbassa Egipteraɗi.

20May ni Yawe so huu Faraw ka min a hin suu Israelna a cuk kiɗi.

Dlara mbuɗta dleeŋera u ndufunda

21Yawe di Moiz ana, «Maɗ koŋ ki kolo huulona, yi ndufunda ay kay mbassa Egiptera, ni ndufun mayra sa ka wi duk kombi layra.» 22Moiz maɗ kom kolo huulona, hu buuna hindi ndufunda ŋgolla mba hu mbassa Egiptera.#Soo. 105.28; Wira 16.10 23Buuna hindi ni sa ka wi tambi lay, ka cala ki a poyɗi lay. May ni suu Israelna kiɗikka ka kasi hu li ma asi cuki huna tew tew.

24Faraw yi Moiz ha dam ana, «Tuɗugi sunugi Yawe, may ni yoori magisina suu ŋgolona u suu gorina halaŋ hinisi ka tani. Gor kem magisina ndak tuɗ u agiya.» 25Moiz dam ana, «Aŋ taŋga hin a ɦami tlesuu li ɓivun ma ŋgalam kina maŋ Yawe, Loomina, ni aŋ su? 26Yoori mamisina hin tuɗ ni u amiya, yoo maa dew lay ni ka hin ka taniɗi, kay duk tle asina ami hin vi a sun Yawe, Loomina ni uwa. Ami lay ni ka wiɗi hu li ma ami tew ha tanana li vi a li ɓivunna maŋ Yawe ni me kala ami ka wiɗi.»

27May Yawe so huu Faraw ka min a hinisi a tuɗɗi.

28Faraw di Moiz ana, «Huɗ taŋ ha ki egenu, an hinni ka waŋ seŋ varan tanɗi. Hu buu ma aŋ wan irin wa ni aŋ ba wa.» 29Moiz dam ana, «Ko aŋ dira na an ka waŋ iriŋ oloɗi.»

Currently Selected:

KALKIRA 10: BMS

Highlight

Copy