2 TIMOTE 4
4
1An suuruŋŋi fok Lona, fok Yesu Kristu ma kaɓakŋa kay suu iirina u suu miɗina hu mbaamba nam hin mbay hu mul mambara. 2Di Boy Lonana col kam eŋe, lini lina ka jivi ɗowba jiviɗi lay, mal huu suuna, yalasiya, gaɗasiya, haɗasi u lalamba jivira. 3Kay lina hin mbaa suuna hin mbuɗ hum u haɗta gasira oloɗi, asi hin mbuɗ lini u min masira, asi hin tok suu a haɗasina bolow egesiya, suu asina hin dasi dlara asi min a humuɗta. 4Asi hin mbuɗ hum gasira oloɗi, asi hin hoŋ irisi tin saa masira ni kay njun njunda. 5Aŋ may ni kak a ŋgolla vi taŋga daŋ may vi wihawra kaŋu, li sun maŋga, di Boy ma Ayra, li sun maŋga a aŋ sa ma sunda vi Lonna halaŋ.
6Lini anu ni faɗan ndak wa an min a ɦal tan ki a ɓivunna, buurun ma miɗna ndak wa. 7An duu duu ma jivina wa, an tew ki fun li ma ŋgaannana wa, an gol viinda u Lonara wa lay. 8Cecemmi warakŋa ka juɓunu, ni jumba mulla ɗegeera, Bu Suuna ma ɗegeena ma kaɓakŋa hin ɦanda hu buu namma, ka ɦanda ni man an dewɗi ni maŋ suu ka juɓum u minda hu buu ma nam hin hoŋ ayna halaŋ.
Saara kay taŋga
9So taŋ ay a mba ŋgafan zak. 10Kay Demas hinin ki wa kay nam min tlesuu vi duliyara ŋgolo, nam tuɗ Tesalonik wa, Kresens tuɗ Galati, Tit tuɗ Dalmati may. 11Luk hin egen tani dew ni namu aŋ mbay u Mark uŋu, kay nam hin ndak a njunun hu sunda. 12An sun Tisik ha Efes. 13Aŋ a mbayra wanni yowon baraw man ma semetna ma an hinim ha Troas vi Karpusna aya, yowon magaarina ay koŋ may, saɓaki ni suu ɓiiri hu ɗikkana.
14Aleksandre ma dli caffa lan boy cona egen ŋgolo, Bu Suuna hin warakam kay dlaamba nam laɗta ni namu. 15Gol taŋ egem jiviya, kay nam li dla cora ni eg dla mayra ay ka daɗta halaŋ.
16Hu li ma an di ay ki kay viinda ni sa ma njun ay un kaɗi, an ay fun dlaanda ni u dew tanu, suuna halaŋ noyon kiyo. Ko Lona ŋga co ndaɗta kasiɗi. 17Bu Suuna mbay egen tok njunun ni namu, kay an ndak a di boyna maŋ suu ka njaf suu Juifnaɗina, asi humum ki halaŋ, nam suɗun ay fun dlona. 18Bu Suuna suɗun ki ko cora halaŋ an kal hu mul mamba kolora u tanda jivira. Ŋgolla ni mamba a fafatɗa, Amin.
Gi deɓpa daɓ daganda
19Gi deɓ Prisiye u Akilas u suu vi Onesiforna may. 20Erast hin ha Korint, an hin Trofim ha Milet may kay nam tuguɗiyo. 21So taŋ a mbay ki egen jew u vun semeɗna.
Eubulus, Pudens, Linus Klaudiya u gorseygi suu daŋŋa halaŋ gaŋ deɓpa.
22Ko Bu Suuna kak u aŋu. Ko oora kak u agiya.
Currently Selected:
2 TIMOTE 4: BMS
Highlight
Copy
Compare
Share
Want to have your highlights saved across all your devices? Sign up or sign in
Bible Moussey © Bible Society of Chad, 2002.
