1 TESALONIKŊA 1
1
Gi deɓpa
1Ni an Pol u Silas U Timote ɓii maŋ suu vi Kristuna hu Tesalonik, suu vi Lona Buna u Bu Suuna Yesu Kristu. Ko oora u heɓpa kak u agiya.
Jivira vi Boy ma Ayra hu Tesalonik
2Ami gi deɓ Lona tew tew kagi halaŋ, ami ka yagi segi hu cen mamira tew tew. 3Humumi gami fok Lona tew tew kay sun magira jivira hu vira, kay sunda hu min magira, u hurugi ma tini coco u juɓpa kay Bu Suuna maygina Yesu Kristu. 4Gorsen suu Lona minigina, ami wi ana Lona managi ni namu. 5Kay Boy mami ma Ayra tewegi ka ni u boyna ɦawaɗi, ni u saɓakŋa u Musuk Lonara u gasira ŋgolla. Agi wi lay ami ay dukugi vi tami ni kay boy magina. 6Agi mbuɗ ni suu tlami dlaamira ura vi Bu Suunara, hu lassa coco lay ni agi vi Boy Lonana u ayra hu Musuk Lonara. 7Agi mbuɗ ni a suu tak voɗta maŋ suu vina halaŋ hu Masedoin u Akay. 8Kay boy ma vi Bu Suunana hum ay ki varagiya, ka ni hu Masedoin u Akay holɗi, hurugi ma tini kay Lonna tak ki hu lina halaŋ ka ami a ɓak kam ɓak ki oloɗi. 9Asi ɓak kagi kay vira agi vami ami ay varagira, agi hin ɓivunna maŋ fulina, pereɗ irigi eg Lona ma iiri ma gasina a sunumba. 10Agi ka juɓum goromma hin mbay kolo huulona ni goromma Yesu ma nam paɗam ki kolo iiri duk suu miɗinana, ma hin buɗuygi ki hu yara vi Lona ta hin mbay wan daŋga.
Currently Selected:
1 TESALONIKŊA 1: BMS
Highlight
Copy
Compare
Share
Want to have your highlights saved across all your devices? Sign up or sign in
Bible Moussey © Bible Society of Chad, 2002.
