1 TESALONIKŊA 5
5
1Gorsenna kay buu ma ha fokŋa u li ma hin mbana sa ka ɓiirigina ɓiiri oloɗi. 2Kay agi kay tagira lay wi ki ana Buu ma vi Bu Suunana hin mbaa ni ko sa ma kulna na. 3Hu li ma suuna mbuɗ di ana heɓpa kaa, ya ka oloɗina ni, buu ma ɓalakka hin mba kasina, ni ko ndal cara huruɗ taɗ a vuɗta na li ma asi suɗ ki hurum kaɗi. 4Gorsenna, agi ka hu ndufundaɗi, a buu namma mba kafagi ko sa ma kulna naɗi. 5Agi halaŋŋi goryoŋ kiɗikkana, aygi ni ka suu hu njeŋgera u ndufundanaɗi. 6Buuruygi senna ko suu hiŋŋa naɗi, lakaygi jek jekee, taygi miniya. 7Suu buu senna buurummi njeŋgee, suu guruɗta guruɗ ni njeŋge may. 8Aygi suu hu faalirana lakaygi taygi miniya, cukuygi koroŋ ma vira u minda taygiya, tinigi jumba mulla juɓpa ɗigilla vi suɗta kagiya. 9Lona laygi ka a baaygi ki u yaambaɗi, a faygi ni suɗta u Bu Suuna mayna Yesu Kristu. 10Ni ma miɗi kaygina a aygi lini iiri lay miɗi lay lakaygi ni u nam dew. 11Kay ndaɗta gagi hum tagi tew tew, haɗagi tagiya tagiya ko agi kaa day lira na lay.
Boy ma daɓ daganna u gi deɓpa
12Gorsenna ami joɓogiya, humugi u suu ŋgolo suu fokogina, suu Bu Suuna tinisi dukugi takagi voɗta, haɗagi layna. 13Ŋgaasiya, kay sunda asi ka laɗ dukugira, lakagi u heɓpa duk tagiya.
14Gorsenna ami gaɗagiya, neegi suu poy poyra cora, ɗiligi ii suu ka yoo tasina, njunugi u suu maŋina, lakagi ɗili u suuna halaŋ. 15Gologi tagi jiviya, hin sa hoŋ cora u ndaraɗ coraɗi. Halagi a li ni jivira duk tagi na ɗow, lagi jivira eg suuna halaŋ lay.
16Furiyugi tew tew. 17Cenegi tew tew. 18Gagi deɓ Lona hu dlara fagira halaŋ. Ni dlara Lona min ana agi laɗ hu iiri magira u Yesu Kristura.
19Lagi dlara doo Musuk Lonara kiɗi. 20Boy ma suu jok vun Lona damma gologina lalasɗi. 21Tukugi tlena halaŋ, lagi suu jivina. 22Doorogi tagi kay dla cora halaŋ.
23Ko Lona malaŋ heɓpa mbuɗugi ki jivi teteɗ, u tagira suu warna, u ŋgus magira u iiri magira lay u mbalatagi may. Tle asina halaŋŋi gologisina, ŋgul li egesiɗi, a juɓ mbara vi Bu Suuna mayna Yesu Kristu. 24Nam ma yagi ay kina ni sa ma ɗegeena, nam hin lagi na may.
25Gorsenna cenegi ay kamiya.
26Gagi deɓ gorseygina halaŋ u furira.
27An kamagi kamiya, ndumugi magaa ndaɗta ki maŋ gorseygina halaŋ.
28Ko oora vi Bu Suuna mayna Yesu Kristu li u agi halaŋ.
Currently Selected:
1 TESALONIKŊA 5: BMS
Highlight
Copy
Compare
Share
Want to have your highlights saved across all your devices? Sign up or sign in
Bible Moussey © Bible Society of Chad, 2002.
