SUNDA 23

1Pol ŋgaras irim kay suu ŋgolo suu kaɓakŋa dasi ana, «Gorsenna, an ay day day, gak gak karami hurun bay ɓeŋ fok Lona tuwa.» 2Mul ŋgol ma li ɓivunna, Ana nias, di maŋ suu laki eg Polna ana asi cam kay vunumu. 3Pol dam ana, «Aŋŋi ko goŋga haɓpa na, Lona hin caŋŋi namu, aŋ mba tani a kaan ɓakŋa kan u gaɗta, doli ni ka ko gaɗta dira naɗi lay, aŋ di suuna ana asi canu.» 4Suu laki eg Polna dam ana, «Aŋ ŋgul mul ŋgol ma ɓivunna vi Lona su?» 5Pol hoŋosi dira ana, «An wi ka ana nammi mul ŋgol ma ɓivunna naɗi gorsenna. Kay magaara di ana, aŋ di va ma co eg mulna vi suu maŋŋaɗi.»

6Pol wi ana suu ŋgolo suu kaɓakŋa ni suu ɦiw ni suu Sadusenna su ɦiw ni suu Farisenna may. Ni kay ndaɗta nam di kolo eŋga ana, «Gorsenna anni sa ma Farisenna, goo ma Farisenna lay. Ni kay an vi u colla kolo iirira vi suu miɗina an ka cemi fok suu kaɓakŋa ni na.» 7Nam di boy namma na di ni suu Farisenna u suu Sadusenna irisi ɓorow ki mba', dlara col kolo dukusi ni suu tokina halaŋ vunusi ka taɓ oloɗi. 8Suu Sadusenna di ana suu miɗina ka coli kolo iiriɗi, suu sunda huulona kaɗi lay, ŋgussa kaɗi lay. Ni asi suu Farisenna may ni vi usi halaŋ. 9Asi tum soora kolo coco na ɗow, suu ŋgolo suu haɗ gaɗta duk suu Farisenna yow kolo u dlara eŋga di ana, «Sana wanni ami fi va ma co ka hurumbi, lini ŋgussa kala, sa sunda huulona kala, dam boy ni diya.»

10Sa ma ŋgolna vi asgaana wi ana ciwayra mbuɗ ki dukusi honira ni nam mbuɗ ndaana ana asi hin li va ma co eg Pol kalage. Kay ndaɗta nam cuk suu mam suu asgaana duk suu tokka ana asi tuɗ tay Pol ay kiyo, tuɗum ha ki hu zira ŋgolla suu asgaana buu hura.

11Hu njeŋgera wanni, Bu Suuna tak tam ii Pol dam ana, «Vi huruŋu, aŋ diki kan hu Yerusalem tani, tuɗ diki kan hu Rom na may.»

Suuna tok vunusi kay a ci Pol kiyo

12Vin maɗiira wanni suu Juifna vi vunusiya, asi suu tasi ki ana asi ti vaɗi lay, ci yoɗi lay, gak gak asi ci Pol ki tuwa. 13Suu taɓ vunusi asina su kay dok fiɗira. 14Asi tuɗ eg muli suu li ɓivunna dasi ana, «Ami suu tami ki ana ami ka tami vaɗi gak gak ami cami Pol ki tuwa. 15Agi suu ŋgolo suu kaɓakŋa joɓogi ŋgolla vi suu asgaana ana nam ɦagi Pol aya, a agi golom u ɓak mamma ki jivi suwa. Ni ami hin minimi tami a cam ki fok jew bay nam mba tani.»

16Go ndusu ma vi Polna hum boy namma na ni, tuɗ dam nam Pol hu zira daŋgayna gaw. 17Suu tini fok asgaana Pol yi sa ma ay dukusi dew dam ana, «Tuɗ tin goozoŋŋa wanni ha maŋ sa ma ŋgol asgaana, kay boy ka funum a damu.» 18Nam tayam tay ni tuɗum eg sa ŋgol asgaana dam ana, «Sa daŋgayna Pol yan ha egem dan ana, an tuɗuŋ goozoŋŋa wanni ha egeŋu nam a daŋ boyo.» 19Sa ma ŋgol asgaana tay goozoŋŋa um tay ni joɓom ana, «Aŋ a danni boy mege?» 20Nam hoŋom dira ana, «Suu Juifna vi vun tasi ana asi joɓoŋ vin maɗii ni aŋ ɦasi Pol haa asi hin tuɗum fok suu ŋgolo suu kaɓakŋa, a suu kaɓakŋa golom u boy mamma ki jiviya. 21Ni aŋ vi boy nammaɗi, suuna ka su dok fiɗi a hin ŋgay tasi ki ŋgay ni cam kiyo. Asi suu tasi ki ana asi ti vaɗi lay, ci yoɗi lay gak gak asi ci Pol ki tuwa. Asi tasi ki miniya, juɓuŋŋi hoŋ diiŋga doy hol.» 22Nam sa ma ŋgol asgaana gaɗ goozoŋŋa ana boy namma wanni nam dam ki saɗi. Hin hinim nam tuɗa.

Sun Pol ha maŋ mul ŋgolna Feliks

23Sa ma ŋgol asgaana yi suu tini fok suu asgaana ay egem mba' dasi ana, «Yow suu asgaana kis kis mba' suu kulumina dok kiɗisiya, u suu saɓina kis kis mba' minigi tagi a tuɗ Sesare, ka lina kogi njeŋge u faɗta dleeŋera. 24Halagi kulum maŋ Pol a tlam hara may. A nam tew ki fok mul ŋgolna Feliks va lam voɗɗi.» 25Nam ɓii magaara ko wanda na ana,

26«Klaud Lisiyas gi deɓpa maŋ mul ŋgolna Feliks. 27Suu Juifna tok vunusi kay sana wanni ana asi a cam kiyo, an hum ana nammi sa ma Romma ni an u asgaa mansina suɗum ha ki ni na. 28An a hum u boy ma suu Juifna halam kamma ni an tuɗum fok suu ŋgolo suu kaɓakŋana. 29Boy ma an famma kamma ni ana asi halammi kay gaɗ masira. Ni ndak ka a boy ma co ma sa ci sa ki kambi, ɗowba gi sa daŋgay kambi lay. 30Hu li ma an hum ana suu Juifna ŋgaa vunusi kam a cam kiyo ni an sunum ha ki egeŋ zak, di suu mam suu ɓak egemma ana asi tuɗ sekem ha fokoŋu.»

31Suu asgaana hum u boy ma gaɗasina hummi tuɗ u Pol hu njeŋge ndaɗta gak gak tew Antipatris. 32Vin maɗiira wanni suu asgaa suu u sesina hoŋ ay hu Yerusalem, hin suu kulumina jak u Pol may. 33Hu li ma asi cuk ha Sesarena may ni asi ɦal magaara maŋ mul ŋgolna tani, ɦam Pol ha gaw may. 34Mul ŋgolna ndum magaara ndummi, joɓ Pol ana nam ay ni hu ndaŋga taarage? Nam hum ana nam ay ni hu Silisi ni, 35nam dam ana, «Suu maŋ suu ɓakŋa u aŋŋa hin mba wa ni, an hin joɓoŋ tuwa.» Nam ɦasi gaɗta ana tuɗum ha hu daŋgayna hu zira vi Herod.

Currently Selected:

SUNDA 23: BMS

Highlight

Copy