SUNDA 24
24
Suu Juifna sek Pol fok mul ŋgolna
1Li buuna ŋgoo dagan vadl mul ŋgol ma ɓivunna, Ana nias mba Sesare u suu ŋgolona umu, u sa ma di ki mbak mbakŋa dew, yam ana Tertullus. Asi mba sek masira fok mul ŋgolna, Feliks, kay Pol. 2Asi yi Pol ay yi ɗaŋŋi Tertullus gijaŋ ɓakŋa ɗaŋ ana,
«Sa ŋgolna ni u jivi maŋga ami ka laki u heɓpa gasira, u nera vi mul maŋga, aŋ li tlena jivi halaŋ ndaki kay suuna. 3Kay tlesuu ami fasina halaŋ hu lina aragelay ni ami gaŋ deɓ ŋgolo. 4An ka ɓeŋeŋ faɗta ki ŋgolɗi, ni an min ana aŋ humumi boy mamina na ew. 5Ami wi ana sana wanni sa ŋgol ma dlam ki saɓaki co ɦayna, nam mba dlara duk suu Juifna suu hu ndaŋgara halaŋ, nam ɓeŋesi ki ni namu, nammi mulna fok suu Nazaretna. 6Nam hal a ɓeŋ teteɗta vi Ziŋ Lonara ŋgola ki lay, ni ami vamu. [Ami min gin a kaam ɓak mamma u gaɗ mamira, 7na may sa ma ŋgol asgaana Lisiyas ɓaɗamina ay ki komi ni u saɓakŋa. 8Ŋgoo daganni nam Lisiyas ana suu sek kamma mbay fokoŋ tani.] Aŋ joɓom wa ni aŋ hin wi ana boy ma ami damma kamma ni gasira.» 9Suu Juifna taɓ vunusi u namu ana dla ndaɗta ni na daŋ may.
Pol di ki kay dlaamba fok Feliks
10Mul ŋgolna maɗ kom ana Pol di ay ɗaŋ, Pol gijaŋ boyna ɗaŋ. «Aŋ li basara ŋgolo a sa ma kaɓakŋa tani, ni an hurun vi a ɓak boy manna fokoŋu. 11Aŋ hin halam ummi aŋu, an mbay Yerusalem a cen Lona ni buuna ka bay su kay doogo yam mba' tuwa. 12Sa fan ay ka a ɓak boy ha sa hu Ziŋ Lonaraɗi lay, fan ka coli duk suuna kolo hu Zira Tokkaɗi lay, ɗowba hu ɦoŋzinaɗi lay. 13Suu asina ndak ka a di ki kay dla mayra asi mba seken kaɗ koyniraɗi lay. 14Ni an wi ki kan fokoŋ tani anaba, an sunni Lona vi somoyomi ma jewna u voɗta wilira, ta asi di kaɗ ana ka u voɗoɗɗira. An vi u boy ma ɓiiri hu magaara gaɗta halaŋ u suu jok vun Lonna lay. 15An hurun tini kay Lona ko asi tasira tini kamba na may, kay colla kolo iirira vi suu ɗegeena u suu ka ɗegeeɗina. 16Ni kay ndaɗta an so tan baba ana an hurun li jivi fok Lona jivi fok suuna lay.
17«An li basara ŋgolo bay mbay hu Yerusalem, ni an mbay a njun u suu manna u gorsenna, a li ɓivunna maŋ Lona may. 18Na ɗaŋŋi va ma asi fan an lam hu Ziŋ Lonara ni mege? An ay ni duk tokka a dan tara ki jivi teteɗta. Suuna ay ka un hu bolowɗi lay, ni boy ma dadam ay kaɗi lay. 19Suu Juif suu hu ndaŋgara Azira suu ɦiw ay huwa, li ginni boy funusiya ni suu asina a li gin fokon a seken ni asiya. 20An ay fok suu ŋgolo suu kaɓakŋa ni asi suu ca wanna ni va ma asi fam ay egen ana an lam cona ni mege? 21Va ma an dam ay fokosi eŋ ŋgolna ni kay an vi u paɗta kolo iirira vi suu miɗina, ni an ka hu ɓakŋa fokogi karami kay boy namma.»
22Feliks boy namma ki irim jew jiviya, ni nam ana asi tuɗa, sa ma ŋgol asgaana Lisiyas hin mba wa ni, an hin kaagi ii ɓak magina tuwa. 23Nam ɦal voɗta maŋ sa ma fok suu asgaana ana nam gol Pol hu daŋgayna jiviya, hinim voɗta buɗi a nam ŋgaf u suu banayamma u suu somo mamba asi mba ŋgaf u namu.
Pol fok Feliks u Drusiye
24Li buuna ŋgoo dagan ca ni Feliks mba u caamba Drusiye, ndaɗ ni goora Juiffa. Nam gi sunda kay Pol a nam min hum u boy ma nam dam kay vira u Kristu Yesuna. 25Pol gijaŋ boyna a ɓak kay a sana kak iiri ɗegeera, kay doora doo tara, kay ɓakŋa vi Lona ma hin mbana. Feliks tam mbuɗ ndaana, nam di ana, «Aŋ tuɗ cecemi vaŋ tuwa, buu ma daŋŋa an hin yaŋ ay tu olo.» 26Nam saa ana Pol hin ɦam gursu kala, ni kay ndaɗta nam yi Pol ay egem tew tew ni na.
27Li basara mba' ŋgoo dagan Porsiyus Festus varak balam Feliks a mulna. Feliks min a li tam jivi ii suu Juifna, ni nam hin Pol hu daŋgayna.
Currently Selected:
SUNDA 24: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
